¹ Ahadiaho ihaleotoho sangawulu’ bo êpat nga-ta’un, mohohahi ahu a Yerusalem. Si Barnabas bo si Titus kahi binalihu. ² Moho ahu mi’i’t a nêsa tatara. Osa we silatahula behayasku ninjil ê mbesahaihu a tutud i manga bangsa hi’i Yahudi. Sangapa’ be silatahula ê patoton pasiri’in saniboho na’am alahêm toro ahu mangambut suma imangambutem. ³ Sata’ mandehahi si Titus ê niwakaru-haruahu tow i Yunani, sumata sia ahi’i welese’ sunatên. ⁴ Totu’u bana ndurusu i mangawog tondei ê nisumonawai, awa’aho silatahula ê nitumirih sumuang tanu matas i kawe basan i hita ê sawa i hita a sakum si Kristus Yesus, saniaho teka tutul ên wa’aho doro’na silatahula mongata i hita ⁵ Sata mande wati’ sangaoras ahi’i hamitahula maibog ku mesut bo kumuru we silatahula, saniboho kaulitan i ninjil do’na i haenet be homotahula. ⁶ Bo asakum silatahula ê patoton pasiri’in wa’aho-kelembisa silatahula a pahamunan wa’aho hi’i wênting beahu, apa’an Ningumêlêd ahi’i mapogiwing mandehahi helembisa, silatahula ê posiri’in wa’aho ahi’i mahalêse’ asiamange mbalina we ahu. ⁷ Sata’ saliku’na, kawilahanoho i latahula awahêm be ahu pinercayaan sumahai i kukua tanu mangatotumu’ hi’i sinunat, mêkele wo besi Petrus tanu mamoali Rasul tanu manga totumu’ sinunat, ⁸ Apa’an Sia ê nimehem korowotan be ahu tanu mangatotumu’ ahi’i sinunat. ⁹ Bo mahawilahoho i mbêlês kohomba’ ê mbehomba’-Na we ahu, yanasa si Yakobus, Kepas, bo si Yohanes ê pinapilah kele pênu’ulan i njama’at, mahean i kama wo siahu bo teka si Barnabas mainjo têpai pina’atean, saniboho hamitahula moho a mangatotumu ahi’i suna-sunaten bo silatahula i manga suna-sunaten; ¹⁰ Bati kamitahula musti menet mimun i mangatotumu’ lêngei bo memang wa’aho ê nuliulit ambutêku tawoiên. ¹¹ Sata’ a tepo si Kepas mahi a Anthiokhia, ahi’i ahu manahu sumaru i sia, apa’an sia sea’ ¹² Apa’an a talewe’ pêtahula’an totumu’ a tulung i Yakobus mahi, sia ihuman imedekom bo mangawog ê tahi’i suna-sunaten, sata mahimoho silatahula, imomorus sia bo irumekang be silatahula apa’an matalo i mangawog suna-sunatên. ¹³ Bo mangatotumu’ Yahudi walina hahi imogulud munapik bo sia, ahad si Barnabas kahi kinahosean i kamunapikan ilatahula. ¹⁴ Sata a pelilahêku moho, awahêm gio i latahula wa’aho ahi’i metena’an bo kaulitan i kukua, kumua aho be si Kepas a sasa’angên i pahasa silatahula: “Sa how êsa tow Yahudi, mênonow kele kaper bo ahi’i kele Yahudi kelembisa how do’na melêse’ i mangawog ê tahi’i suna-sunatên tanu menonow kele Yahudi?” ¹⁵ Mi’it a kinatowan hamitahula awahêm tow i Yahudi bo ahi’i tow mahadosa a manga-bangsa walina. ¹⁶ Kailahani hamotahula, ahêm mande êsatow ange ê mbeulitan apa-apa’an i maki’it a la’ut i torat, sata’ bati’ apa’an i kawaheman be si Yesus Kristus. Wa’aho kawalian kamitahula hahi imahemanêm be si Yesus Kristus, saniboho kamitahula beulitan apa’an kawaheman be si Kristus bo ahi’i apa’an matawoi i la’ut i torat. Apa-apa’an : “alahêmai nêsa totumu’ beulitan” apa-apa’an imaki’it a lala’ut i Torat. ¹⁷ Sata’ sa hamitahula mange karêpêt kamitahula mapongugat mainjo ulitan sakum si Kristus mahaturu-turu’ , awahem mangatotumu’ mahasea’, awani’aho do’na ihua, awahem si Kristus tapasali i kaoroan? Mahasa-hasa ahi’i ¹⁸ Apa’an,sa ahu maleng mawatod asia ê mbehuahum mawatara ahu i mbatangaku kele tapalawah i la’ut torat. ¹⁹ apa’an ahu imatêm i lala’ut torat tanu lala’ut saniboho ahu mênonow tanu Ningumêlêt. Siahu behalawatêm teka si Yesus Kristus, ²⁰ Sumata’ ahu mênonow, sata’ alam siahumio’ ê mênonow, sumata si Kristus ê niwênonowhu ia’i talewe’ sakum kahêtêdan, awahêm kawênonow i kawaheman a mBata, i Ningumêlêd ê nimahalêsêm i ahu bo i mehem i mbatangan-Na tanu siahu. ²¹ Ahi’i Ahu tumulud i kamang kohomba’ i Ningumêlêd. Apa’an sahelemange bana kaulitan i la’ut torat, yanasa kuow ê kapate i Kristus.