¹ Morus ênêm ngando si Yesus mali si Petrus, si Yakobus bo si Yohanes pognga, osa iwakaru-harua i latahula si Yesus mêtung a nêsa dungusan matatang. Biboho bati' ange silatahula. ² Osa si Yesus tumotalang ambêlên i latahula, tokia'-Na sumulo kêpom nêndo, bo latanga-Nga i mêbudo' tokia'-Na sumulo kêpom nêndo, bo latanga-Nga i mêbudo' mêndaw kêpom keraw. ³ Yana kawilahan i latahula si Musa bo si Elia mohoda-hodait bo si Sia. ⁴ Kua i Petrus be si Yesus: "Tuhan, ime'em kaênowan i hamitahula tumotod bia'i a lesad. Sa how maibog, doro'na todêyku telu dasing, êsa tanu si How, êsa tanu si Musa bo êsa tanu si Elia." ⁵ Bo mohoita' umange a mênunu'pe' sia lumolos kambur ê kumera-herawêm muyung silatahula bo a suang i aho kambur katanga'an nunu' ihumua : " Wa'im Kedong ê nihalêy-Ku, be Siam Ahu mêtêna'an, tanga' anange Sia." ⁶ Mahatanga' i aho bewangahêpa mangamuri'-Na bo silatahula imatalomio'. ⁷ Osa si Yesus mahi we silatahula osa tumikêl silatahula karêngan kumua: "Tumodêm, na' matalo!" ⁸ Osa amatangoai silatahula i kohong, alam silatahula i mêlilah mande êsa tow songad si Yesus i nêsa. ⁹ A noras silatahula lumolos a ndungusan wa'aho, si Yesus sumani we silatahula : "Na' komotahula sumirita i aho pinêlilah be siseiange sa awe' mBata' i Totumu' bewawatow a nêpang i tow imatem." ¹⁰ Osa mangamuri'-Na tuma'an be Sia : "Sa hele wa'aho ndeaho mangatautêh i Torat kumua awahêm si Elia mulit pahamunan mahi ?" ¹¹ Sowat i Yesus : "Totu'u si Elia mahi osa mawawobulig i nasiamange, ¹² bo kumua Ahu wehow : So Elia imahim, sata; mangatow hi'i mahahilala i sia, osa itumulid i sia mi'it i papandungên i latahula. Kelewa' aho hahi Bata' i Totumu' maindo mongigon tatawoi i latahula." ¹³ A tepo wa'aho imahawiowêm mangamurid i Yesus awahêm Sia i sumirita sakum si Yohanes Pambabtis. ¹⁴ A noras si Yesus bo mangmuri'-Na malengemoho wiboho a mangatow, mahi nêsatow tumauw si Yesus bo mamohong, ¹⁵ kuana: "Tuhan ihalêsai mbata'ku. Sisia adosên i mboringongot bo ni'it mahigon. Lê'têh sia iwakasuma' a mbaha bo hahi lê'têh iwakatia' a nahe. ¹⁶ Siahu imalim i sia a mangamuri'-Nu, sata' silatahula ahi'i mahasipapa mawamaulêng i sia." ¹⁷ Yana kua i Yesus: "Ei komotahula pêkarênganan ê tahi'i maheman bo moureng, tahulawe' kaêto'an Ahu mulit mutun a nêpang i homotahula? Pe'angênoai ni aho kedong!" ¹⁸ Karêngan i kêteh si Yesus misu' i sia, osa ni aho setang lumuai wesia osa wa'aho kedong imêmaulêng a norasio wa'aho. ¹⁹ Ahad wa'aho mangamurid i Yesus mahi bo a noras silatahula hêmange wo si Sia, mêta'an silatahula : "Ndeaho hamitahula ahi'i mahasipapa melei i aho setang?" ²⁰ Kumua Sia we silatahula : "Apa'an komtahula kuat kawaheman. Apa'an kele haako'an i mbatuna i mostorange komotahula mahasipapa kumua a ndungusan: Dumeso wia'i moho wiboho, yana ni aho ndungusan dumeso, bo alahêmoho ê ta' hamoali wehow. ²¹ [Kelewa'i ahi'i hasipapa'an ielei kacoli wo sombayang bo mapuasa!] ²² A tepo si Yesus bo mangamuri'-Na makaru-harua a ngGalilea, kumua Sia we silatahula: "Bata' i Totumu' iwawataro a kama i totumu' ²³ bo silatahula lumimêd i Sia osa a kateluna ngando iwawatow Sia." Yana ate i mangamuri'-Na êwa' aho tapemio'. ²⁴ A noras si Yesus bo mangamuri'-Na lusutoho a Kapernaum mahi tapasa'aw i mbea i mBale i Ningumêlêd be si Petrus bo humua; "Awa nggurunu hi'i maer wa'aho mbea dua dirham?" ²⁵ Sowa'na : "Tatu mawaer." Osa sumuangoho si Petrus a mbale, si Yesus mamuna i tata'an : "Asia ê na nutê'ngu, Simon? Be sisei mangaholano' i mbao i toba ia'i mawasa' aw i mbea wo pajak? A towna suma toasing?" ²⁶ Sowat i Petrus : "A toasing!" Yanasa kua i Yesus besia: "Sa helewa' aho towna perei. ²⁷ Sata saniboho hita ahi'i mamoali batu wisudan be silatahula, mohonêm manoton a luah. Osa da' kahamunan katotonanu, taka' an osa wuha'an mba'bana, yana mahaera how doit êpat dirham a suanga. Indon ni aho osa iwaer be silatahula, tanu si Ahu bo hahi tanu sihow."