1
Ihalewetoho nêndo i Sabat, susutêm lumuai nêndo a nêndo karudan duminggu wa’aho, imoho si Maria Magdalena bo si Maria walina, milah i ahi kubur.
2
Yana behamoli mangoawo’ dêpêt apa’an êsatow malaekat i Tuhan a langit de lumolos osa mahi wiboho a mbatu bo mirig i sia osa dumatuh a mbaona.
3
Tokia’na kêpom kilat bo latanga wudo’ kêpom salju.
4
Osa wa’aho mangataphiaha behêleh i talo osa imamoali kêpom mangatow i mate.
5
Sumata’ wa’aho malaekat ihuma wiboho a mangawene: “Na’am komotahula matalo; nde kalahayku homotahula mangilah si Yesus ê wa’aho mbesalib.
6
Alahêm Sia mbia’i, apa’an Sia itumowêm, mekele wo wehua-Nam. Ayom, pilahên lesad bineletan-Na.
7
Osa tilahonêm moho bo ihuamange mangamuri’-Na awahêm Sia itumowêm a tutud i tow i mate. Si Sia imamunam be homotahula imohom a ngGalilea; biboho homotahula mahawilah i Sia. Kuailtana siahu ihumuan be homotahula.”
8
Tilahom silatahula imoho mêpa’io’ i aho kubur, karêngan talo wo karêngan i mbako’ kahi’ bo malolah matiro-tiro’ moho humua i aho a mangamurid i Yesus.
9
Moho’ita’umange si Yesus mêtauw wo silatahula osa ihuma: “Sisiri behow.” Silatahula sumusut i Sia bo tumahuw i na’e-Na osa miniri’ i Sia.
10
Yana kua i Yesus be silatahula: “Na’ matalo. Moho osa ihuamange a mangawog-Ku, saniboho silatahula moho a ngGalilea, bo bibohom silatahula mêlilah i Ahu.”
11
A noras silatahula a tutud i ndalan, mangahi tatahula tow a mangatapahiaha wa’aho a kota osa huma i pahasa wa’aho mbehamoali a mangaiman kapal.
12
Osa ihalawusoho nimohodait bo mangamatu-matu’a, mindo silatahula têpu’un bo mehe roit tado’o wiboho a mangasururaho
13
osa ihumua: “Musti ihua i homotauhla, awahêm mangamuri’-Na imahi wengi osa tumahow i Sia a noras komotahula mebo’-o’owe’’.
14
Bo sa sakum wa’i katanga’an i kapala indo’ong, kamitahula kumua wesia, ahad komotahula ahi’i mahaere likoko wasi-wasia.”
15
Silatahula tumiria i aho ndoit osa kumi’it kele wehua we silatahula. Osa sirita wa’i beharerem a tutud i tow i Yahudi ahadai wa’i.
16
Osa wa’aho sangawulu’ bo êsa murid matang moho a ngGalilea, a dungus beturu’um i Yesus be silatahula.
17
A noras mêlihat i Sia silatahula imoniri’i Sia, sata’ tatahula tow molulu seseng.
18
Si Yesus sumusut be silatahula osa ihumua: “Be Ahu bineanêm pahasa imbahut a Sorga bo a mbaoitoba.
19
Apa’an wa’aho mohonêm, tulidênange pahasa bangsa murid-Ku bo babtisenange silatahula a suang i ngalan i Namang bo Bata’ bo Tutuh Lênas,
20
bo susuianange silatahula kumi’it i nasiamange ê mbewêreta-Hum behow. Osa kalahande, si Ahu maindo malalas be homotauhla ahad i kasapêtan i saman.”