¹ Ei mangatow i ngGalatia ê mbodoh, siseiêm i nimelowoiem i hamotahula? Awa ahi’i si Yesus Kristus mbehalawat wa’aho behataranemio’ a sa’angênu? ² Bati’ wa’i nihoibogku holahan be homotahula: awa hamotahula imahaerem tutuh apa’an maki’it a la’ut Torat sumaheman a sinahaian i kukua? ³ Awa homotahula kelewa’aho kawodohan? Komotahula itumo’tolêm bo tutuh. Awa ia’i talewe’ komotahula maibog mawasepêt i a’ho a kahêtêdan? ⁴ Awahuow pahasa katadoro’an i’aho kinêlamên i homotahula. Ndeaho mahuow ⁵ Mondo kelembisa ia’i talewe’, awa Sia ê nitumaromai i tutuh karêngan i ka’ayaan be homotahula bo nitumulid mahaunggangan a tutud i homotahula, tumawoi helewa’aho apa’an komotahula maheman a pinasahaian i kukua? ⁶ Kelewa’aho hahi si Abraham i meman be Ningumêlêd osa Ningumêlêd imêteba i aho besia mainjo kaulitan. ⁷ Mondo pêlilahên i homotahula, awahêm silatahula ê menonow i kawaheman, silatahula ni’aho mangawata’ i Abraham ⁸ Bo Kaol, ê pahamunana imahaela, awahêm Ningumêlêd imulit i mangatotumu’ ahi’i Yahudi apa-apa’an kawaheman, behamunan isumahai i kukua be si Abraham: apa’an siho pahasa bangsa mainjo kamang. ⁹ Yanasa silatahula ê menonow a kawaheman, silatahulam ê kamangên mêdororo i Abraham ê wa’aho e maheman. ¹⁰ Apa’an pahasa totumu’ ê mênonow a patawoiên i la’ut torat a mbawa’ i ndororot. Apa’an bana niwati-watih: “Kodorotanange totumu’ ê tahi’i mo’eman maki’it a nasiamange êmbehamatih a kitab la’ut i Torat” ¹¹ Bo alahêm totumu’ beulitan a ndior i Ningumêlêd apa’an maki’it i la’ut Torat awahêm tara, apa’an: Totumu’ ulit mênonow i kawaheman. ¹² Sata sane i la’ut Torat ahi’ kawaheman, sumata’ sisei maki’it i sia, mainjo mênonow apa’an i sia ¹³ Si Kristus itumunduhem i hita a pahasa dororot i la’ut Torat karêngan bo mamoali tutulên i ndororot tatawoi i hita, nde mbana mbehawatih : “Kodorotan totumu’ beratong a kalawat!” ¹⁴ Si Yesus Kristus imêngêledêm ia’i, saniboho be Sia kamang i Abraham motahad a manga-bangsa walina, mahad tatawoi i kawaheman kita tumirima Tutuh ê wa’aho ndali’in berandi. ¹⁵ Morowog, maulênga minjo ahu êsa conto a pênonowan ihita tebe i nêndo êsa darandi ê mbeulitanêm, mande hahi tinulid i totumu, ahi’i ro’na ihelong suma dohongan i seiange. ¹⁶ Sa we si Abraham behua ê pahasa ni’aho pahasa sasani bo a suruna. hi’i we hua “a manga-suruna” keleitu mbewanutu’ a tow tado’o, sumata’ bati’ êsa tow: “ bo a surunu” awa’aho si Kristus. ¹⁷ Panutu’uku êwa’i : Sasani a pahamunan beulitêm i Ningumêlêd ahi’i ro’na ihelong i la’ut Torat, mbehalembo we’mio’ êpat nga-tus bo têlu nga-wulu’ ngata’un lumalas, mahad ni’aho sasani ihatala korowotana. ¹⁸ Kawalian, sa asia tinatu i tumo’tol a la’ut Torat, ahi’i ni’aho itumo’tol a sasani, sumata mulit i mbesanim i Ningumêlêd nihumomba’awaim i mbêlês kohomba’-Na be si Abraham. ¹⁹ Sa helewa’aho, asia panutu’un iaho la’ut torat berohang sia apa-apa’an mangakalawahan- mahad mahi suruna ê pinanutu’ i aho sasani-bo wa’aho bewowalad betoloh a manga malaekat betaro a kama i nêsa toloh. ²⁰ Êsatow mawatoloh ahi’i siawati’ sumaol i nêsa totumu kêmoho, sa Ningumêlêd awahem bati’ êsa ²¹ Sa helewa’aho, awa masaruan ê la’ut Torat bo sasani i Ningumêlêd? Ahi’i hêmohoo. Apa-apa’an sahelemange la’ut Torat behemai do’na mawatow mbatotu’u kaulitan a la’ut Torat sa mahi. ²² Sumata’ kaol ihumurungêm i pahasa a mbawa’ i ko’im bahutan ikaoroan saniboho a kawaheman be si Yesus Kristus wa’aho sasani betaro we silatahula ê maheman. ²³ Apahamunan ni’aho kawaheman imahi, kita a mbawa’ i lala’ut tora, bo kinurung mahad ni’aho kawaheman bewawataram. ²⁴ Kelewa’aho la’ut Torat awahêm mainjo makahat i hita mahat mahi si Kristus, saniboho hita beulitan apa’an kawaheman ²⁵ Ia’i talewe’ ni’aho kawaheman imahim, kawalian i’aho alam kahi hita a mbawa’ pahiaha’an i tapakahat ²⁶ Nde pahasa homotahula imainjom bata-wata’ i Ningumêlêd tatawoi i kawaheman be si Yesus Kristus. ²⁷ Nde pahasa homotahula binaptis be si Kristus, ka-awidêm i Kristus. ²⁸ Asakum wa’i alahêm tow Yahudi suma tow Yunani, alahêm nata suma tow merdeka, alahêm tuama suma bene, apa-apa’an pahasa homotahula êsam a sakum si Kristus Yesus. ²⁹ Bo homotahula totumu’ i Kristus hamotahula hahi suru i Abraham asa doro’na tumirima sasani i Ningumêlêd.