¹ Keleaboho hahi, anoras ahu mahi behow, manga morowog, ahu ahi’i mahi bati’ mohoda-hodait monunga suma ê kaêna’an tanu sumahai bo sumairi i Ningumeled behamotahula. ² Apa’an tinepu’kunemio i tahi’i moho’ tahu awa-awa a tutud i hamotahula, iwalina Yesus Kristus, awa’aho Sia e kinalawat. ³ Siahu hahi imahim behamotahula a ndalem kahawelaiku bo ni’itia matalo bo i hêleh. ⁴ Molai mio a kawakodaitku suma panerewa’anku ahi’i behhuahu i kodait kaenaan a mawaeman, sumata’ me’man i korowotan i tutuh, ⁵ Saniboho kawaheman ihamotahula na’am momelet a korowotan itotumu’, sumata’ a korowotan i Ningumeled. ⁶ Mandewe keleaboho kamitahula sumahai i kaêna’an a pêkombolan i latahula a matu’am, awahem ahi’i korowotan i mbaoi toba i’ai, bo ahi’i korowotan i manga imbahut imbaoi toba i’ai, awahem manga imbahut ê mbeanei. ⁷ Sumata ê isahai ihamitahula awahem koemanan a Ningumeled ê nirururu bo tahula, a talawe baoi toba i’ai bengêlêd, sinadiam i Ningumeled tanu konunga’an ihita. ⁸ Alahêmoho imbahut imbaoitoba i’ai mahahilala isia, awahem sawo i ande-ande mahahilala silatahula, ahi’i silatahula ihumalawat si Tuhan a konunga’ana. ⁹ Sumata kele bewatih : Asia tahi’i pinilha imbelen bo ahi’i tinanga’ italinga, bo ahi’i mahasa i lumembo a suang i nate totumu : pahasa sinadia i Ningumeled. ¹⁰ Apa’an be hita bewawataranêmai i monggonguot i Ningumeled, apa’an tutuh sumolusui asia mange, bo hahi ê manga dumururu a mbatangan i Ningumeled. ¹¹ Sisei sia atutud ihita totumu e mahailaha, asia asuang imbatangan totumu, iwalina tutuh i totumu io a suanga imbatanga? Keleaboho hahi alahem totumu mahailaha, asia asuang i mbatangan i Ningumeled i walina tutuh i Ningumeled. ¹² Ahi’i hita tumirima i tutuh imbaoitba, sumata’ tutuh i Ningumeled, saniboho kailahan i hita, assia be homba i Ningumeled be hita. ¹³ Bo apa’an kamitahula tumapsir perkara sarani be silatahula e mbana tutuh, kamitahula mohoda-hodait asakum manga komba’ i Ningumêlêd e kodait ê tahi’i besusui behamitahula i kaena’an i totumu, sumata asakum i tutuh. ¹⁴ sumata’ tow imbaoi toba ahi’i tumirima asia niaho êna’ tutuh i Ningumêlêd sa moai, apa’an sa sisia pahasa iboho awahem êsa kawodo’han ; bo ahi’i sia mahailah ; aho, apa’an pahasa iboho bati’ do’na silihen ihi’it a sarani. ¹⁵ Sumata’ tow sarani samilih i nasia mange, sumata’ sisia mio ahi’i silihen itow walina. ¹⁶ Apa’an : sisei ndo’na mahailah i kawahuteh i Ningumêlêd, ahad sia do’na misu’i Sia? Sumata’ kamitahula mahasawai pikiran i Kristus.