¹ Bo siahu, morowog, a tepo wa’aho ahi’i mata’u mohodait bo homotahula kele wo totumu’ sarani, sata’bati’ bo totumu’ ikawaitoba’an, ê talawe’ dewasa a sakum si Kristus. ² Susu ê mbehehu be how, ahi’i, kakanên kêteh, nde homotahula awe; do’na tumirimaiaho. Bo ia’i talewe’ kahi komotahula awe’ do’na tumirima i aho. ³ Nde homotahula totumu’pe i kawaoitoba’an. Apa’an sa wana na tutud i homotahula bana kanat a nate bo papahisea’an awa ahi’i ni’aho tumuru, awahêm komotahula totumu’ i kawaoitoba’an bo awahêm komotahula menonow mi’it katotumu’an. ⁴ Apa-apa’an sa êsatow kumua : “siahu a ndoro’ i Paulus, bo ê mbalina kumua : “siahu a ndoro’ i Apolos”, awani’aho ahi’i tumuru’ awahêm komotahula totumu’ i kawaoitoba’an bo awe’ sarani? ⁵ Yanasa, awa si Apolos? Awa si Paulus? Manga tapasali si Ngêlêdtow ê tatawoi i homotahula imamoali maheman, êsa-êsa imêbe a tutulên behe i Ngêlêdtow be sia. ⁶ Si ahu nimayu’ si Apolos mato’to, sata’ Ningumêlêd ê mawatow. ⁷ Kawalian i aho ê pênting ahi’i ê nimayu’ suma ê nitu mo’to, sumata’ Ningumêlêd ê nimawatow. ⁸ Maulêng ê nimayu’ suma ê nitumo’to awahêm mêkele ; bo êsa-êsa tumirima lawuna kumi’it bo patawoiênamio’. ⁹ Apa-apa’an komotahula makarua matawoi bo Ningumêlêd ; komotahula awahêm bondoi i Ningumêlêd, bangunan i Ningumêlêd. ¹⁰ Mêtêna’an bo bêlês kohomba’ i Ningumêlêd, ê mbehomba’ beahu, siahu kele êsatow beutêhan a mbangunan ê mahailahio’ itumulidêm pandasi, bo tow malina ê ê menet imomangun a ambaona. Sata êsa-êsa tow musti mawatu’tul, kelembisa sia momangun a mbaona. ¹¹ Apa’an alahêmai mande êsatow ê ndo’na tumulid pandasi walina a pandasi ê mbetulidêm, êwa’aho si Yesus Kristus. ¹² Mane’onah totumu’ momangun a mbao i pondasi mas, pera, batu kelana, kayu, oho wêla bo lêkat, ¹³ mahasa patawoiên i nêsa-êsa tow kawilahan. Apa’an êndo i Ngêlêdtow mawatara i aho, nde sia kawilahan teka baha bo kelembisa patawoiên i nêsa-êsa tow mainjo te’esên i mbaha wa’aho. ¹⁴ Sa patawoiên ê tinod i nêsatow mo’ote’, mahaere sia lawu. ¹⁵ Sa patawoiêna kaeketan imbaha, mainjo sia mahaere karugian, sata’ sisiamio’ mainjo iwawalowid, sata’ kele a suang imbaha. ¹⁶ Awa-ahi’ i hailahan i homotahula, awahêm komotahula awahêm bale i Ningumêlêd bo awahêm Tutuh i Ningumêlêd mututun be homotahula? ¹⁷ Sa wana totumu’ ê mawawotutus i mbale i Ningumêlêd, yanasa Ningumêlêd mainjo mawawotutus i sia. Nde bale i Ningumêlêd awahêm lênas bo bale i Ningumêlêd wa’aho awahêm komotahula. ¹⁸ Na’am bana ê totumu’ mo mandei i mbatangana mio’. Sa wana na tutud i homotahula makatam i mbatangana mahasisilih mi’it i mbaoitoba ia’i iwayai sia mawodoh, sani’aho sia mahasisilih. ¹⁹ Apa-apa’an sisilih i mbaoitoba ia’i awahêm kawodohan tanu Ningumêlêd. Nde bana niwati-watih : “si Sia ê tumiho’ i totumu mahasisilih a kawandeiana. ²⁰ Bo a lesad balina : “si Ngêlêdtow mahailah i manga palitu-litudên i totumu’ mosilih, kaulitana pahasa i aho alahêm toro”. ²¹ Kawalian i aho na’am bana totumu’, ê mawasukag imbatangan a kahele totumu’, nde asia mange awahêm kapunya’anu. ²² Maulêng si Paulus, si Apolos, si Kefas, mauleng baoitoba, mênonow bo mate, maulêng êndo i nia, bo êndo malengai. Pahasa kapunya’an i homotahula. ²³ Sata’ komotahula awahêm punya i Kristus bo si Kristus awahêm punya i Ningumêlêd.