¹ Yana kumua si Yesus a mangatow bo a mangamuri’-Na, kua-Na: ² ”Mangatoutêh a Torat bo mangatow Parisi irumatuhêm a kaderi i Musa. ³ Wa’aho kawalian ki’itan bo tulidênêm awasiamange ê nisusui i latahula wehow, sata’ na’am ki’itan i homotahula mangatatawoi i latahula, apa’an silatahula masusui i aho sata’ hi’i matulid i aho. ⁴ Manogot silatahula i mangatotanêd tanêd, osa mêpa’ i aho a paluha i tow, sata’ silatahulamio’ ahi’i maibog sumait i sia. ⁵ Pahasa patawoiên ê tulidên i latahula bati’ bewanutu’ saniboho pêlilahên i tow; make silatahula tali sombayang bêladan bo doyot katangan; ⁶ Silatahula mabo-abong maratuh a lesad armatênio a pasaheian bo a lesad a ndiorio’ a mbale waibadatan; ⁷ silatahula mabog tumirima sisiri’in a pasar bo mabog patototn Rabi. ⁸ Sata’ komotahula, na’am komotahula awahêm mapog. ⁹ Bo na’am komotahula tumoto siseiange namang a mbao i toba ia’i, apa’an bati êsa Namangu, awa’aho si Sia ê na Sorga. ¹⁰ Na’am kahi homotahula patoton pahalasêng apa’an bati êsa pahalasênu, awa’aho si Mesias. ¹¹ Siseiange ni’it bako a tutud i homotahula, mabogange sia maindo sosalinu. ¹² Bo siseiange mawatatang i mbatangan, sia iwawawehen bo siseiange mawaweheb i mbatangan, sia iwawatatang. ¹³ Silakam komotahula, ei mangatoutêh a Torat bo mangatow Parisi, ei komotahula mangatow kaliut, apa-apa’an komotauhla imanakêw i mangawonang i Kaholano’an i Sorga a ndior i tow. Apa-apa’an komotahulamio’ ahi’i sumuang bo komotahula mapar silatahula ê mangambut sumuang. ¹⁴ [Silakam komotahula, ei mangatoutêh i Torat bo mangatow Parisi, ei komotauhla mangatow kaliut, apa-apa’an komotahula i manêpês i mbale i mangabalu sahahi homotahula mawa-wosêbu i mbêlên i tow teka i sombayang mangahatangan. Apa-apa’an wa’aho komotahula ulit tumirima u’kuman ê lebe tanêd.] ¹⁵ Silakam komotahula, ei mangatoutêh i Torat bo mangatow Parisi, ei komotahula mangatow kaliut, apa-apa’an komotahula lumaur a saloyon bo sumêrêb i mbao i tabo tanu mo’ting i mbati’ êsatow mamoali kohêrês i nagamanu bo ahadêm sia i tumobat tulidên i homotahula sia tow i naraka, ê maharua lebe ta’pia we homotahulamio’. ¹⁶ Silakam komotahula, ei mangawahalasên buta, ê kumua: Masupa Bale Suci, wa’aho supa ahi’i ulit; sata’ masupa tanu mas i mBale Suci, wa’aho supa sumogo-sogot. ¹⁷ Ei komotahula mangatow wo’doh bo mangatow buta, asiandom lebe wênting, mas suma Bale Suci ê mawawayo i aho mas? ¹⁸ Masupa tanu mesbah, wa’aho supa ahi’i ulit; sata’ masupa tanu pawasil ê na mbaona, wa’aho supa sumogo-sogot. ¹⁹ Ei komotahula i mangawuta, asiandom lebe wênting pawasil suma mesbah ê mawawyo i aho pawasil? ²⁰ Apa-apa’an wa’aho siseiange masupa tanu mesbah, masupa sia tanu mesbah bo hahi pahasa asiamange ê nipapa’ ambaona. ²¹ Bo siseiange masupa tanu Bale Suci, masupa sia tanu Bale Suci bo hahi tanu si Sia, ê mahutun biboho. ²² Bo siseiange masupa tanu sorga, masupa sia tanu sorga, masupa sia tanu doratuhan i Ningumêlêd bo hahi tanu si Sia, ê mautu-utun (mututun) a mbaona. ²³ Silakam komotahula, ei mangatoutêh i Torat bo mangatow Parisi, ei komotahula mangatow kaliut, apa-apa’an pasangawulu’un i sulasi, naneis bo popa’as baerên i homotahula, sata’ ê ni’it penting a lala’ut i Torat iwayai i homotahula, awa’aho: kaadilan bo kobêlêsan bo koemanan. E nêsa musti tulidên bo ê mbalina na’ iwayani. ²⁴ Ei komotahula mangawahalasên buta, nênêh sapoiên i homotahula a luluku’unu, sata’ unta a suanga têpêsên i homotahula. ²⁵ Silakam komotahula, ei mangatoutêh w Torat bo mangatow Parisi, ei komotahula mangatow kaliut, apa-apa’an manggu wo pindah bayoan i homotahula a tulung i luara, sata na tulung i suanga mawuli-wuling i kinandet bo kasulamohan. ²⁶ Ei tow Parisi ê mbuta, bêrêsipe’ pahamunan na tulung i suang i aho manggu, yana a tulung i luara hahi mêbêrêsi. ²⁷ Silakam komotahula, ei mangatoutêh i Torat bo mangaparisi, ei komotahula mangatow kaliut, apa’an komotahula mêkele wo pakuburan ê sinawuan budo’, ê totu’u pêlilahên bêrêsi, sata’ ê na tulung i suanga mawuli-wuling i nduruhi bo pêbawalinaan i samêh. ²⁸ Kelewa’aho hahi homotahula, a tulung i luar i homotahula pêlilahên ulit a mbêlên i tow, sata’ na tulung i suanga komotahula mawuli-wuling i kahaliutan bo kasukagan. ²⁹ Silakam komotahula, ei mangatoutêh i Torat bo mangatow Parisi, ei komotahula i mangat kaliut, apa-apa’an komotahula tumulid i kubur i manganabi bo mawalo’or i tugu i mangatotumu’ de’dêm ³⁰ bo humua: Sa hamitahula i tumow a nawo-nawo’ i hita, tatu kamitahula hi’i makarua wo silatahula imêlimêd i aho manganabi. ³¹ Sata’ a kelewa’aho komotahula i sumairi a mbatangan i homotahulamio’, awahêm komotahula awahêm suru i tapêlimêd i aho manganabi. ³² Yana, pulingên kahi totoroan i nawo-nawo’ nu ! ³³ Ei komotahula i mangaulah, ei komotahula i suru i nulah dumerehe’! Kelembisandom doro’an homotahula do’na mawalêpot i mbatangan a nu’kuman i naraka? ³⁴ Wa’aho kawalian, pilahên, si Ahu isumiu wehow manganabi, mangatow mosilih bo mangatoutên i Torat: iwarua a tutud i latahula limêdên i homotahula osa salibên i homotahula, ê mbalina da’in i homotahula a mangawale pawaibadatanu osa kulêng i homotahula a kota moho a kota, ³⁵ saniboho homotahula tumanggong i mbua’ i mbeusahan i ndaha’ i tow ahêm sea’ to’tol be si Habel, wa’aho totumu’ ulit, ahad be si Zakharia suru i Berekhnya, ê mbelimêd i homotahula a nêpang i lesad lênas bo mesbah. ³⁶ Si Ahu humua wehom: Kualitana pahasa ia’i tanggongên i pêkarêngan wa’i !” ³⁷ ”Yerusalem, Yerusalem, sihow ê nimêlimêd i manganabi bo matuwi’ bo watu i mangatotumu’ ê mbewasiu wehom! Mêbale-waleng Ahu mabog manêsên i mangawatan’nu, mekele wo atinana i ko’ko manêsên i mangawata’na a ndalêm i kalekebna, sata’ komotahula tia’am. ³⁸ Pilahên ni’ai mbalenu ihaêpa’ange bo maliai. ³⁹ Bo Siahu humua wehom: Tumo’tol ia’i talewe’ komotahula alam kahi mêlilah i Ahu, mahad komotahula humua: Kamangênange Sia ê mahi karêngan ngalan i Tuhan!”