¹ “A tepo wa’aho sakum Kaholano’an i Sorga kelewati’ sangawulu’ mangala’un, nimindo i sosoloana osa maho sumupah i makaweng tuama. ² Lima we silatahula bodoh bo lima mosilih. ³ Wa’aho magamangala’un bodoh me’ang i sosoloana, sata’ ahi’i ime’ang solo, ⁴ songad wa’aho mangamangala’un mosilih me’ang i sosoloana bo hahi solo a totangan i latahula. ⁵ Sata’ tatawoi ni aho makaweng êto’ ahi’i talaho imahi, imaho’o’o’ o pahasa silatahula osa wehao’o. ⁶ Oras tutudêm i mbengi katanga’anange nunu’ i tow tumerawa’: Imahim makaweng! Supahênêm sia! ⁷ Pahasa wa’aho mangamangala’un mawolo osa mamu’tul i sosoloan i latahula. ⁸ Mangamangala’un bodoh kumua a mangamangala’un mosilih: Beanai hamitahula keleawa winana a solo i homotahula, ênde sosoloan i hamitahula toyo’ta’am mate. ⁹ Sata sowat i aho mangamangala’un mosilih: Hi’i, ndesa ahi’i roro’ tanu hamitahula bo tanu homotahula. Lebe maulêng komotahula moho a mapahu’un solo osa tumêlês biboho. ¹⁰ Sumata’, a mahohowe’ silatahula tumêlês, imahim ni aho makaweng osa silatahula i nisumadi-sadiam sumuang makaru-harua i sia a lesad i pêsaheian i makaweng, osa bonang betakêw. ¹¹ Hadiaho mahi ni aho mangamangala’un balina osa kumua: Tuang, nawo’, buha’anai hamitahula wonang! ¹² Sata’ sia somowat: Siahu kumua wehow, kaulitana ahi’i ahu mahahilala i homotahula. ¹³ Apa’an wa’aho, mahia-iahamenge, ênde homotahula ahi’i mahoita’u i nêndo suma ora’na.” ¹⁴ Apa-apa’an sakum i Kaholano’an i Sorga kelemio’ êsatow ê mabong lumaur a luar i ndo’ong, imaniang i mangaatana osa mahi-iaha i nartuna we silatahula. ¹⁵ Ê nêsatow bineana lima talenta, ê nêsatow hahi dua bo êsatow walina hahi êsa, daraket behi’it a kaeleinana, osa sia matang. ¹⁶ Tilahom imoho ni aho ata itumirima lima talenta. Bawalaanga ni aho ndoit osa mahaere utung lima talenta. ¹⁷ Ata itumirima dua talenta hahi itumulid helewa’ aho osa imautung dua talenta. ¹⁸ Sata’ wa’aho nata itumirima êsa talenta imoho osa kumokod boso a toba osa dumuru i aho ndoit i nawo’na. ¹⁹ Êto’om behaworus ni aho malengai nawo’ i aho mangaata osa tumulid pêtebean bo silatahula. ²⁰ Wa’aho nata itumirima lima talenta mahi bo me’angai sia beutung lima talenta, kauan: Awo’, lima talenta bewahi-wahiaha weahu; pilahên, imahaerem ahu utung lima talenta. ²¹ Yana kua i aho nawo’na wesia: maulêngio’ ni aho tinuli’nu, ei ataku maulêng bo moeman, sihow imeman imaluha i sosowatênu a perkara hisit, siahu maleng mehe wehow sosowatên a perkara wako’. Sumuangêm osa iwakaruam a keana’an i nawo’nu. ²² Osa mahi ni aho nata itumirima dua talenta, kuana: Awo’, dua talenta bewahi-wahia weahu: pilahên, imahaerem ahu utung dua talenta. ²³ Yana kua i aho nawo’na wesia: Maulêngio’ ni aho tinuli’nu, ei ataku maulêng bo moeman, sihow imeman imaluha i sosowatên a perkara wako’. Sumuangêm osa iwakaruam a keana’an i nawo’nu. ²⁴ Êwa’i mahi hahi nata wa’aho nitumirima êsa talenta bo humua: Awo’, kalahaku awahêm si nawo’ totumu’ ahas ê mêwênguwu’ a lesad bisana si nawo’ ahi’i mapamayu’. ²⁵ Apa-apa’an wo’aho ahu matalo osa moho itumutu i aho talenta i nawo’ a ndalêm i toba: Wa’i, tirimanêm kapunyaan i nawo’! ²⁶ Yana sowat i aho nawo’na: Ei komotahula, ata ta’pia wo malas, yana kalahanêm i homotahula, awahêm ahu mapanguwu’ a lesad bisana ahu ahi’i mawakêlod bo mapaniwu’ a lesad bisana ahu ahi’i mapamayu’? ²⁷ Apa-apa’an wa’ aho kaulitanam wa’ao ndoi’ku behenum a totumu’ mawalapang i ndoit, saniboho ihaaleykumai tirimayku sia teka i mbuanganga. ²⁸ Wa’aho kawalian indonêm ni aho talenta wesia osa iehem a totumu’ wa’aho mahasawa sangawulu’ talenta. ²⁹ Apa’an siseiange tow mahasawa, besia maleng bean, mahad sia mahasiha’. Sata’ sisei talahêm sawa, asiamange mbesia indon besia. ³⁰ Bo itia’amoho niana nata alahêm toro a suang i karêndêman ê ndêndêmio’. Bibohom kaerean i tatabi bo kelêkêt i mba’ang.” ³¹ Sa topom Bata’ i Totumo’ mahi wo Konunga’an-Na bo pahasa malaekat makaru-harua i Sia, yana Sia mahi rumatuh a ndoratuhan konunga’an-Na. ³² Osa pahasa bangsa sêsênên a sa’angên-Na osa si Sia manared silatahula êsatow a nêsatow, mêkele wo gembala manared i ndomba a mbembe’, ³³ osa Sia mêpa i mangadomba a tulung i kanoal-A bo mangawembe’ a tulung i kolodi-Na. ³⁴ Osa ni aho Kolano kumua we silatahula ê natulung i kanoal-A: Ayom, ei komotahula ê kinamang i Namay-Ku, tirimanêm Kaholano’an ê sinadiam tanu sihow to’tol baoitoba bengêlêd. ³⁵ Apa’an a noras Ahu male’o, komatahula mahe we Ahu kanên, a noras Ahu kawêla’an, komotahula mehe we Ahu luku’un; a noras Ahu tow talib, komotahula mehe we Ahu panupangan; ³⁶ A noras Ahu makêda’ai, komotahula mehe we Ahu latangên; a noras ahu wahadosan, komotahula milah i Ahu; a noras Ahu a suang i torunggu, komotahula mimbat i Ahu. ³⁷ Yana wa’aho mangatotumu’ ulit sumowat i Sia, kuana: Tuhan, sawandom kamitahula milah i How male’o osa hamitahula mehe kanên be How, suma hawêla’an osa hamitahula mehe luku’un be How? ³⁸ Sawandom kamitahula malah i How kale tow lib, osa hamitahula mehe wanupangan be How, suma kêde’ai osa hamitahula mehe latangên be How? ³⁹ Sawandom kamitahula milah i How pahadosan suma a suang i torunggu osa hamitahula mowonag be How? ⁴⁰ Osa ni aho Kolano’ sumowat silatahula: Si Ahu humua wehow, kaulitana asiamange tulidên i homotahula tanu êsa’an a pog-Ku ê wa’i lêngei tiogan, tinulidêm i hamotahula tanu si Ahu. ⁴¹ Osa Sia humua hahi we silatahula i na kolodi-Na: Lumolah a sasa’angêy-Ku ei komotahula mangatotumu’ silaka, lumolahêmoho a suang i mbaha têlas ê sinadiam tanu setang bo mangamalaeka’na. ⁴² Apa’an a noras Ahu mele’o, ahi’i Ahu wean i homotahula kenên; a noras Ahu kawêla’an, ahi’i Ahu wean i homotahula luku’un; ⁴³ A noras Ahu êsatow talib, ahi’i Ahu wean i homotahula wanupangan; a noras Ahu kêda’ai, ahi’i Ahu wean i homotahula latangên; a noras Ahu wahadosan bo a suang i torunggu, ahi’i homotahula milah i Ahu. ⁴⁴ Osa silatahula hahi sumowat i Sia, kuana: Tuhan, ka’isandom kamitahula imêlilah i How mele’o, suma kawêla’an, suma kale tow talib, suma keda’ai suma wahadosan, suma a suang i torunggu osa ahi’i i sumali i How? ⁴⁵ Yana sumowat Sia silatahula: Ihua-Hu wehow, kaulitana asiamange ê tahi’i tulidên i homotahula tanu a nêsa’an tow ê lêngei tiogan wa’i, komotahula ahi’i itumawoi i aho hahi tanu si Ahu. ⁴⁶ Osa wa’i silatahula sumuang a lesad pêda’ian-têlas.”