¹ Moro wogku ê nihalês, na’am meman i pahasa tutuh, sumata’ silehên manga tutuh wa’aho, awa silatahula a Ningumêlêd osa mahi ; apa-apa’an tao’o mangabalian towo ê nimêlêmbom bo imahahêm a lohow i mbaoitoba. ² Kelewa’im kita mahahilala i Tutuh i Ningumêlêd : pahasa tutuh ê mong’e awahêm si Yesus Kristus imahim keletotumu ; a Ningumêlêd osa mahi, ³ bo pahasa tutuh, ê tahi’i monge’e si Yesus, Tutuh wa’aho awahêm tutuh saru i Kristus bo sakum sisia tinanga’am i homotahula, awahêm mainjo mahi bo ia’italewe’ banam na mbaoitoba. ⁴ Komotahula a Ningumêlêd sa moai, bata wata’ku bo komotahula imawa sesem i manga balian towo wa’aho; apa’an Tutuh ê mbana we homotahula, lebe wako’ ênde tutuh a suang i mbaoitoba. ⁵ Silatahula ambaoitoba osa moai, kawalian i’aho silatahula makodait sakum manga kawaoitoba’an bo baoitba mêwê-nanga’ silatahula. ⁶ Kamitahula a Ningumêlêd osamoai : siseiange mahahilala i Ningumêlêd, sisia mêwênanga’ i hamitahula, siseiange tahi’i a Ningumêlêd osa moai, sisia ahi’i mêwê-nanga’ i hamitahula. Êwa’ahom tanda’na Tutuh kaulitan bo tutuh ê mapawa-ureng. ⁷ Moro-wog ê nihalês, mayomêm kita mêbêwêlêsan, nde mbeles wa’aho a Ningumêlêd osa moai ; bo pahasa totumu bo mahahilala i Ningumêlêd. ⁸ Siseiange tahi’i mowêlês, sisia ahi’i mahahilala i Ningumêlêd, nde Ningumêlêd awahêm bêlês. ⁹ A sakumên êwa’im bêlês i Ningumêlêd bewawa-taram a tutud i hita, êwa’aho awahêm Ningumêlêd imasiu i mBata’-Na ê tulong moai a mbaoitoba, sani’ahohita mênonow be Sia. ¹⁰ Êwa’im mbêlês wa’aho : Ahi’i hita ê nimahalêsêm i Ningumêlêd, sumata’ Ningumêlêd ê nimahalêsêm i hita bo ê nimasiumai i mBata’-Na pêsononoian tanu dosa-rosa i hita. ¹¹ Moro-wogku ê nihalês, sa Ningumêlêd itio’ mahalês i hita, yanasa kita hahi mustim mêbêwelêsan. ¹² Alahêm mande êsatow ange ê mahasa inilah i Ningumêlêd. Sa hita mêbêwêlêsan, Ningumêlêd maenet asakumên i hita, bêlês-Na tolimomod asakumên i hita. ¹³ Kelewa’ahom kailahan i hita, awahêm kita maenet bana na sakumên i Ningumêlêd bo si Sia asakumên i hita : Sia ihumomba’am kita mahaêre beteng asakumên i Tutuh-Na. ¹⁴ Bo hita imêlilahêm bo sumairi, awahem Amang imasium i mBata’na mamoali pêmia i mbaoitoba. ¹⁵ Siseiange monge’e, awahêm si Yesus Bata’ i Ningumêlêd, Ningumêlêd maenet a sakumena bo sisia a sakumên i Ningumêlêd. ¹⁶ Kita imahahilalam bo imahemanêm i mbêlês i Ningumêlêd be hita. Ningumêlêd awahêm bêlês, bo siseiange menet a sakumên i mbêlês, sisia maenet a sakumên i Ningumêlêd bo Ningumêlêd a sakumêna. ¹⁷ Asakum êwa’im bêlês i Ningumêlêd tolimomod a sakumên i hita, êwa’aho sahita bana kawaraneian maheman a nêndo pangisa’an, nde mêkele kele si Sia, kita hahi a sakumên i mbaoitoba. ¹⁸ Asakumên i mbêlês alahêm kataloan : bêlês ê tolimomod ; apa-apa’an kataloan bana nu’kuman bo siseiange matalo, sisia ahi’i tolimomod asakumên i mbêlês. ¹⁹ Kita mahalês, apa-apa’an Ningumêlêd pahamunan imahalês i hita. ²⁰ Sa êsatow kumua : “siahu mahalês i Ningumêlêd,” bo sia mare’e i pognga, yanasa sia awahêm tatowon, nde siseiange tahi’i mêngalês i pognga ê pêlilahêna, ahi’i hahi mahalês i Ningumêlêd ê tahi’i kawilahana. ²¹ Bo pêreta wa’i tinirima i hita we Sia : siseiange mahalês i Ningumêlêd, sisia musti hahi mahalês i pognga.