¹ Ihaworus ni aho si Yesus lumuai a mBale i Ningumêlêd, osa mako. Yana mahi mangamuri’-Na osa maturu i mangabanguan i mBale i Ningumêlêd. ² Kumua sia we silatahula: “Komotahula mêlilah i pahasa wa’aho? Si Ahu kumua wehow, kaulitana alahêmi nêsawatu wia’i ihawayai mao-mao a mbatu walina, pahasa iwawawêru.” ³ A noras si Yesus mêdatu-ratuh a Dungus i Saitun, mangahi mangamuri’-Na we Sia tanu mohoda-hodait silatahula hêmoho wo si Sia. Kua i latahula: “Ihuamai we hamitahula, sawa ê ndom ni aho ihamoali no asia tanda’ inahian-Nu bo tanda’ i kasapêtan mbaoitoba?” ⁴ Sowat i Yesus be silatahula: “Matu-atuhên saniboho na’ bana totumu’ ê mawaureng i homotahula! ⁵ Apa-apa’an tado’o totumu’ mangahi karêngan make i ngalay-Ku osa humua: Siahum Mesias, osa silatahula maindo mawaureng i tow tado’o. ⁶ Komotahula maindo tumanga’ i nggongor i perang suma mangasina’u sakum perang. Sata’ maponarahange na’ komotahula maliang: Apa’an pahasa wa’aho musti ihamoali, sata’ wa’aho awe’ kasapêtana. ⁷ Apa-apa’an bangsa ihatod lumawah i mbangsa, bo kaholano’an lumawah i kaholano’an. Mêbana kale’oan bo bangguang a lesad wisanamange. ⁸ Sumata’ pahasa wa’aho to’tolaype’mio’ i pongigonan sumuang a saman taleya. ⁹ A têpo i aho komotahula iwawasua’ saniboho pêda’in, bo komotahula pêlimêdên bo ihare’e i pahasa bangsa apa-apa’an i ngalay-Ku, ¹⁰ bo tado’o tow maindo sumakal bo silatahula maindo mêkahanatan bo mêdere’ean. ¹¹ Tado’o nabi towo mêlêmbo osa mawaureng i tow tado’o. ¹² Bo tatawoi imênado-nado’o kasukagan, yana bêlês i mbehatado’o tow maindo mutin. ¹³ Sata’ tow ê kumêtêr ahad a kasapêtana mawia. ¹⁴ Bo kukua i Kaholano’an wa’i maindo iwawarere a sêrêb i mbaoitoba mamoali sasairi tanu wahasa bangsa, sa alam ni aho mahinêm ê kasapêtana.” ¹⁵ ”Iana sa homotahula mêlilah: Tapaturasioro tumotod a lesad lênas, mi’it a kukua ê mbehoyow i nabi Daniel – moro tapêmaca ulitên tumu’tul i sia – ¹⁶ yana mangatow ê na Yudea ulitên momorus i mbatangan moho a pêdungusan. ¹⁷ Totumu’ ê na pakakabaype’ a mbao i mbale na’am sia lumolos tanu mangindo i mangabarang a mbalena, ¹⁸ bo totumu’ ê na mbondoiwe’ na’am sia maleng moho mindo i latanga. ¹⁹ Silakam ê mangainang ê mahali-ali suma ê manusuwe’ i mbata’na a tepo i aho. ²⁰ Masombayangange, saniboho a noras komotahula momorus i mbatangan ê wa’aho na’ mêtêna’an a nêndo Sabat. ²¹ Apa’an a tepo i aho ihamoali pêda’ian ta’mêri kele i talawe’ mahasa wehamoali tu’os katere i mbaoitoba ahadai wa’i bo alam maleng mahasa ihamoali. ²² Bo sa hele tepona ahi’i iwawahapui, yana a pahasa mênonow alanêmange ê malowid; sumata’ apa’an i mangatow sinilih tepo i aho iwawahapui. ²³ A tepo wa’aho sa wana tow humua we homotahula: Emoho, si Yesus bia’i, suma si Mesias biboho, na’ komotahula meman. ²⁴ Ende mangamesias towo bo manganabi towo mêlêmbo bo silatahula manulid tatanda ê ta’mêri bo mangamujisat, amahad sahelemange ro’na, silatahula hahi mawaureng i mangatow sinilih. ²⁵ Tikêmênange, si Ahu ihumuam behow a pahamunan. ²⁶ Yana, sa tow kumua wehow: Moho, si Sia a padang gurun, na’am komotahula moho wiboho; suma: Moho, si Sia a suang i kamar, na’am komotahula meman. ²⁷ Apa-apa’an mêkele wo kilat kumilat a ndoro’ i timu bo sumurahoho i sulona ahad a ndoro’ i malad, kele wa’ahom ê mahasa ahian i mBata’ i Totumu’. ²⁸ Bisana mbana mbangke, biboho mbana mbalilangan mêlipung. ²⁹ Tilaho a niwalawusoho pêda’ian a tepo wa’aho, êndo maindo rêndêm bo bulan alam sumulo bo mangabintang mêdabas a langit bo mangamakolano’ a langit mêdandu’. ³⁰ A tepo wa’aho kawilahan tanda’ i mBata’ i Totumu’ a langit bo pahasa bangsa a mbaoitoba monabi bo silatahula mahawilah i mBata’ i Totumu’ wa’aho mahi a mbao i kambur a langit karêngan i pahasa koimbahutan bo konunga’an-Na. ³¹ Bo si Sia mahiwêluai i mangamalaekat-Na karêngan manêput i turumpet ê ta’mêri koaridana osa silatahula manêsên i mangatow sinisir-A a nêpat du’una i mbaoitoba, a têpoh i langit a nêsa moho a têpoh i langit balina. ³² Mindomai sasanian a pangandean sakum pohong ara: Sa mangasisina tumo’ tolêm mêtombal bo tumo’tolêm manalunge, kalahan i homotahula, awahêm musung i mahêndo susutêm. ³³ Kelewa’aho hahi, sa homotahula milah i’ai pahasa, kalahande, awahêm tepona susutêm, a mbaba’anêm i mbonang. ³⁴ Kumua Ahi we homotauhla: Kaulitana pêkarênganan wa’i ahi’i ihalewet, sa wahasa wa’i awe’ behamoali. ³⁵ Langit bo baoitoba ihaleot, sata’ Kukua-Hu ahi’i ihaleor. ³⁶ Sata’ sakum êndo wo oras i aho alahêm mandê êsatow ê mahalah, mangamalaetkat a sorga ahi’i, bo Bata’ kahi ahi’i bati’ Amang i nêsa. ³⁷ Apa’an mêkele wo tinêpo i Nuh, kelawa’aho hahi ê nihamoali a nahian i mBata’ i Totumu’. ³⁸ Apa-apa’an mêkele wo silatahula a tepo alawe’ ni aho nahe i ndunuh makan bo luku’, makaweng bo mapawahaweng, ahad na nêndo si Nuh sumuang a suang i mbahtera, ³⁹ bo silatahula ahi’i mahala awasia, atalawe’ ni aho nahe i ndunuh mahi osa imawatamublala i pahasa silatahula, kelewa’aho hahim nihamoali a nahian i mBata’ i Totumu’. ⁴⁰ A tepo wa’aho sa wana ndua tow a mbondoi, ê nêsa tow walin bo ê mbalina iêpa’io’ ; ⁴¹ sa wana ndua tow wene mêpuri-wurisi i mbatu pawahilingan, ê nêsatow balin osa ê mbalina iêpa’io’. ⁴² Apa’an wa’aho mahia-iahamange, ênde homotahula hi’i mahalah a nêndo mbisa Ningumêlêd-Nu mahi. ⁴³ Sata’ kalahanange nia’i: Sa mahawele mahala sawa na mbêgi totahow mahi, matatu sia dali’im imahia-iaha, bo ahi’i mayai i mbalena wobuhaiên. ⁴⁴ Kawalian i aho, maindomange homotahula hahi sumadisadia, apa’an Bata’ i Totumu’ mahi a norase ê tahi’i hasokadan i homotahula.” ⁴⁵ ”Sisei nata ê moeman bo mosilih, ê mbeatang i nawo’na a mangatowna tanu mehe we silatahula hakanên a tepona? ⁴⁶ Maênowange nata, ê koamatan i nawo’na itumulid i aho tawoiêna, a noras mahi ni aho nawo’na. ⁴⁷ Ihuahu we homotahula: Kaulitana ni aho nawo’na. ⁴⁸ Ihuahu we homotahula: Kaulitana ni aho nawo’na matang i sia mamoali tapahiaha i pahasa sawana. ⁴⁹ Sumata’ sa ni aho nata ta’pia bo humua a suang i natena: Nawo’ku ahi’i mahahi-ahi, osa sia tumo’tol mêwêmakur i mangaata walina, bo makan maluku’ karuru i mangatapololango. ⁵⁰ Yana nawo’ i aho nata mahi a nêndo ahi’i hinatebeana, bo a noras ê tahi’i hino’ita’uana, ⁵¹ osa mahi lumimêd i sia bo tumulid i sia mahahotika kale wo mangatow kaliut. Bobohom katanga’an bo kalêket i mba’ang.” Mangamangala’un mosilih bo mangamangala’un bodoh.