¹ Ahadêm si Yesus behatowai a Betlehem a toba i Yudea kasêpe i ndaja Herodes, mangahi mangatotumu, a ndoro Bahe’a Yerusalem, ² bo mapêta’an : “bisana Sia, daja i tow i Yahudi ê wa’aho mbehatowe’mai? Imilahêm kamitahula i mbintang-A a ndoro’ Bahe? Kamitahula mahimoniri ‘ i Sia.” ³ A katanga’anoho i raja Herodes êni’aho, behahombo’ai sia teka lohow i Yerusalem. ⁴ Osa sinêsênam pahasa imam kapala bo toutêh a Torat i tow i Yahudi, osa pinangeleina katerangan be silatahula, bisana ê towan i Mesias. ⁵ Kua i latahula we sia : “A mBetlehem a toba i Yudea, apa’an kelewa’ahom bana mbehawatih a suang i kitab i nabi: ⁶ bo sihow Betlehem, toba i Tudea, sihow ahi’i hêmoho ni’it i kisit a nêsa’an be silatahula a makolano’ i Yehuda, apa’an behowêm ê lêmboan i nêsa tow makolano’, ê momilag i tow Hu Israel.” ⁷ Osa karêngan i kaête-têw si Herodes tumiang i aho mangatow i Majus bo karêngan i silsilah tuma’an be silatahula, ka isam pinêilahan iaho mbintang. ⁸ Osa sia masiu silatahula moho mBetlehem, kuana : “ moho bo pangita’un mau-maulêng a sakom wa’aho kedong bo tilaho a kaereanoho i homotahula Sia, iabarai we ahu sanihobo siahu hahu moniri i Sia.” ⁹ A mahatanga’oho i mangahodait iaho ndaja, matang silatahula. Bo pilahên, bintang ê wa’aho pinêilah i latahula bi bahe’ mamuna we silatahula ahad nihoamat bo sumondo’ a mbao i lesad, a mbisana mbana niaho kedong. ¹⁰ A kawilahanoho i latahula niaho mbintang, imêkahi’imio’ silatahula. ¹¹ Yana sumuang silatahula wiboho a suang i mbale bo milah i aho kedong karua i Maria, inang-A, osa kumuru moniri’i Sia. Silatahula hahi muha i lesad i mangahukuwna bo mawalad i powalad be Sia, awa’aho mas, manyan bo mur. ¹² Bo apa’an bewawaturu’ a niwi, saniboho na’ malengoho we si Herodes, yana maleng silatahula a ndo’onga mêbe a andalan balina. ¹³ Matangoho hiaho mangatow i Majus, malaekat i Tuhan pilahên i Yusuf a niwi bo kumua : “Tumodêm, indon niana kedong teka i ninang-A, lumolahêm moho a Masir osa sumondo’io’ biboho ahad ahu kumua wehow, ênde si Herodes mangilah iana Kedong manutu’ lumimêd i Sia. ¹⁴ Yanasa tumod si Yusuf, indona niaho kedong teka i ninang-A a mbêngimio i aho, osa kumêndus a Masir, ¹⁵ bo mêto’op’ biboho ahad si Herodes mate. Ê wa’aho behamoali saniboho malêkêwêm ê mbehukua i Tuhan be nabi : “A Masir tiangêy-Ku mBata’Ku.” ¹⁶ Kailahanoho i Herodes, awahêm sia pinêtondeiêm i aho mangatotumu’ i majus, mare’emio sia. Osa sua masiu mêlimêd i pahasa heding a mBetlehem bo sakumêna, wa’aho mangahedong mahaumur dua ngata’un osa iwa-wa’, mêtêna’an bo tepo ê kinailahana a mangatotumu’ i majus wa’aho. ¹⁷ Karêngan iaho malêkêwêm kukua ê mbehukua i nabi Yeremia: ¹⁸ kinatanga’ anêm nunu’ a rama, kae’ bo isod ê tapemio’ ; si Rahel mapêkae i mangawata’na bo ahi’i sia mabog lêpeiên, apa’an silatahula alanêmoho.” ¹⁹ A matemoho si Herodes, malaekat i Tuhan pêilahên i Yusuf a niwi’ a Masir, kuana: ²⁰ Tumodêm, indonêm niana kedong teka i ninang-A bo matangêm moho a toba i Israel, apa’an silatahula ê mapandung lumimêd iana kedong, imatêm”. ²¹ Osa si Yusuf kahi tumod, beindona niaho kedong teka i ninang-A osa moho a toba i Israel. ²² Sumata’ a tanga’anamoho, awahêm si Arkhelaus imamoalim daja a Yudea i sumaol si Herodes, amanga, matali sia moho wibonge. Apa’an besani a niwi, imohomange si Yusuf a sakumên i Galilea. ²³ Inaho’ama’na moho wibonge mutun sia a nêsa kota mahangalan Nazaret. Sakum wa’aho behamoali saniboho lêkêwêm kukua êmbehukua i manganabi, awahêm Sia patoton Tow i Nazaret.