¹ Ê wa’i panutu’un : kaêto nesatow mahaweteng alawe matu’a, mande hisitange ahi’i sia mahisea’an bo êsa tow ata, mande hahi sia awo’ i nasiamange, ² Sumata’ sia a mbawa’i sosaol bo a pahiaha’an mahad anendo tinatum i namanga. ³ Kelewa’aho hahi hita: kaeto kita awe’ matu’a kita hahi talowe’ a manga tutuh i mbaoitoba. ⁴ Sumata’ malekêwoho tepona, Ningumêlêd masiumai i mBata’Na, ê mbewahawata’ i nêsa wene bo talo a lala’ut torat. ⁵ Si Sia bewasiumai mahi matun imanga talo a lala’ut torat, saniboho kita mainjo pêbata’an. ⁶ Osa nde homotahula i mainjow bata’, Ningumêlêd imasiunêmai i Tutuh i mBata’-Na a nate i hita ê nitumiwa’ : “O Abba, o Amang!” ⁷ Yanasa alam kahi homotahula ata, sumata’ bata’, sa homotahula imainjom bata’ komotahula hahi manga-mahaweteng i Ninguêlêd ⁸ Atalewe’ komatahula imahahilala i Ningumêlêd, komotahula mapahiata a manga- ningumêlêd balina. ⁹ Sumata’ Awa’i a maha-hilalamoho homotahula i Ningumêlêd, suma ni’it maulêng, ahad komotahula kinahilala’an i Ningumêlêd, kelembisa ndom komotahula maleng isumomba’i a manga tutuh i mbaoitoba ê kawel bo lengei bo maleng mawawongata i mbatangan be sia? ¹⁰ Komotahula karêngan i masilih mahiaha i manga-êndo tatu, manga-bulan, manga- oras lêtêh bo manga-ta’un. ¹¹ Ihalia-ku ndesa pinoloko-lokohu tanu homotahula i mahuowêm. ¹² Pangeleiêku be homotahula, morowog, mainjomange kele siahu nde siahu hahi imainjom kele homotahula. Awe mahasahu kinêlam êsa ahi’i maulêng be homotahula. ¹³ Kailahan homotahula, si ahu a mahasawe’mio’ isumahaiêm i kukua be homotahula bana mahados a mbatangaku. ¹⁴ Mandewe’ helewa’aho ni’aho mbatangaku, ê nimainjo pongêpe’ be homotahula, sata’ komotahula ahi’i imilah i aho kele imawasokia’ bo mahataha’an, sumata’ komotahula isumupahêm i ahu, kele homotahula isumupah inêsa malaekat i Ningumêlêd, kepohahi kele isumapahio si Kristus Yesus ¹⁵ A tepo wa’aho ime’em kaêna’an i homotahula bo ia’i talewe’ bisanam ni’aho kaêna’anu? Apa-apa’an ahu do’na sumairi i homotahula, sa do’ namange homotahula imêsutêm i mbêlên i homotahula bo i mehem i aho weahu. ¹⁶ Awa karêngan kumua i kaulitan be homotahula imamoalim ahu kasehednu? ¹⁷ Silatahula dêdêmio’ mapongika’an kumose i homotahula, sata ahi’i lo’or nate, nde silatahula mapandung mawa-raig i homotahula, saniboho homotahula dê’dêm malalas be silatahula. ¹⁸ Totu’u maulêng a totumu’ dê’dêm mahika’ malepei i towwalina a manga kamaulêngan, asar a tebe i noras bo ahi’i wati’ iwakaruharua i homotahula. ¹⁹ Ei mangawata’ku apa’an komotahula ahu imapongigon i maleng mahawata, ahad tokia’ i Kristusa ihatara be homotahula. ²⁰ Ime’em tênêmku iwakarua i homotahula ia’i talewe’ bo do’na mekodaitan bo walina, apa’an ahu kinahawuam nutêh masa’ang i homotahula. ²¹ Ihuamoai weahu, ei komotahula i maibog mênonow a mbawa’ i lala’ut Torat, awahi’i homotahula mawa-tanga i lala’ut torat? ²² Awahi’i bana mibewatih, si Abraham mahawata’ dua, êsa a mbene sosiuna bo êsatow a mbene merdeka? ²³ Sumata’ kedong a mbene atana wa’aho bewahawata’ mi’it a kêtêd bo wa’aho kedong bewahawata’ i mbene merdeka apa’an darandi. ²⁴ Awahêm nia’i êsa wangandean. Apa’an wa’aho ndua wene awahêm katatuan i Ningumêlêd : êsa a ndungusan Sinai de mahi osa mahawata’ mangahedong a pangata’an, awa’aho si Hagar. ²⁵ Si Hagar sisiam ndungusan Sinai atana’i nArap- bo sia mêkele wo Yerusalem ia’i talewe’, apa-apa’an sia menonow a pangata’an teka i mangawata’na. ²⁶ Sumata Yerusalem kaumbungan wa’aho mbene merdeka, bo sisia pahinangên i hita. ²⁷ Nde mbana niwati-watih : “Mêkahi’im, ei siwêsêl ê tahi’i mahasa imahawata’! Mobeat bo mosaha-saha’am, ei sihow ê tahii mahasa imahigon mahados mahawata’! Apa’an ê mbepa’io’ i natuamana mainjo ni’it tado’o kedong ênde mahaharoang.” ²⁸ Bo komotahula morowog komotahula mêkele wo si lehak, manga-hedong darandi. ²⁹ Sata’ kele a talewe’, sia mbewahawata’ ni’it i kêtêd imuwah i mbewahawata mi’it i Tutuh, kelewa’aho hahi ia’i talewe’. ³⁰ Sata’asia mbehua i nas a kaol? “Ielei ni’aho nata wene teka wata’na nde mbata’ i nata ahi’i mamoali mahaweteng iwakarua mbata i mbene merdeka” ³¹ Kawalianiaho, morowog, kita ahi’i bata-wata’ inatawene, sumata’ mangawata’ i mbene merdeka.