1
Bo ia’i talewe’, moro-wog, maibog ahu mawaimun be homotahula a kukua ê mbesahaihu behow bo ê tinirima i homotahula, bo ê na suanga komotahula tumod mête-ête’.
2
Apa’an i kukua wa’aho komotahula bewa-wa-wia, asar komotahula mête’ tumaka’ besia, kele ê mbe-sahaihum behow - ihawalina sa homotahula imahu-owêmange mamoali imaheman.
3
Nde ê niit bulian besahaihum behow, êwa’aho asia tinirimahumio, êwa’i awahêm si Kristus imatem tatawoi i manga-orow i hita, mêtênaan bo kaol.
4
Awahêm sia kinuburêm, bo awahêm sia malengêm bewawa-tow a katêluna ngando, mêtêna’an bo Kaol.
5
Awahêm sia imawaturu imbatangan be si Kefas bo ahadiaho a sangawulu’bo rua muri’-Na.
6
Ihaomoho niâho sia imawa-turu’ a lebe a limangatus pog imêdoro, behatado’o be silatuhula ê mênonowe ahadai wai, sumata tahulaan besilatahula imatem.
7
Cawusna sia mawaturu i mbatangan-Na besi yakobus, ahadiaho a pahasa rasul.
8
Osa ê niit kahadan a pahasa si sia imawaturu i mbatangan kahi be ahu, mêkele kedong ê nitumow a talawe tepona.
9
Apaan siahu awahêm ê niitio kênêng a pahasa rasul, donahahi ihua ahii rona patoton rasul, nde ahu nimêdaim i njamaat i Ningumêlêd.
10
Sumata apa-apaan bêlês kohomba ê mbehomba-Na beahu ahii ahêmtoro. Salikuna, siahu imatawoiêm mahawee-wee nde pahas silatahula, sumata ahii siahu, awahêm bêlês kohomba i Ningumêlêd ê mawid-awid i ahu.
11
Apaan i aho, maulêng siahu, suma silatahula, kelewaahom kamitahula imaturu bo kelewa-ahom komotahula imamoali maheman.
12
Janasa, sa kamitahula sumahai, awahêm si Kristus maleng bewawa-tow a tutud i tow imatem, kalembisa donaihamoali bana na tutud i homotahula ê kumua, awahêm alahêm e maleng i tumow a tutud i tow imatem?
13
Sa alahêm maleng tinowan i tutumu imatem, yanasa si Kristus kahi ahii maleng bewawa-tow.
14
Sumata sahele si Kristus ahii maleng bewawa-tow, yanasa alahêm toro ê mbesahai i himatahula bo alahêm toro hahi kawaheman i homotahula.
15
Shalebe wiloho kamitahula behatara imatowo be Ningumêled, apaan a sakum si sia behua i hamitahula, awahêm sia maleng i mawatow si Kristus-kandati sia ahii imaleng mawatow i sia,sa helemange ulit, awahêm totumu imate ahii maleng bewawa-tow.
16
Apaan sa ulit totumu imate ahii maleng bewawa-tow, yanasa si Kristus kahi ahii maleng bewawatow.
17
Bo sa si Kristus ahii maleng bewawa-tow, yanasa alahêm toro kawaheman i homotahula bo komotahula mênonowwe a sakumên i kaoroanu.
18
Kelewaahom kahi motutus-ange manga-totumu ê nimate asakum si Kristus.
19
Sa hita bati a pênonowan wai hahi mawa-haraw be si Kristus, yanasa hita awahêm manga-totumu ê niitio imahuow a morototumu.
20
Sumata ê nulit êwai, awahêm si Kristus maleng bewawatowêm a tutud i tow imatem, kele bu si katara a manga-totumu imatem.
21
Apaan mêkele kele pawate imahi tatawoi i nêsa totumu kelewaaho hahi maleng tinowan i totumu imate imahi tatawoi i nêsatow totumu.
22
Apa-apaan mêkele kele pahasa totumu imate asakum pina-talian bo si Adom kelewaaho hahi pahasa totumu maleng kahi.Kahi iwawa-tow asakum pinatalian bo si Kristus.
23
Sumata êsa-êsa totumu miit a ndêrêtna : si Kristus kele bua katare lumalas biboho silatahula ê mamoali totumu-Na a noras oaian-Na.
24
Ahadiaho mahi kasapêtana, êwa’aho sa sia tumaro i kaholano’an be si Ningumêlêd Amang, ihaworusoho sia imawa-wotutus i manga-pakolanoan, koimbahutan bo korowotan.
25
Apaan sia musti tumaka’ i pakolanoan kele daja mahad Ningumêlêd mêpa’ i pahasa kasehed-Na a mbawa’ i nae-Na.
26
Kasehed ê kahadan, ê mbewawa-wotutus êwa’aho pawate.
27
Apa-apa’an awasiamange be wawa-hêpa-Nam a mbawa i nae-Na. Sumata sa ihua, awahêm “ asiamange bewawa-hêpam” yanasa behataram, awahêm si sia mio ê nimawahêpa i nasiamange a mbawa i nae i Kristus wa’aho ahi’i sumua- suang a sakumêna.
28
Sumata’ sa asiamange bewawahêpam a mbawa’ i Kristus, yanasa si siamio kele Bata mainjo mahawahêpa i mba-tangan-Na a mbawa’ i Sia, ê nimawahêpam i nasiamange a mbawa’-Na, saniaho Ningumêlêd mamoali pahasa a suang i pahasa.
29
Sa tahi’i helewaaho, asiandom torona tatawoi i manga-totumu binaptis tanu tow imate? Sa tow imate ahi’imai maleng bewawatow, ndeaho silatahula maibog babtisên tanu manga-totumu ê nimatem?
30
Bo kamitahula hahi-ndeahondom kamitahula tebe inoras matod i mbatangan i hamitahula a mahasilakaan?
31
Moro-wog, susud i nêndo ahu masa’angan bo pawate. Tanu kobeatanku be motahula a sakumên i Kristus Yesus, Ngêlêd tow i hita, ihuahu, awahêm niai ulit.
32
Sa wati isane a manga-titimbang i totumu kêmoho siahu imangambutêm sumaru i mbiagên ahas a Efesus, asiam ê torona i aho beahu? Sa totumu imatem ahii maleng iwawatow, “yanasa mayom kita luku bo kuman,nde sando hita mate”,
33
Na’am komotahula mombureng : pêkom-bolan ê tapia mawarusah i kanaraman maulêng.
34
Malengêm mobulig mau-maulêng bo mo’nam maleng tumulid kaorowan! B ana na tutud i homotahula ê tahi’i mahahilala i Ningumêlêd. Êwa’aho ihuahu, saniaho homotahula mahahêlam monokia.
35
Sata’ mane’ bana totumu ê tuma’an : “ kelembisandom totumu imatem maleng iwawatow?”
36
Ei totumu bodoh! Asia ê sihowio’ malu-lumbo, ahii mainjo tumow bo mênonow, sa sia hii dali mate a pahamunan.
37
Bo ê nilulumbonu ahi’i londolan i tinanêm ê tumow, sumat’a batuna ê tahêm luabna, kele batuna i mbukeran suma batuna walina.
38
Sumata Ningumêlêd imehe wesia êsa londolana, kele ê papandungên-Na : sia sia imehe a nêsa-êsa batuna londolana mio’
39
Ahi’i pahasa kêtêd mêkele : kêtêd i totumu mêbalina’an a kêtêd mbiagên, mêbalina’an bo kêtêd i melepad, mêbalina’an bo kêtêd i nda’
40
Bana mbatangan i sorga bana mbatangan i mbaoitoba, sumata konunga’an i mbatangan i sorga mêbalina’an bo konunga’an i mbatangan i mbaoitoba.
41
Konunga’an i nêndo mêbalinaan bo konunga’an i mbulan, bo kunungaan i mbulan mêbalinaan bo konunga’an i manga-biatang, bo konunga’an i mbintang êsa mêbalina’an bo konunga’an i mbintang balina.
42
Kelewa’ahom kahi ê maleng tinowan i tow imatem.Belulumbo asakum kotutusan, maleng bewawatow a talahêm-kotutusan.
43
Belulumbo a kahênêngan maleng bewawatow asakum konunga’an. Belulumbo a kahawelan, maleng bewawatow asakum korowotan.
44
Ê mbelulumbo awahêm batangan imbaoitoba, ê maleng bewawatow awahêm batangan i kasaranian. Sa wana mbatangan i mbaoitoba bana hahi mbatangan i kasaranian.
45
Kele bana niwati-watih : “ totumu katare, si Adam imamoali bengêlêd ê mênonow “, sata si Adam ê kahadan imamoali tutuh ê mawa-wênonow.
46
Sata ê pahamunan mahi ahi’i ê kasaranian, sumata kawaoitoba’an, lumalas mahiwe ê kasaranian.
47
Totumu katare sêbu i toba sa mamoali bo maha-hawatangan, totumu karuana a sorga sa mahi.
48
Manga-bengêlêd i kawaoitoba’an mêkele wo si sia ê na sorga sa mahi.
49
Mêkele kele hita imakem inggio ê kawaoitobaan, kelewa’aho hahi hita mainjo make inggio i kasorgaan.
50
Moro-wog, êwaim ê papandungênku i hua we how, êwa’aho awahêm kêtêd bo daha ahii mahaere weteng i sorga a kaholanoan i N ingumêlêd bo awahêm ê motutus ahi’i. mahaere weteng a suang i kaholanoan i Ningumêlêd bo awahêm ê motutus ahii mahaere weteng a nasia ê tahii motutus.
51
Kaulitana ahu kumua wehow êsa rahasia : kita ahii mainjo mate pahasa, sumata pahasa mainjo iwalui.
52
asanga-hundaw, a noras ênu’ i têrumpet kahadan.Apaan têrumpet mainjo numu bo manga-totumu imatem mainjo maleng iwawatow asakum kaadaan ê tahii motutus bo pahasa hita mainjo ihawalui.
53
Apa’an ê ndona motutus wa’i musti make itahi’i matau motutus, bo ê ndo’na mate wai musti make i tahi’i ro’na mate.
54
Bo ihaworusoho ê ndo’na motutus wai make i tahii ro’na motutus bo ê wa’i make i tahi’i ro’na mate, yanasa mainjo malêkêwêm kukua i ngêlêdtow ê niwati-watih : “ pawate tinêpêsêm i kasinggugatan”.
55
Ei pawate bisanawe’ kasinggugatanu? Ei pawate binasam sosehednu?
56
Sosehed i pawate êwa’aho orow bo imbahut i norow ê wa’aho lala’ut Torat.
57
Sata’ dayow be Ningumêlêd, ê nimehem be hita kasinggugatan i Yesus Kristus.
58
Apaan wa’aho, morowogku ê nihalês, tumodêm mêtê-êtê’, naam mobangguang,bo menet dumêdêm asakum patawoiên Ningumêlêd ! Nde kailahan i homotahula, awahêm a patalian bo si ngêlêdtow pinoloko-lokonu ahi’i mahuow.