¹ Osa si Yesus mohodait kahi bewangande-Na be silatahula : ² "sakum kaholano'an i Sorga kêpom nêsa holano', ê tumulid pêsaheian i makaweng tanu wata'na. ³ Masiu isa i mangaatana maniang i mangatow ê mbinalu' um mahi a pêsaheian i makaweng wa'aho, sata' ni aho mangatow hi'i maibog mahi. ⁴ Masiu hahi sia i mangaatan walina, sanina: Ihuamange a mangatow wa'aho mbinalu' : Kaulitana pobulahan, sinadiahum, mangasapi tuama bo biagên pahiaha'an belusam; pahasa behasadiam, moaiêm bia'i a pêsaheian i makaweng. ⁵ Sata' mangatow wa'aho mbianalu' hi'i mikaya i sia; bana nimahah a mbondoina, bana nimoho i sumia pongika'ana, ⁶ bo ê mbalina i maniho i aho mangaatana, meda'i i sia, bo mêlimêd i sia. ⁷ Yana monganus ni aho kolano', osa masiu moho i mangaeionga mawaturasi i aho mangatapêlimêd bo manutu i kota i latahula. ⁸ Lumewet ni aho kumua sia a mangaatana: Pêsaheian i makaweng behasadiam, sata' mangatow tale winalu' hi'i mêtêna'an tanu wa'aho. ⁹ Wa'aho kawalian, mohonêm a mangawasulawidan i têmbêran osa balu-unai pahasa tow kasauwan i homotahula woboho moai a pêsaheian i makaweng wa'aho. ¹⁰ Yana moho ni aho mangaata osa panêsênên i latahula pahasa tow kinasauwana a amngatêmbêran, mangatota' pia bo mangatowmaulêng, ahad mawuling i sahei lêsad ni aho pêsaiheiang i makaweng. ¹¹ Sumuangoho no aho kolano' tanu mêtauw bo wa'aho mangasahei, mêlilah sia êsatow ahi'i malatang latang i pweta. ¹² Kumua sia wesia: Ei pog, kelembisa how sumuangoai karêngan hi'i malatang latang i pesta? Sata' ni aho totumu' imêtêwoho. ¹³ Osa kua i aho kolano' a mangaatana: Batungan na'e wo hamana osa owasotoho noaho totumu' a suang i karêdêman ni'itio' ndêndêm, bibohom kaerean i kae' bo kalêkêt i mba'ang. ¹⁴ Apa'an tado'o ê tiniang, sata' toyo' sinisir." ¹⁵ Osa mangaleng ni aho mangatow Parisi; mêkodaitan silatahula kelembisa silatahula do'na sumambei si Yesus teka i nêsa iwêta'anan. ¹⁶ Masiu silatahula i mangamurid i latahula makarua wo mangatow i Herodian tuma'an be Sia: "Guru kailahan i hamitahula, Sihow awahêm êsatow ulit bo karêngan i mulit maturu' i ndalan i Ningumêlêd bo Sihow hi'i matalo we siseiange, apa'an Sihow hi'i matalo we siseiange, apa'an Sihow hi'i mohulu. ¹⁷ Ihuamai wee hamitahula kahêlaman-Nu : Awa wonge'ean mawaer i pajak be si Holano' suma ahi'i ?" ¹⁸ Sata' si Yesus mahailah i kata'pia'an i nate i aho silatahula osa humua: "Nde'aho homotahula mangêpe' i Ahu, ei mangatow kaliut? ¹⁹ Ituru' ai we Ahu ni aho kupang tanu pajak." silatahula mehe êsa dinar be Sia. ²⁰ Yana tuma'an Sia we silatahula : "Gambar bo watih i sei nia'i ?" ²¹ Sowat i latahula : "Gambar bo watih i Kolano' ". Osa kua i Yesus be silatahula : "Iehemange we si Holano' asia ê musti iehe i homotahula a Ningumêlêd." ²² Tumanga' i aho maerang silatahula bo lumolahai we si Yesus osa maleng. ²³ A nêndo wa'aho mahi we si Yesus tatahula tow Saduki, ê mahautêh, awahêm alahêm kabangkitan. Silatahula tuma'an be Sia : ²⁴ "Guru, si Musa ihumua, awahêm sa êsatow mate karêngan ahi'i mêpa'ange hedong, pognga musti humaroang bo wa'ahoo karoanga osa mawatow suru tanu wa'aho pognga. ²⁵ Sata a tutud i hamitahula bana pitu tow mapog. Ê matua kumaroang, sata' hi'i êto' mate. Bo apa'an sia hi'i imahaere suru, ipa'namio' ni aho karoanga tanu wognga. ²⁶ Kelewa' aho hahi ê karuana bo ê kateluna ahad i kawituna. ²⁷ Bo amahad, silatahula pahasa alam, wa'aho mbene hahi mate. ²⁸ Sisei ê nêsa'an biboho a pitutow ê mamoali karoang i aho mbene a nêndo pawatowan? Apa'an pahasa silatahula daket ihumaroang i sia." ²⁹ Si Yesus sumowat silatahula : "Komotahula ureng, apa'an komotahula ahi'i mahawiow i Kitab Suci bo imbahut i Ningumêlêd! ³⁰ Ênde na tepo i pawatowan totumu' hi'i kumaro-haroang bo ahi'i iwawaharoang. Sumata' mênonow kele malaekat a sorga. ³¹ Sata' sakum pawatowan i mangatow i matem awahi'i homotahula imaca asia ê mbehukua i ningumêleêd, a tepo Sia isumani : ³² Siahum Ningumêlêd i Abraham, Ningumêlêd i tow imatem, sumata' Ningumêlêd i tow mênonow." ³³ Mangatow itumanga' i behanganga i sasaniNa. ³⁴ Katanga' anoho i mangatow i Parisi, awahêm si Yesus itumulid i aho mangatow Saduki behaêtêw, sumêsên silatahula. ³⁵ Bo êsatow we silatahula êsa toutêh i Torat tumu'an maindo mangepe' i Sia : ³⁶ "Guru, lala'ut ê mbisa ê nihatud a lalat'ut i Torat?" ³⁷ Sowat i Yesus besia : "Ihalêsange si Tuhan, Ningumêlêdnu, karêngan i tolimomod natenu bo karêngan i tolimomod kanalunu bo karêngan i tolimomod kaênowanu. ³⁸ Wa'ahom ê lalat'ut katudan bo ê kaêsana. ³⁹ Bo lala'ut ê karuana, ê mêkele wo wa'aho, awa'i : Ihalêsange kahelenu totumu' kele batanganumio'. ⁴⁰ Bia'im lala'ut itambe-tambeng kêsan i lala'ut i Torat bo kitab i manganabi." ⁴¹ A noras mangatow Parisi masê-sêsên, si Yesus tuma'an be silatahula, kua-Na: '' ⁴² Asia ê sosowa'nu sakum si Mesias? Suru i seindom Sia?" Kua i latahula we Sia: "Suru i Daud". ⁴³ Kua-Na we silatahula : "Sa helewa'aho, kelembisandom si Daud apa'an tuturu' i Tutuh do'na humua i Sia nawo'na a kakuana: ⁴⁴ Si Tuhan ihumukuam a Nawo'ku dumatuhêm a tulung i kanoal-Ku ahad mangakasaru-Nu iêpa'-Ku a mbawa' i na'e-Nu. ⁴⁵ Yanasa si Daud tumoto i Sia Nawo'na, kelembisa mamoali si Sia suruna hahi?" ⁴⁶ Ahêmai êsatowange mahasipapa isumowat i Sia, osa tu'os a nêndo i aho alam mande êsatow baranei tuma'an awa-awa we Sia.