¹ Ihalawusoho si Yesus bo wa’aho sasani-Na, matang Sia wiboho a ngGalilea osa iho’amat a sakumên I Yudea ê na tetela’ I londola Yordan. ² Mangatow lumu-lulutange malalas I Sia osa imawawênyaman silatahula wiboho. ³ Yana mangahim mangatow Parisi we Sia maindo mangêpe’ I Sia. Tuma’an silatahula : “Awahêm si Sia ê Ningumêlêd I totumu’ to’ tol a katare itumulid silatahula tuama wo wene? ⁴ Jawab Yesus : " Tidakkah kamu baca, bahwa Ia yang menciptakan manusia sejak semula menjadikan mereka laki-laki dan perempuan? ⁵ Bo kukua-Na: Apa’an wa’aho tuama mêpa’ange i namang bo ninanga osa maêsa wo haroanga, mahad silandua maindo êsahêtêed. ⁶ Kelewa' ahom silandua alanêmoho rua, sumata' êsa. Apa'an wa'aho, asia ê mbewawaêsam i Ningumêlêd, ahi'i ro'na iwawatared i totumu'." ⁷ Kua i latahula we Sia: "Sa helewa'aho, asia kawalian si Musa imêreta mehe surat cere sa tow mawatared i karoanga?" ⁸ Kua i Yesus be si latahula : "Tatawoi i kahêtehan i natenu si Musa imonge'e we homotahula mawatared i karoangu, sata' to'tol ahi'i helewa'aho. ⁹ ata' kumua Ahu wehow : Siseiange mawatared i karoanga, darape' tatawoi i ndêtuh, osa kumaroang bo wene walina, sia imêdêtuh." ¹⁰ Wa'aho mangamurid kumua we Sia: "Sa helewa' aho pêtauwan i makaroangan, lebe maulêeng hi'i haweng." ¹¹ Sumata' Sia kumua we silatahula : "Ahi'i wahawa tow do'na mahawiow i aho, bati' silatahula ê tinutuh. ¹² Bana tow ê tahi'i mata' u humaroang apa'an sia dali' itumow kelewa' aho a sapêrut i ninanga, bo bana tow itumulid i mbatangana helewa'aho tatawoi i pandungamio' apa'an i Kaholano'an i Sorga. Sisei ê ndo'na mahawiow merot sia mahawiow. ¹³ Osa tow malimai i mangahedong kisit be si Yesus, saniboho Sia mao i kama-Na we silatahula osa sumombayang tanu silatahula; sumata' mangamuri'-Na imoboro' i aho mangatow. ¹⁴ Sata si Yesus ihumua: "Iwayaioho niana mangahedong, na'am mapata-watas silatahula mahi we Ahu; nde mangatotumu' kelewa' ahom ê mahasawa i Kaholano'an i Sorga." ¹⁵ Osa Sia mao i kama-Na we silatahula bo ahadiaho matang Sia wiboho. ¹⁶ Bana nêsatow mahi we si Yesus, osa humua: "Guru, tatawoi maulêng awa ê musti towoiêuku saniboho mahaere halowidan?" ¹⁷ Sowat i Yesus: "Nde'aho how tuma'an be Ahu sakum asia ê maulêng? Bati' êsa ê maulêng. Sata' sa how maibog sumuang a maênow, ki'itanêm pahasa wêreta i Ningumêlêd." ¹⁸ Kua i aho tow be Sia: "Pêreta ê mbisa?" Kua i Yesus : "Na' mêlimêd, na' mêdêtuh, na' manahow, na'numu' sairi towo, ¹⁹ Siri' inange namangu wo ninangu bo ihalêsange kahelenu totumu' kele batanganumio'." ²⁰ Kua i aho taletomow we Sia: "Pahasa wa'aho kini' itaykum, asiawee' ê ta' lêkêw?" ²¹ Kua i Yesus besia: "Sa how mapandung mêtolimomod, mohonêm, gu'unên pahasa sawanu osa ni aho iehenum a mangatow lêngei, yana sihow mahaere arta a sorga, ahad i aho moai mahinêm lumas i Ahu." ²² A noras ni aho taletumow mahatanga' i aho kukua, imalêngêm sia karêngan i tape, apa'an tado'i nartana. ²³ Si Yesus kumua a mangamuri'-Na : "Kumua ahu wehow, kaulitana tanêdio' a nêsatow siha' maindo sumuang a Kaholano'an i Sorga. ²⁴ Mahasawe' Ahu humua wehow, lebe wolah nêsa unta sumuang mêbe a mboso i ndarahum ênde nêsa tow siha' sumuang a Kaholano'an i Sorga." ²⁵ A noras mangamurid wa'aho tumanga' i aho, imêdika' io' silatahula osa humua : "Sa helewa'aho, siseiêm ê ndoro'na iwawawia?" ²⁶ Si Yesus tumotong silatahula osa humua : "Tanu a totumu' sakum wa'i ahi'i ro'na, sata' a Ningumêlêed asiamange doro'na." Upag mahalas si Yesus Kristus ²⁷ Osa si Petrus sumowat osa humua we si Yesus: "Kamitahula ê wa'i imêpa' amange i nawasiamange osa mahalas i How; yana awa ê ndo'na haerean i hamitahula?" ²⁸ Kua i Yesus be silatahula : "Siahu humua wehow, kaulitana a noras maleng pêngêdan, sa oras Bata' i Totumu' dumatuh a ndoratuhan i konunga'an-Na, komotahula, ê nilumasêm i Ahu, iharatuh kahi a sangawulu' bo rua bala' i Israel. ²⁹ Bo êsa-êsatow ê napa'an i ngalay-Ku mêpa'ange i mbalena, pognga tuama, suma pognga wene, amanga suma inanga, batawata' suma bondoina, maleng tumirima mahamatus ngalikun bo mahaere halowidan. ³⁰ Sata' tado'o tow ê pahamunan ihamoali a kahadan, bo ê kahadan ihamoali ê nihamuna."