¹ Witu e nedo ni’itu wawean kangkasi se tou kelaker witu se ka’asa’an eng kelakerna, wo karengan nisea se reiy’la kekaanen, Yesus si kimeret se murid-murid-Na wo lumila’: ² “Nate-Ku neiy i kaoghe kaa en tongkoupusen wia se tou kelaker i ti’i. En telu mouw nga endo sea maki’i-ki’it Niaku nisea se reiy’la si kekaanen. ³ Wo sa Kurumeo nisea mareng waki wale nea ampit e narem, nisea se laa i karewa wia lalan, karengan wawean se waki wa’akat o meiy.” ⁴ Murid-murid-Na se miningkot: “Kumura wia en tampa kapenesan i yi’i sitou o toro meela nisea roti i ka’ayo mawesu?” ⁵ Yesus si minueiy wia nisea: “Pira roti em bia nikoo?” Wingkot nea: “Em pitu.” ⁶ Laa o Sia rumeo se tou kelaker i ti’i rumuber witu en tana’. Nu reiy’ mouw i tu Sia medo em pitu roti i ti’i, o tumotor syukur, mengebi-ngebi’la nyi’a wo meela nyi’a wia se murid-murid-Na kaa laa i pemete-metengla, wo nisea se mineela nyi’a wia se tou kelaker. ⁷ Nisea kangkasi se makapunya pirala sera’, wo nu reiy’ mouw en timotorla em berkat witu nyi’a, Sia rumeo rio se sera’ i ti’i kangkasi se i pemete-metengla. ⁸ Wo nisea se kimaan i ka’ayo mina wesu. Kamurian se tou se minerurla eng kakebi’-kakebi’ e roti tele’u, eng kelakerna em pitu wulolong. ⁹ Nisea i ti’i se wo’o wona’ epat nga riwu tou. Laa o reo ni Yesus sea mareng. ¹⁰ Nisia si makarengan simeret witu lodeiy ampit se murid-murid-Na wo tumodome waki daerah Dalmanuta. ¹¹ Laa o modolouw se tou-tou Farisi wo mewewueiyan ampit si Yesus. Kaa mewewa’awa’la Nisia nisea se makiwee wia-Nisia e nesa kowa’ waki sorga. ¹² Takar nguma’angalouw Sia witu nate-Na wo lumila: “Ka’a se angkatan i yi’i se makiwee kowa’? Niaku ku lumila’me wia nikoo, eng kaulitna wia se angkatan i yi’i ma’an mekasa se reiy’ laa weean kowa’.” ¹³ Sia tumele’ula nisea; Sia ghumorem kasi witu e lodeiy wo tumodome waki lewet. ¹⁴ Kamurian kaloo’ala se murid-murid ni Yesus se limiur minaali roti, wawean e nesa i te wia nisea witu lodeiy. ¹⁵ Laa o ngume’enge’la si Yesus wia nisea, pokeiy-Na: “Mategha-teghamouw wo maato-ato mouw witu e ragi ne tou Farisi wo e ragi ni Herodes.” ¹⁶ Takar nisea se meghena-ghenang wo siesa si meila’ wia se walina: “Ni’itu em peila’-Na kaa nikita ta reiy’la si roti.” ¹⁷ Wo eng katoroan si Yesus nu mete’ula sapa em pesesusiyen nea, Sia lumila’: “Ka’a kouw mesesusuiyla eng kapualitan reiy’la si roti? Reiy’pe’ kangkasi ku’a re’en kouw mangartila wo mangarti? Mina kete watu mouw ku’a re’en e natemu? ¹⁸ Nikouw kouw maka weren, reiy’ ku’a re’en kouw maloo’ wo nikouw kouw maka talinga, reiy ku’a re’en kouw malinga? Reiy’ ku’a re’en ghinenang miouw kasi, ¹⁹ Witu e nedo Niaku nu minemete-mete’la e lima roti neiy i wee se lima nga riwu tou i ti’i, pira wulolong wuta eng kaketor-kaketor e roti nierur miouwla?” Wingkot nea: “Mapulu’ o rua wulolong.” ²⁰ “Wo witu e nedo em pitu roti neiy i wee se epat nga riwu tou i ti’i, pira wulolong wuta eng kaketor-kaketor e roti nierur miouwla?” Wingkot nea: “Em pitu wulolong.” ²¹ Laa o pokeiy-Na wia nisea: “Reiy’pe’ ku’a re’en kasi kouw mangarti?” ²² Kamurian ma’ayo mola si Yesus wo se murid-murid-Na waki Betsaida. Witu se tou se minali wia si Yesus siesa tou rapa wo nisea se maaleiy wia-Nisia, rio Sia lumelerla nisia. ²³ Yesus si timiboiy e lawas ni tou rapa i ti’i wo mali nisia rumou’mi witu em banua. Laa o Sia rumura’la witu em beren ni tou i ti’i wo rumeta’la e lawas-Na wia nisia, wo mueiy: “Koo limoo’ mola wo’o sapa?” ²⁴ Sitou i ti’i si limoo’me waki sinaruna, laa o lumila’: “Niaku ku limoo’ tou, karengan limoo’ nisea se mengela-ngelang, ta’an se paloo’ola tanu e nakana-nakana.” ²⁵ Yesus si rimeta’la kasi e lawas-Na witu em beren ni tou i ti’i, takar sitou i ti’i si uli-ulit maloo’ mouw wo minale’osouw, i ka’ayo sia toro lumoo’ e reiy’ sa mina’asa wo’o sapa eng kalenona. ²⁶ Nu reiy’ mouw i tu Yesus si rimeo nisia mareng waki walena wo lumila’: “Te’a megheghorem waki wanua!” ²⁷ Kamurian si Yesus ampit se murid-murid-Na se minea waki wanua-wanua witu eng kaledong Kaesaria Filipi. Witu nuner e lalan Sia mueiy wia se murid-murid-Na, pokeiy-Na: “Pokeiy ne tou, seiy ku’a re’en Niaku i yi’i?” ²⁸ Wingkot nea: “Wawean se meila’la: Yohanes Pembaptis, wawean kangkasi se meila’la: Elia, wawean kangkasi se meila’la: siesa tou wia se pakasa’an nabi.” ²⁹ Sia mueiy wia nisea: “Ta’an sapa em peila’mu, seiy ku’a re’en Niaku i yi’i?” Takar wingkot ni Petrus: “Nikoo mouw koo Mesias!” ³⁰ Laa o kasa pepalouwan ni Yesus sea rio te’a makite’ula wia si seiy i te tu’u en tanume Nisia. ³¹ Kamurian muleiy mouw si Yesus mawee teturu’ wia nisea, kaa si Oki’ ni Tou si lewo’ sa reiy’ mesa’an e laker peme’itan wo i sede’ ne tu’a-tu’a, imam-imam kepala wo ne ahli-ahli Taurat, laa o wunu’un wo tumo’or nu reiy’ mouw en telu nga endo. ³² Eng kapualitan i yi’i neiy i lila’-Na minakaredeiy. Ta’an si Petrus si kimeong si Yesus witu esa nga weka wo tumogor Nisia. ³³ Takar lumenge mouw si Yesus wo kasuatan timu’use se murid-murid-Na Sia kumoupi’ wia si Petrus, pokeiy-Na: “Rumou’la Iblis, karengan nikoo koo reiy’ maghenang sapa em paghenangela ni Empung, ta’an i te sapa em paghenangela ni tou.” ³⁴ O laa si Yesus si kimeret se tou kelaker wo se murid-murid-Na wo lumila’ wia nisea: “Susur tou si pa’ar kumi’it Niaku, nisia si lewo’ sa reiy’ kumelong en touna, mesa’an en salibna wo kumi’it Niaku. ³⁵ Karengan seiy si pa’ar melelawirla e nyawana, nisia si laa kaliongan e nyawana; ta’an seiy i te si kinaliongan e nyawana karengan Niaku wo karengan e Injil, nisia si laa lumawirla nisia. ³⁶ Sapa eng ka’ara’anna sitou minaka’ato e minapekasa eng kaoatan, ta’an nisia si kinaliongan e nyawana. ³⁷ Karengan sapa ku’a re’en en toro i weenala tanu en sawel e nyawana? ³⁸ Karengan seiy i te si meirang kaa Niaku wo kaa em patotor-Ku witu eng keuneran ne angkatan reiy’ lale’ wo se berdosa i yi’i, si Oki’ ni Tou tu’u si laa meirang karengan sitou i ti’i sakawisa Sia meiy ee sangari witu eng kamulia’an ni Ama’-Na, patepe-teperen ne malaikat-malaikat kudus.”