¹ A noras kumauha’anêm, pahasa imam kapala bo mangatu’a i mbangsa Yahudi isumêsên bo imindo wutusan tanu lumimêd si Yesus. ² Silatahula imatung i Sia, osa mali i Sia bo tumaro i Sia we si Pilatus, kapala i aho ndo’ong. ³ A noras si Yuda, nitumaro i Sia, mêlilah, awahêm si Yesus bekadanêm u’kuman patên, imanêsêlêm sia. Osa sia maleng i aho ndoit pera têlu ngawulu be mangaiman kapala bo mangatu’a, ⁴ osa humua: “Siahu imêsea’am apa’an nitumaro i ndaha’ i tow alahêm sea’.” Sata’ sowat i latahula: “Asia kalahan i hamitahula wo wana? Wana kala’ngumio’ !” ⁵ Yana osa sia masotoho’i aho ndoit pera a suang i mBale Suci, osa lumolahai wiboho osa moho rumatong i mbatangan. ⁶ Mangaiman kapala mulut i aho ndoit pera osa humua: “Ahi’i mata’u sumuang ia’i ndoit a piti i powalad, apa’an nia’i doit i ndaha’.” ⁷ Mahawêkodaitanoho silatahula tumêlês bo wa’aho ndoit toba iwapakua Tana’i Tapakure’ tanu indon pawakuburan i tow talib. ⁸ Wa’ahom kawalianan tana’ wa’aho ahadai inia iwapakua Tana’ i nDaha’. ⁹ Karêngan wa’aho lêkêwêm kukua ê mbehoyow i nabi Yeremia: “Silatahula itumirima telungawulu’ doit pera, awa’aho baer i tinatu tanu êsatow bei’it a sosokad papaken a tutud i tow Israel, ¹⁰ bo silatahula mehe i aho ndoit tanu tana’ i tapakure’, kele i mbesan i Tuhan beahu.” ¹¹ Osa si Yesus iwawasa’ang a kapala i ndo’ong. Osa kapal i ndo’ong tuma’an be Sia: “Sihowndom kolano’ i tow Yahudi?” Sowat i Yesus: “Sihowio’ nihumuam.” ¹² Sata’ a kahatam ê mbewoha’ i mangaimam kapala bo mangatu’a we Sia, ahi’i Sia isumowat asiamange. ¹³ Yana kua i Pilatus be Sia: “Awahi’i how itumanga me’e katado’oana i mbetudu ia’i mangasairi we How?” ¹⁴ Sata’ êsa hodaitange ahi’i Sia isumowat, ahadêm ni aho kapala i ndo’ong imaera-erang. ¹⁵ Imaindom naram a kapala i ndo’ong mawalêpot êsatow u’ku-u’ kumên a tebe i nêndo wako’ wa’aho ihi’it a sisirên i mangatow. ¹⁶ Bo a tepo wa’aho na suang i torunggu êsatow beharerem katapia’ana mahangalan Yesus Barnabas. ¹⁷ Apa’an silatahula isumêsênêm biboho, si Pilatus kumua we silatahula: “Sisei nihabog i homotahula ilêpo’ku tanu homotahula, si Yesus Barnabas suma si Yesus, ê patoton Kristus?” ¹⁸ Sisia totu’u mahalah, awahêm silatahula itumaro si Yesus karêngan i kanat. ¹⁹ A noras si Pilatus mêdatu-ratu’pe’ a kadera i nggohuta, karoanga i humoyow wesia: “Na’ kow suma’uh a perkara i aho totumu’ bako’, ênde apa’an i Sia siahu imongigomio’ a niwian kaungi.” ²⁰ Sata’ apa’an sosusub i mangaiman kapala bo matu-matu’a, tow tado’o mangambut mangelei saniboho si Barnabas ilêpot osa si Yesus u’kumên paten. ²¹ Kapala i ndo’ong isumowat bo humua we silatahula: “Sisei wiboho a ndua tow nihabog i homotahula ilêpo’ku tanu homotahula?” Kua i latahula: “Si Barnabas.” ²² Kua i Pilatus be silatahula: “Sa helewa’aho, asia ê mustihu tulidên be si Yesus, ê patoton Kristus?” Pahasa silatahula itumerewa’: “Si Sia musti salibên!” ²³ Kuana: “Sata’ kata’ pia’an asiam ê tinawoi-Na?” Sata’ silatahula ni’it makalea sumawang: “Musti Sia salipên!” ²⁴ A noras si Pilatus mêlilah awahêm pahasa beika’ mahuow, dohanganio’ tumo’tolêm lumêmbo pêdika’an, mindo sia ahe osa kumese i kamana a sa’angên i tow tado’o osa humua: “Siahu ahêm sea’ a ndaha ia’i totumu’; wa’aho homotahula mahalah!” ²⁵ Osa pahasa wa’aho tow sumowat: “Mande daha’-Na iwawatanggong be hamitahula, bo a mangawata’ i hamitahula.” ²⁶ Osa sia lumêpot si Barnabas tanu silatahula, sata’ si Yesus dina’ina osa betorana tanu salibên. ²⁷ Ahadiaho mangasururaho i kapala i ndo’ong mali si Yesus moho a bale pagohuta’an. Osa tumiang i pahasa wiong sumêsên kumêkêd si Yesus. ²⁸ Silatahula imêloput i latang-Nga osa mawawêlatang jubah limba we Sia. ²⁹ Mayam êsa balalugi patoh osa mêpa’ i aho a mbao i kohong-Nga, Ahad i aho silatahula sumalibuhu a ndior-Na osa mahira-ira’ i Sia, kuana: “Siri bako’, ei kolano i tow Yahudi !” ³⁰ Silatahula i makêlad i Sia osa mindo i aho naog osa mowel i aho a kohong-Nga. ³¹ Ihaworusoho nimahira-ira’ i Sia loputên i latahula ni ahi njubah be Sia osa maleng mawalatang i latang-Nga we Sia. Ahad i aho silatahula mali i Sia lumuai tanu salibên. ³² A noras silatahula malapang a luar i kota, mêtauw silatahula wo êsatow i Kirene mahangalan Simon. Wa’aho totumu’ lêse’en i latahula lumihud i salib i Yesus. ³³ Yana iho’amat silatahula a lesad mahangalan Golgota, sondai’na lesad i nduruhi. ³⁴ Osa silatahula mehe we Sia luluku’un anggor kinêmuan awêdu. Kananaman-Na-moho, ahi’i wehabog-Nga weluku’. ³⁵ Ihalawus nisumalib i Sia silatahula mêbete-teng i latang-Nga karêngan imahêkad bêlot. ³⁶ Osa silatahula dumatuh biboho mahiaha i Sia. ³⁷ Bo a mbao i kohong-Nga bepa’an patih nitumara i pinodalehan nde’aho Sia mbeu’kum: “Ewa’im si Yesus Kolano’ i tow Yahudi.” ³⁸ Makarua wo Sia wesalib dua tow tapêdapok, êsatow a tulung i kanoal bo êsatow a tulung i kolodi-Na. ³⁹ Mangatow ilumewet biboho mahira’ i sia bo karêngan maposeleng i kohong, ⁴⁰ silatahula kumua: “Ei Sihow ê mabog mawaelet i mBale Lenas osa mabog maleng tumod i sia a têlu ngando, iwawawiam mbatangan-Nu sa How Bata’ i Ningumêlêd, lumolosêm binana a salib !” ⁴¹ Kelewa’aho hahi mangaimam kapala iwakaru-harua i mangatoutên i Torat bo matu-matu’a imahira-ira’ i Sia bo silatahula ihuma: ⁴² ”Tow walina bewawawia-Na, sata’ mbatangan-Na-mio’ ahi’i hawia’an-Na! Si Sia kolano’ i Israel? Maulêngêm Sia lumolos biboho a salib osa kamitahula meman be Sia. ⁴³ Si Sia imao i paharawên-Na a Ningumêlêd: Maulêngêm Ningumêlêd mawawia i Sia, sa Ningumêlêd mêtena’an be Sia! Apa’an Sia ihumuan: “ Si Ahu awahêm Bata’ i Ningumêlêd.” ⁴⁴ Sedang mangatapêdapok ê sinalib iwaru-harua-Na imira’ kahi helewa’aho. ⁴⁵ Tumo’tol a tumiting i sangawulu’ bo rua karêndêman isumapuat a lolow i sakumên biboho ahad tumiting i têlu. ⁴⁶ Ipa’io tumiting i têlu sumawang si Yesus, bewakalea-Na-mio’: “Eli, Eli, lama sabakhtani?” Sondai’na: Ningumêlêd-Ku, Ningumêlêd-Ku, nde’aho How wayai i Ahu? ⁴⁷ Tumanga’ i aho, tatahulatow tumotod biboho ihumua: “Matiang Sia si Elia.” ⁴⁸ Osa tilahom imahi êsa’an be silatahula; mindo sia bungang karang, lumosoh i sia a nanggor mangilu, osa isue’na a sangawowot naog osa mawaluku si Yesus. ⁴⁹ Sata’ mangatow walina ihuman: “Na’, maulêngêm pilahêm i hita, awa mahi si Elia tanu mawawia i Sia.” ⁵⁰ Si Yesus maleng imakalea sumawang osa tumaro i kanalu-Na. ⁵¹ Bo pilahên, adiril a mBale Lênas behawarua tumo’tol a mbao ahad a ndalêm osa mangoawo’, bo mangadungus i mbatu bahaêta, ⁵² bo mangahubur behaokang bo tado’o towlênas imamatêm itumow. ⁵³ Bo ihaleotoho kinatowan i Yesus, silatahula hahi meluai a kubur osa sumuang a kota lênas osa mawaturu’ i mbatangan a katado’oan i tow. ⁵⁴ Kapala i piong bo mangasururahona ê mahiaha si Yesus imatalomio’ a noras silatahula mêlilah i mangoawo’ bo awasia ê mbehamoali, osa humua: “Ulit si Sia Bata’ i Ningumêlêd.” ⁵⁵ Bo wiboho tado’o mbene a ndekang de mapilah, awa’aho mangawene imahalas si Yesus tumo’tol a ngGalilea tanu imasali we Sia. ⁵⁶ A tutud i latahula bana si Maria Magdalena, bo si Maria inang i Yakobus bo si Yusuf, bo mangawata’ i Zebedeus. ⁵⁷ Susutêm dumêndêm mahi êsatow siha’, tow i Arimatea, mahangalan si Yusuf bo imamoalim kahi murid i Yesus. ⁵⁸ Moho sia suma’ang si Pilatus osa mangelei i mbangke i Yesus. Si Pilatus imêreta iehem Sia wesia. ⁵⁹ Osa si Yusup kahi mindo i aho mbangke, sumawut i sia wo doho’ lenên budo’io. ⁶⁰ osa melet i sia a suang i kubura taleya, ê kinokodna a dungus batu, osa ahadêm nimirigoho êsa watu wako biboho a mbonang i kubur, imalengêm sia. ⁶¹ Sata’ si Maria Magdalena wo si Maria walina isumondo’pe’ mio biboho irumatuh biboho a sa’angên i kubur. ⁶² Masindomai, awa’aho ihaworusoho nêndo masadi-sadia, mahi mangaiman kapala bo mangatow Parisi makaru-harua suma’ang si Pilatus, ⁶³ bo silatahula ihumua: “Tuang, kaimunan i hamitahula, awahêm wa’aho si tapawaureng a mênonowe’ Sia ihumua: Ihalewet têlu ngando maleng Ahu tumow. ⁶⁴ Wa’aho kawalian pêretanêmio’ miaha i aho kubur ahad katêluna ngando; sa tahu’i, mangamuri’-Na do’na mahi tumahow i Sia, osa humua a ndengare: Itumowêm Sia a tutud i tow i mate, amahad pomburengan ni’it kahadan lebe ta’pia êmbua’na ênde na pahamunan.” ⁶⁵ Kua i Pilatus be silatahula: “Ewa’ i mangatapahiaha tanu sihow, matang bo iaha’anêm ni aho kubur mau-maulêng.” ⁶⁶ Yana moho silatahula bo karêngan ikinarua i aho mangatapahiaha silatahula kumalawat i aho kubur bo miaha i sia.