¹ Ihalawusoho si Yesus bo wahasa wa’aho sasani-Na, kumua Sia a mangumuri’-Na: ² ”Kalahan i homotahula, awahêm dua ngadowe’ lumo’or i Paskah, yana Bata’ i Totumu’ iehem tanu salibên.” ³ A tepo wa’aho imanêsênêm mangaimam kapala bo mangatu’a i bangsa Yahudi a nggonggulang i Imam Bako’ mahangalan Kayapas, ⁴ bo silatahula imohoda-hodait êsa ta’ar tanu tumiho’ si Yesus karêngan i pomandei osa tanu lumimêd i Sia. ⁵ Sata’ silatahula humua: “Na’ a noras i palo’oran, saniboho na’ lumêmbo pêdika’an a tutud i tow.” ⁶ A noras si Yesus a mBetania, a mbale i Simon si Husta, ⁷ mahi nêsatow wene we Sia mape’a-we’ang êsa totangan marmar sua-suangan solo sapêng mahal. Wa’aho solo beusa’aga a kohong i Yesus, ê mêdatu-ratu’pe’ manganyan. ⁸ Mêlilah i aho mangamurid mare’e osa humua: “Ondowan nia’i poaburan? ⁹ Apa’an ni aaho solo do’na gu’unên mahal osa doi’na do’na iehe a mangatow lêngei.” ¹⁰ Sata’ si Yesus mahalah i nutêh i latahula osa humau: “Nde’aho homotahula mawasusa ia’i mbene? Apa’an sia itumulidêm êsa tatawoi maulêng be Ahu. ¹¹ Apa’an mangatow lêngei salalu wana mbehow, sata’ Ahu ahi’i maindo salalu iwakaru-harua i homotahula. ¹² Apa’an karêngan i musah i aho solo a mbatangay-Ku, tumulid sia êsa ponekeban tanu kuburay-Ku. ¹³ Si Ahu umua wehow: Kaulitana bisanamange nia’i Kukua iwosahai a sêrêb i mbaoitoba, asia ê nia’i tulidêna i wapakuahahi tahu mangimun i sia.” ¹⁴ Ahad wa’aho moho êsatow a sangawulu’ bo rua murid wa’aho, mahangalan Yudas Iskariot, a mangaimam kepala. ¹⁵ Kumua sia: “Asia ê niehe i homotahula weahu, saniboho ahu tumaro i Sia we homotahula?” Silatahula imaer têlu ngawulu doit pera wesia. ¹⁶ Osa tu ‘os wa’aho sia mangila-ngilah tepo maulêng tanu tumaro si Yesus. ¹⁷ A nêndo kaêsana i nêndo wako’ Roti Ta’kinaboan mangahi mangamurid i Yesus be Sia bo kumua: “Ihabong-Ngu bisana hamitahula mawasadia i pêsaheian i Paskah tanu sihow? ¹⁸ Sowat i Yesus: “Mohonêm a kota be si A’itu bo ihua wesia: Koyow i ngGuru: tepo-Hu toyota’am mahi; a mbalenum Ahu mabog lumo’or i Paskah makaru-haru wo mangamuri’-Ku.” ¹⁹ Osa mangamuri’-Na tumulid kele i mbewasiu i Yesus be silatahula osa mawasadia i Paskah. ²⁰ Mawêngimoho, si Yesus dumatuh kuman karuru i sangawulu’ bo rua wa’aho. ²¹ Osa a noras mangayaype’ silatahula, kumua Sia: “Si Ahu kumua mehowkaulitana êsa’an be homotahula mawataro i Ahu.” ²² Osa karêngan i nate tapemio’ mohodait silatahula êsa wo êsa we Sia: “Ahi’i siahu, Tuhan? ²³ Sowetên-Nam: “Sia ê mêdoro-ro bo si Ahu dumu’dul i kamana a suang ia’i pindan, sisiam ê mawataro i Ahu. ²⁴ Bata’ i Totumu’ totu’u matang mêkele wo behawatihêm sakum si Sia, sumata’ silakamio’ tow ê tatawoina Bata’ i Totumu’ wa’aho bewawataro. Awahêm lebe maulêng biboho a totumu’ sao’on sia ahi’i bewahawata’.” ²⁵ Si Yudas, ê wa’aho manutu mawataro i Sia sumowat, kuana: “Ahi’i siahu, Guru?” Kua i Yesus besia: “Sihow nihumuam i aho.” ²⁶ Osa a noras silatahula manganyape’, si Yesus mindo roti, kumua hamang, mamisu-misung i sia osa mehe i sia a mangamuri’-Na bo humua: “Indonêm, kumanêm, êwa’im mbatangay-Ku.” ²⁷ Ahad i aho mindo Sia i cawan, mêdayow osa mehe i sia we silatahula bo kumua: “Luku’um, komotahula pahasa, bia’i a cawan. ²⁸ Apa’an wa’im ndaha’-Ku, daha sasanian, beusah beteng i tado’o tow tanu pangapungan i ndosa. ²⁹ Sumata’ si Ahu kumua wehow: tumo’tol ia’i talewe alam Ahu laku’ a mbua’ i tud i nanggor wa’i ahad a nêndo Ahu luku’ i sia, awa’aho taleya, karuru i homotahula a suang i Kaholano’an i Namay-Ku.” ³⁰ Mahahataroho katar darayowên, moho si Yesus bo mangamuri’-Na a nDungus Zaitun. ³¹ Yana kumua si Yesus be silatahula: “Inia mbêgi pahasa homotahula mêbambing kawahemanu apa’an si Ahu. Apa’an bana mbewatih: Siahu lumimêd i nggembala osa wa’aho pa’anan i ndomba moburai. ³² Sumata’ ihaleot Ahu nitumowêm, mamuna Ahu we homotahula moho a ngaGalilea.” ³³ Si Petrus somowat be Sia: “Mandewe” pahasa silatahula mobambing kawahemana apa’an Sihow, siahu ahi’i mahasa.” ³⁴ Si Yesus kamua wesia: “Siahu kumua wehow, kaulitana inia mbêngi, a talawe’ i humohoh ko’ko, sihow isumakalêm i Ahu mahatêlu.” ³⁵ Kua i Petrus be Sia: “mandewe’ ahu mate iwakarua-Nu, ahi’i ahu sumakal i How.” Pahasa Murid balina hahi ihumua kele wa’aho hahi. ³⁶ Yana ihomat si Yesus teka i mangamuri’-Na a nêsa lesad mahangalan Getsemani. Osa Sia humua mangamuri’-Na: “Dumatuhio” bia’i, karoro’an Ahu moho wiboho tanu sumombayang.” ³⁷ Bo Sia mali si Petrus bo rua wata’ i Zebedeus lumas i Sia. Yana tumo’tol Sia mahahêlam tape wo talo, ³⁸ osa kua-Na we silatahula: “Ate-Hu matapemio’, kêpom toyo’ta’am mate. sumondo’io’ bai’ bo mahia-iahamange wo si Ahu.” ³⁹ Yana sumoyatako Sia hisit, osa sumalimbuhu wo sumombayang, kua-Na: “O, Amay-Ku, sa helemange ro’na, mande nia’i cawan ihalewet be Ahu, sata’ na’am kale i panduy-Ku, sumata kale wo wandung-Ngu.” ⁴⁰ Ihaomoho ni aho malengoho Sia wiboho a mangamuri’-Na osa mohoamat silatahula mêbo’o-owe’. Osa kua-Na we si Petrus: “Awahi’i homotahula mahabaya mahia-iaha sangaoras bo si Ahu? ⁴¹ Mahia-iahamange bo masombayangange, saniboho homotahula na’ ihakad a suang i tetena’an: tutuh totu’u mohi’it, sata kêtêd kawel.” ⁴² Osa Sia karuana malengako bo sumombayang, kua-Na: “O, Amay-Ku, ihamoalimai pandung-Nug!” ⁴³ Bo a noras malengai hahi Sia, koamatan-Na-mange silatahula mebo’o-owe’, apa’an bêlên i latahula tanêdêm. ⁴⁴ Bewayai-Na-oho silatahula wiboho osa mako wo sumombayang a katêlunam bo ihumua i sombayang ê wa’ahomio’. ⁴⁵ Ihaworus ni aho mahi Sia a mangamuri’-Na osa humua we silatahula: “Mo’om ia’i talewe’ bo lumêmêtêm. Pilahên, tepona imahim, awahêm Bata’ i Totumu’ batarom a kama i mangatow mosea’ . ⁴⁶ Tumodêm, ayomêm kita moho. Sia ê nitumaro i Ahu susutêm.” ⁴⁷ Oras mênunu’pe’ si Yesus imahim si Yudas, êsa’an tow wiboho a sangawulu’ bo rua murid, makaru-harua wo sisia sangalulut todo’o tow mape’a-weang tinomboya bo bambang, besiu i mangaimam kepala bo mangatu’a i mbangsa Yahudi. ⁴⁸ Totumu’ itumaro i Sia ihumuam êwa’i tanda’ be silataula: “Totumu’ timuayku, wa’ahom Sia, tiho’onêm Sia.” ⁴⁹ Osa tilahom sia i lumakad sumusut be si Yesus osa humua: “Siri’ Guru,” osa tumimu’ i Sia. ⁵⁰ Sata si Yesus kumua wesia: “Ei ambe, tanu wa’ahondom kow imahi?” Yana lumakadange silatahula tumaka’ si Yesus osa tumiho’ i Sia. ⁵¹ Sata’ êsatow we silatahula ê mahalas si Yesus lumuai i kamana osa lumolo i tinombaya osa itatabna a nata i Imam Bako’ ahad talingana behaêpas. ⁵² Yana kua i Yesus besia: “Maleng iuma’ niana tinombaya a numa’na, apa’an siseiange mapake tinombaya, moturasi i tinombaya. ⁵³ Suma kuanumange, awahêm Ahu ahi’i ro’na sumawang a Namay-Ku, saniboho Sia tilaho humirim lebe a sangawulu’ bo rua ngawalas malaekat sumule i Ahu? ⁵⁴ Sa helewa’aho, kelembisandom lêkêwên ê mbewatih a Kaol, nihumua, awahêm musti ihamoali helewa’aho?” ⁵⁵ A tepo wa’aho si Yesus kumua a tow tado’o: “Kuanumange Ahu wa’i tapêdapok, yana homotahula mahi lêkêw bo tinomboya bo bambang tanu tumiho’ i Ahu? Kandati tebe i nêndo Ahu mêdatu-ratuh mapêsani a mBale i Ningumêlêd, bo homotahula ahi’i tumiho’ i Ahu. ⁵⁶ Sumata’ pahasa ia’i ihamoali saniboho malêkêw, niwati-watih a kitab i manganabi.” Osa pahasa murid wa’aho mêpa’io’ i Sia osa mêlolah. ⁵⁷ Tiho’onoho i latahula si Yesus, balin i latahula Sia suma’ang si Kayapas, Imam Bako’. Biboho isumêsênêm mangatoutêh i Torat bo matu-matu’a. ⁵⁸ Bo si Petrus a ndekang maalas i Sia motahad i lesad i Imam Bako’, osa ahad nimanuangêm, dumatuh sia a nêpang i mangawiong mapilah ikalawusan i aho perkara. ⁵⁹ Mangaimam kapala, bo wahasa Gohuta i nAgama mangila-ngilah sasairi towo we si Yesus, saniboho Sia do’na u’kumên paten, ⁶⁰ sata’ silatahula ahi’i ihumita, mande imêlêmbo tado’o sairi towo. Sata’ amahad mêtodai dua tow, ⁶¹ nihumua: “Totumu’ êwa’i ihumua: Siahu do’na mawaelet i mBale i Ningumêlêd osa maleng tumod i sia a têlu ngando.” ⁶² Osa ni aho Imam Bako’ tumod bo kumua we Sia: “Awahi’i How sumowat i mangawetudu ia’i mangasairi we How?” ⁶³ Sata’ si Yesus imêtêwoho. Osa kua i aho Imam Bako’ be Sila: “Tanu Ningumêlêd mênonow, ihuamai we hamitahula, awa How si Mesias Bata’i Ningumêlêd, suma ahi’i.” ⁶⁴ Sowat i Yesus: “Sihow ihumuan. Sumata, si Ahua kumua wehow, tumo’tol ia’i talewe’ komotahula mahawilah Bata’ i Totumu’ dumatuh a tulung i kanoal I Mahaimbahut osa mahi a mbao i kambur a langit.” ⁶⁵ Yana wa’aho Imam Bako’ dumayat i latanga osa humua: “Si Sia itumena’am i Ningumêlêd. Ondowaype’ kita mangilah sairi? Ia’i talewe’ tinanga’an i homotahula tetena’-Na. ⁶⁶ Kelembisa nihua i homotahula?” Silatahula isumowat bo humua: “Musti Sia u’kumên paten!” ⁶⁷ Osa silatahula mangêled a tokia’-Na bo mêdihu i Sia; mangatow walina imamakur i Sia, ⁶⁸ bo ihumua: “Êpe’an ihua we hamitahla, ei Meisas, siseindom nimamakur i How?” ⁶⁹ Karêpêt i aho si Petrus mêdatu-ratuh a luar i lesad. Yana mahi nêsa ata wene wesia, kuana: “Sihow hahi maindo makaru-harua wo si Yesus, wa’aho tow i ngGalilea?” ⁷⁰ Sata sia i sumakal i Sia a sa’angên i pahasa tow, kuana: “Ahi’i ahu mahalah, asia ê panutu’unu.” ⁷¹ A noras sia moho a tombonang, êsatow ata walina mêlilah i sia osa humua a mangatow wiboho: “Torumu’ wa’i makaru-harua wo si Yesus, wa’aho tow i Nazaret.” ⁷² Osa isumakal kahi sia karêngan imasupa: “Ahi’i ahu mahahilala i aho totumu’.” ⁷³ Ahi’i êto’ lumalas mangatow wiboho mahi we si Petrus osa kumua: “Totu’u sihow hahi tow êsa’an be silatahula, wa’aho katu’tulan a kawatutulu.” ⁷⁴ Yana tumo’tolêm maponapa wo masupa: “Ahi’i ahu mahahilala i totumu’ wa’aho.” Bo a noras wa’aho ihumohohêm ko’ko. ⁷⁵ Yana mahaimun si Petrus asia mbehua i Yesus besia: “Alawe i humohoh ko’ko, sihow isumakalêm i Ahu mahatêlu.” Osa si lumuai bo mêkae i tapena.