¹ Ahad wa’aho mahi mangatotumu’ Parisi bo Saduki mapandung mangêpe’ Si Yesus. Silatahula mengalei saniboho Sia mawaturu’ êsaan tanda’ a sorga we silatahula. ² Sata’ sowat I Yesus: “A mbawa’ ando apa’an langit meha’ komotahula humua : Êndo modaraw, ³ bo a mbasindo, apa’an langit meha’ bo leho, komtahula humua: Êndo tuka. Gio I langit kailahan I homotahula silihên sata mangatanda’ I zaman ahi’i. ⁴ Pêkarênganan ê ta’pia wo ahi’i mo’eman êwa’i manutut tanda’ iwalina a tanda’ I nabi Yunus.” Osa si Yesus mêpa’ io silatahula osa matang. ⁵ A noras mangamurid I Yesus tumetele’ i luah, silatahula i molingo me'ang roti. ⁶ Si Yesus kumua we silatahula : "Mahia-iaha bo mahatuh a ragi i totumu' Parisi wo Saduki!" ⁷ Yana silatahula mangutê-ngutêh osa êsatow kumua a balina : "Wa'aho wehua-Na apa'an kita ahi'i ime'ang roti." ⁸ Bo a kailahanoho i Yesus asia ê pohoda-hodaitan i latahula, kumua Sia: "Ndeaho homotahula mohoda-hodait sakum alahêm roti? Ei mangatotumu' ê kaut neman ! ⁹ Awe' kahi homotahula imahawiow? Alam kaimunan i homotahula ê lima roti tanu wa'aho lima ngoribu tow bo tahula watang roti sinêsên i homotahula a mahad? ¹⁰ Suma haho ê pitu roti tanu wa'aho nêpat ngoribu tow bo tahula watang sinêsên i homotahula a mahad? ¹¹ Kelembisa roro'na homotahula ahi'i mahawiow awahêm hi'i roti ê pinanutu'-Ku. Kumua Ahu wehow : Mahatuh i ragi i totumu' Parisi wo Saduki." ¹² A noras wa'aho kawiowaype' moi' i latahula awahêm ahi'i wewanutu'-Na saniboho silatahula mahatuh a ragi i roti, sumata' a sasani i totumu' Parisi wo Saduki. ¹³ Iho' amatoho si Yesus a sakumên i kaisarea Pilipi, tuma'an Sia a mangamuri'-Na : "Kua i tow, sisei ni aho mBata i Totumu?" ¹⁴ Sowat i latahula : "Bana ê kumua : si Yohanes Pembabtis, banamange ê kumua: si Elia bo bana hahi ê kumua si Yermia suma êsa'an tow a moronabi." ¹⁵ Osa si Yesus tuma'an be silatahula : "Sata' asia kuana' siseindom Ahuu wa'i? ¹⁶ Yana sowat i Simon Petrus : "Sihow awahêm si Mesias, Bata' i Ningumêlêd ê mênonow !" ¹⁷ Kua i Yesus besia: "Maênowange how Simon bata' i Yunus ênde tahi' i totumu' ê nimawatara i aho wehow, sumata' Away-Ku ê na sorga. ¹⁸ Osa hahi kumua Ahu wehow: "Sihow awahêm si Petrus osa a mbao ia'i mbatu karang tumod Ahu i jamaatKu osa pawate ahi'i mahasese i sia. ¹⁹ Behow ê mbeay-Ku i kusi'i Kaholano'an i Sorga. Asia sogotênu a mbao i to'ba ia'i ihasogot a sorga bo asia nilêpo'nu a mbao i toba ia'i ihalêpot a sorga." ²⁰ Osa si Yesus dumurang i mangamuri'-Na saniboho na kumua we siseiange awahêm Sia si Mesias. ²¹ Tu'os tepo wa'aho si Yesus tumo'tol mapawatara a mangamuri'-Na awahêm si Sia mulit moho a Yerusalem bo tumonggong tado'o wongigonên a tulung i morotu'a, moroimam kapala bo morotaoutêh i Torat, osa limêdên bo iwawatow a katêluna ngando. ²² Sata' si Petrus kumose si Yesus a mbelit osa merow i Sia, kuana: "Tuhan, merotange Ningumêlêd mawarekang i aho ! Ê wa'aho ahi'i roro'na tumêna i How." ²³ Yana si Yesus sumeleng osa humua we si Petrus: "Kita' tapatena'. Sihow êsa watu wisudan tanu si Ahu, apa'an sihow hi'i mongutên asia ê pahutêhên i Ningumêlêd, sumata' asia pahutêhên i totumu'." ²⁴ Osa si Yesus kumua a mangamuri'-Na : "Êsatow ê maibog kumi'it i ahu, mulit sia sumakal i mbatangana, lumihud i salibna osa kumi'it i Ahu. ²⁵ Apa'an siseiange maibog mawawia i kanaluna, katala'an i kanaluna; sata' seseiange katala'an i kanaluna apa'an si Ahu, sisia mahaere i aho. ²⁶ Asia torona êsatow mahaere kêsan i mbao i toba sata' katala'an i kanaluna? Bo awasia ê ndo'na iehena maindo soal i kanaluna? ²⁷ Apa'an Bata' i Totumu' mahi wo konunga'an i nAmang-Nga pakihitên i mangamalaeka'-Na; a tepo wa'aho mahi Sia malas a nêsa-êsa tow mi'it a tatawoina. ²⁸ Kumua Ahu wehow : Kaulitana a nêpang i tow imahi wia'i bana ê tahi'i mate sa awe' silatahula mêlilah i mBata i Totumu' mahi kele Kolano' a Kaholano'an-Na."