¹ Pokeiy-Na kasi wia nisea: “Niaku ku lumila’me wia nikoo, eng kaulitna witu e nelet ne tou mineiy wia nyi’i wawean se reiy’ laa mate nu reiy’pe’ sea limoo’ kaa eng Keraja’an ni Empung e mineiy mouw ampit eng kuasa.” ² Enem nga endo kamurian Yesus si minali si Petrus, Yakobus wo si Yohanes wo mewali-wali ampit nisea Sia sumosor witu e nesa kuntung kerakek. Witu nisea i te nuesa. O laa si Yesus e minaseup eng gio witu en sinaru em beren nea, ³ wo em pakean-Na eng kasa puti’ maserengat. Reiy’la siesa tou tu’u wia eng kaoatan i yi’i si mete’u lumoo’ eng kalenona em pakean tanu e ni’itu. ⁴ Takar mapa’ato mouw wia nisea si Elia mewali-wali ampit si Musa, sea nu rua se mesesusuiy ampit si Yesus. ⁵ Pokeiy ni Petrus wia si Yesus: “Rabi, kumura eng ka’aruiyna keiy wia en tampa i yi’i. Le’osouw keiy rumedeiyla telu dasing, nesa i wee Nikoo, nesa i wee si Musa, wo e nesa i wee si Elia.” ⁶ Nisia si limila’ en tuana, karengan si reiy’ mete’u en sapa e lewo’ sa reiy’ i lila’nala, karengan nisea se kasa kineide’an. ⁷ Takar meiy mouw e linaak timerungi nisea wo witu eng gorem e linaak i t’i lininga en suara: “ Yi’i mouw si Oki’ neiy Ku i keupusla, linganola Sia.” ⁸ Wo i kalo’ositi eng katoroan nisea nu limoo’ eng kaledong nea, nisea se reiy’ mouw limoo’ siesa tou tu’u kasi mewali-wali nisea, kacuali si Yesus maesa-esa. ⁹ Witu e nedo nisea nu tumumpami waki kuntung i ti’i, Yesus si minower wia nisea, rio sea te’a mesesusuiyla wia siesa tou tu’u sapa e linoo’ nea mola i ti’i, nu reiy’pe’ si Oki’ ni Tou tumo’ori witu e nelet ne tou minate. ¹⁰ Nisea se timiboiy e nower’ ketare kasuatan minangimpoongla witu e nelet nea sapa neiy i maksudla ampit en “timo’ori witu nelet ne tou minate.” ¹¹ Laa o sea mueiy wia-Nisia: “Ka’a se ahli-ahli Taurat se limila’, kaa si Elia si lewo’ sa reiy’ meiy rerior?” ¹² Wingkot ni Yesus: “Memang si Elia si laa meiy rerior wo mesesegaya’la e reiy’ sa mina’asa wo’o sapa. Ta’an i te, kumura ku’a re’en ampit e neiy i kepatik en tanume si Oki’ ni Tou, kaa Nisia si laa laker peme’itan wo laa sero’an ? ¹³ Ta’an Niaku ku lumila’me wia nikoo: Memang si Elia si mineiy mouw wo se tou se matuanala nisia i ki’it eng kepa’aran nea, minatoroan ampit e wawean neiy i kepatik en tanume nisia.” ¹⁴ Katoroan si Yesus, Petrus, Yakobus wo si Yohanes marengi wia se murid-murid walina, sea lumoo’ se tou kelaker se minuyut wia se murid-murid i ti’i, wo se pirala ahli Taurat se minangimpoongla wo’o sapa ampit nisea. ¹⁵ Witu e nedo se tou kelaker i ti’i nu limoo’ si Yesus, i kenganga mouw sea nu waya wo rumingangar sumungkul Nisia. ¹⁶ Laa o mueiy mouw si Yesus wia nisea: “Sapa em pinewewueiyan niouwla ampit nisea?” ¹⁷ Pokeiy ni esa tou wia se tou kelaker i ti’i: “Guru, si oki’ku i yi’i si nialiku wia-Nikoo, karengan nisia si sinelaran ni roh minowo’la nisia. ¹⁸ Wo susur si roh i ti’i sumeke’ nisia, si roh i ti’i si mewansalela nisia witu en tana’; laa o masewu en sumana, em ba’angna mekare’eket wo e nouwakna en timegher. Niaku ku kimiwee mola wia se murid-murid-Mu, rio sea mure’ si roh i ti’i, ta’an nisea se reiy’ makawoo’.” ¹⁹ Takar pokeiy ni Yesus wia nisea: “Heiy kouw angkatan reiy’ ma’eman, pirape’ eng keurena kasi Niaku ku lewo’ sa reiy’ mena’ witu e nelet miouw?” Pirape’ eng keurena kasi Niaku ku lewo’ sa reiy’ sumabaar wia nikouw?” Alinomi sioki’ i ti’i wia nyi’i!” ²⁰ Laa o alin neami sia wia-Nisia. E nedo si roh i ti’i nu limoo’ si Yesus, sioki’ i ti’i si makarengan i pegho’ogho-gho’ogho’na, wo sioki’ i ti’i si neiy i kewalengkeiy witu en tana’ wo minakede-kedeng, kasuatan en sumana masewu. ²¹ Laa o mueiy si Yesus wia si ama’ ni oki’ i ti’i: “Pira mouw eng keurena sia patoron e nyi’i?” Rengan nisia nu rinteke’. ²² Wo mere’ereghla si roh i ti’i makeong nisia witu eng gorem e napi ka’apa tu’u witu eng gorem en dano kaa laa mepepunengla nisia. Kaa ni’itu sa Koo toro sumiwola sapa, tulungela keiy wo i keupus i tela keiy.” ²³ Wingkot ni Yesus: “Pokeiymu: sa Koo toro? Reiy’la si mustahil wia sitou ma’eman!” ²⁴ Makarengan si ama’ ni oki’ i ti’i rimekeiy: “Niaku ku ma’eman. Tulungenouw niaku nu reiy’ ma’eman i yi’i!” ²⁵ Katoroan si Yesus nu limoo’ se tou kelaker se maka eiy mouw mewewuyut, Sia tumogoor si roh lewo’ i ti’i eng kaente’na, pokeiy-Na: “Heiy koo ee roh simiwola sitou mina wowo’ wo lunteng, Niaku ku merentala nikoo, rumou’ mola wia si oki’ i yi’i wo te’a mouw kasi megheghoremla wia nisia!” ²⁶ Laa o rumou’ mola si roh i ti’i kasuatan marekeiy wo megho’ogho-gho’ogho’ si oki’ i ti’i eng kahebatna. Sioki’ i ti’i si paloo’onokan tanu sitou minate, i ka’ayo kelaker se tou meila’: “Nisia si minate mouw.” ²⁷ Ta’an si Yesus si timiboiy e lawas ni oki’ i ti’i wo mongkela nisia, laa o sia tumo’ori sandiri. ²⁸ Katoroan si Yesus nu waki mouw wale, wo se murid-murid-Na maesa-esa ampit Nisia, o mueiy mouw sea: “Ka’a keiy reiy’ maka woo wia si roh i ti’i ?” ²⁹ Wingkot-Na wia nisea: “En jenis i yi’i si reiy’ i keure’ kacuali ampit en sesombayangen.” ³⁰ Yesus wo se murid-murid-Na se rimou’mi witu wo lumangkoiyi eng Galilea, wo si Yesus si reiy’ pa’ar eng kapualitan i ti’i kakete’uan ne tou; ³¹ karengan Nisia si kasuatan mawee teturu’ se murid-murid-Na. Nisia si limila’la wia nisea: “Si Oki’ ni Tou si laa i sarakan witu e lawas ne tou, wo nisea se laa munu’ Nisia, wo telu nga endo nu reiy’ mouw Nisia nu winunu’ Nisia si laa tumo’or.” ³² Nisea se reiy’ mangarti em patotorla i ti’i, ta’an se meirang mueiyla nyi’a wia-Nisia. ³³ Kamurian ma’ayo mola si Yesus wo se murid-murid-Na waki Kapernaum. Katoroan si Yesus witu mouw em bale, Sia mueiy wia se murid-murid-Na: “Sapa em pesesusuiyen niouw eng ketare wia nuner e lalan?” ³⁴ Ta’an nisea se minenes, karengan wia nuner e lalan ketare nisea se minepe’isingla sa seiy si kasa wangko’ witu e nelet nea. ³⁵ Laa o rumuber si Yesus wo kumeret se mapulu’ o rua murid i ti’i. Pokeiy-Na wia nisea: “Sa siesa tou si pa’ar mamuali kasa ketare, satorona nisia si mamuali mamuri wia em baya nea wo si pelayan wia em baya nea.” ³⁶ Takar si Yesus si minedola siesa oki’ wo tumampala nisia witu nuner nea, laa o Sia rumawak sioki’ i ti’i wo lumila’ wia nisea: ³⁷ “Seiy i te si sumungkul sioki’ tanu si yi’i witu e ngaran-Ku, nisia si simungkul Niaku. Wo seiy i te si simungkul Niaku, reiy’ Niaku ku sinungkulna, ta’an Nisia si timoke Niaku.” ³⁸ Pokeiy ni Yohanes wia si Yesus: “Guru, Nikeiy keiy limoo’ siesa tou reiy‘ maki’i-ki’it nikita minure’ si setang kaa e ngaran-Nu, laa o palouwan neiy sitou i ti’i, karengan nisia si reiy’ maki’i-ki’it nikita.” ³⁹ Ta’an pokeiy ni Yesus: “Te’a kouw maape’ nisia! Karengan reiy’ siesa tou tu’u si timuana mola e mujizat kaa e ngaran-Ku, si toro eng katoroan i te ni’itu kangkasi sia mabut Niaku. ⁴⁰ Seiy i te si reiy’ mesaru nikita, nisia si witu em beteng ta. ⁴¹ Niaku ku lumila’me wia nikoo: Eng kaulitna seiy i te si mee nikoo kumoo’ esa nga ghelas rano eng karengan nikouw nyi’a mouw si maki’i-ki’it si Kristus, nisia si reiy’ laa kaliongan en tetorona.” ⁴² Seiy i te sia si simeipla si meta’asa’an wia se oki-oki’ rintek se ma’eman i yi’i, eng kasa le’os wia nisia sa e nesa watu kilangan ni’i wa’akesla witu e lee’na laa o sia i lobo’la witu eng gorem en tasik. ⁴³ Wo sa e lawasmu en sumeipla nikoo, panggalenouw, karengan eng kasa le’os koo ghumorem witu eng gorem em patou-touan ampit e lawas pekol ta’an i te ampit e rua lawasmu lekep o koo i tea’ witu eng gorem e naraka, witu eng gorem e napi reiy’ kawunu’an; ⁴⁴ [ witu en tampa i ti’i se witekna se reiy’ laa mate, wo napina e reiy’ laa kawunu’an] ⁴⁵ Wo sa e ne’amu en sumeipla nikoo, panggalenouw, karengan eng kasa le’os koo ghumorem witu eng gorem em patou-touan ampit e we’ol, ta’an i te ampit e rua ne’amu lekep o koo i terekla witu eng gorem e naraka; [ ⁴⁶ witu en tampa i ti’i se witekna se reiy’ laa mate, wo napina e reiy’ laa kawunu’an.] ⁴⁷ Wo sa em berennu en sumeipla nikoo, tuilenouw, karengan eng kasa le’os koo ghumorem witu eng gorem eng Keraja’an ni Empung ampit e maka weren esa ta’an i te maka weren rua o koo i terekla witu eng gorem e naraka, ⁴⁸ witu wisa se witek-witek em bangke se reiy’ mate wo napi e reiy’ mate’. ⁴⁹ Karengan susur tou si laa wurasen ampit e napi. ⁵⁰ Wuras memang le’os, ta’an sa e wuras mina tewangouw, ampit en sapa ku’a re’en kouw mewewurasla nyi’a? Satorona kouw reiy’ maena-ena’ makapunyala wuras witu en toumu wo reiy’ maena-ena’ tumou medamean siesa ampit se walina.”