¹ A tepo wa'aho mangahi ni aho mangamurid be si Yesus osa tuma'an: "Sisei ê ni'it bako' a suang i Sorga?" ² Yana si Yesus tumiang êsa hedong kisit osa iwawatutudna we silatahula. ³ Osa thumua: "Ihua Hu wehow, kaulitana sa homotahula ahi'i matobat osa mamoali helewa'i kedong kisit, ahi'i homotahula ihasuang a Kaholano'an i Sorga. ⁴ Saraimbo seseiange ê mawa' i mbatangan osa mamoali helewa'i kedong kisit, sisiam ê ni'it bako' a suang i Kaholano'an i SOrga. ⁵ Bo siseiange sumupah i kedong kisit kelewa'i karêngan i ngalay-Ku, sisia i sumupah i Ahu. ⁶ Sata' seseiange ê mawaureng i nêsa'an bia'i a mangahedong kisit ê maheman be Ahu, lebe maulêng besia sa êsa watu pahilingan isogot a lehedna osa iwawalêbêng a ndalêm i saloyon. ⁷ Ihasalaka mbaoitoba karêngan i pahasa iwapawaurenga: Totu'u pawaureng musti wana, sata' ihasilaka totumu' ê mawawana i aho. ⁸ Sa kamanu suma a'enu mawaureng i how, powotên osa ni aho itia', apa'an lebe maulêng be how sumuang a katowan teka i kama wukoi suma hisol darape' karêngan i lêkêw ndua hama bo rua a'enu irupul a mbaha têlas. ⁹ Bo sa wêlênu mawaureng i how, pêsutên osa itia' ni aho, apa'an lebe maulêng be how sumuang a katowan karêngan i mahawêlên êsa darape' irupul a mbaha i karêngan i mahaêlên dua. ¹⁰ 0Imunên, na' mawa-mawa' êsa'an a mangahedong wa'i. Apa'an si Ahu kumua wehow: Bana malaekat i latahula a sorga ê maindo matotong a tokia' i Namay-Ku ê na sorga. ¹¹ Apa'an Bata' i Totumu' mahi tanu mawawia i mbehatala. ¹² Kelembisa na nutê'ngu? sa mahasawa sangatus ndomba, bo êsa'an be silatahula ihaureng, awa hi'i sia mêpa'io i siow ngawulu' bo siow a pêdungusan osa moho mangilah i aho mbehaureng? ¹³ Bo kumua Ahu wehow: Kaulitana sa sia doro'na humita i sia, lebe wako' kobeatana wiboho a nêsa darape' na siow ngawulu' bo siow ê tahi'i wehaureng. ¹⁴ Kelewa'aho hahi Namangu a Sorga ahi'i mapandung mande êsatowange a mangahedong wa'i ihatala." ¹⁵ Sa oras pogngu mêsea', isu'un sia a nêpa bêlên. Sa sia mahata'an i sasaninu malêngum sia hinaerea. ¹⁶ Sa sia hi'i mahata'an, malimai êsatow suma dua towe', saniboho mi'it a mbesani i ndua suma têlu sairi, wa'aho perkara ahi'i ihalikoko. ¹⁷ Sa sia hi'i maibog mahata'an silatahula ihuam perkarana a njama'at. Bo sa sia hi'i maibog tumanga' i njama'at, pilahênêm sia hele êsatow ê tahi'i mahahilala i Ningumêlêd suma êsatow tapasa'aw i cukai. ¹⁸ Kumua Ahu wehow: Kaulitana asia ê sogotên a mbaoitoba ia'i ihasogot a sorga bo asia ê nilêpo'nu a mbaoitoba ia'i ihalêpot a sorga. ¹⁹ Bo hahi kumua Ahu wehow: Sa ruatow be how a mbaoitoba ia'i mêduluh mangelei awasiamange, wa'aho pangeleiên latahula ponge'ean i Namay-Ku ê na sorga. ²⁰ Apa'an bisana ndua suma têlu tow sumêsên karêngan i ngalay-Ku, biboho Ahu a tutud silatahula." ²¹ Ahad i aho mahi si Petrus osa humua we si Yesus: "Tuhan, motahad mahatahula ahu musti mapung i pogku sa sia mêsea' beahu? Motahad mahawitu? ²² Si Yesus kumua wehow: "Hi'i! Kumua Ahu wehow: "Hi'i motahad mahawitu, sumata' motahad mahawitu ngawulu' bo witu. ²³ Apa'an sakum Kaholano'an i Sorga kelemio' êsa holano' ê mapandung tumulid pêtebean bo mangaatana. ²⁴ A tumo'toloho sia tumulid a aho pêtêbean, bewawasa'angêmai wesia êsatow ê kawênangan sangawulu' ngoribu talenta. ²⁵ Sata' apa'an ni aho totumu' ahi'i mahaelei lumêkêw i mbenanga, wa'aho kolano' mereta saniboho sia gu'unên teka i mbata' bo haroanga bo wahasa sawana maindo bowaer i mbênanga. ²⁶ Yana sumalimbuhu ni aho nata moniri' i sia, kuana: "Eludêype', pahasa bênayku lêkêwêyku. ²⁷ Osa ihali'is nate i aho kolano' i kobêlêsan biboho a nata, a mahad sia imawawêrei osa mawatala i mbenanga. ²⁸ Sata' a lumuaioho ni aho nata' mêtauw sia wo êsa ata walina ê kawênangana sangatus dinar. Tumiho' sia osa lumo'ang i aho karuana, kuana: Baerên mbênangu! ²⁹ Yana kumêpa ni aho karuana, osa mamohong besia; Eludêype', wa'aho mbênangu lêkêwêyku. ³⁰ Sata' itumulud sia osa mawasuang i aho karuana a torunggu mahad i mbelêkêwnam bênanga. ³¹ Mêlilah i aho mangaharuana walina tapemio' osa kumua i pahasa wehamoali a nawo' i latahula. ³² Wa'aho kolano' masiu tumiang i aho totumu' osa humua wesia: Ei ata ta'pia, pahasa wênangu bêtalahum apa'an sihow imamohong i aho weahu. ³³ Awahi' sihow hahi musti mahalês i karuanu kele ahu imahalêsêm i how? ³⁴ Yana imoboro’om ni aho nawo’na osa mehe I sia a tapêmo’ting, mahad sia mawalêkêw I pahasa wênanga. ³⁵ Yana Amay-Ku ê na sorga kumele i aho hahi we homotahula, sa homotahula êsa-êsa hi'i mapung i pogngu karêngan i katalimbatuan i natenu."