1
Witu e mekasa se esa nga reokan tou Farisi wo se pirala ahli Taurat waki Yerusalem se mineiy matola si Yesus.
2
Nisea se limoo’, kaa se pirala murid-Na se kimaan ampit e lawas najis, nyi’a i ti’i ampit e lawas reiy’ nioasan.
3
Karengan se tou-tou Farisi se tanu se tou Yahudi walina se reiy’ kumaan sa reiy’ tumuanape’la em peranoan e lawas rerior, karengan nisea se timiboiy witu eng kenaramen ne nene moyang nea;
4
wo sa marengi waki pasar nisea kangkasi se reiy’ kumaan sa reiy’ meresipe’la rior en tou nea. Laker e warisan walina kasi en tiniboiyan nea, nulurla eng kapualitan maoas en cawan, kendi wo em pakakas-pakakas tambaga.
5
Kaa ni’itu se tou-tou Farisi wo se ahli-ahli Taurat i ti’i se minueiy wia-Nisia: “Ka’a se murid-murid-Mu se reiy’ matou-tou maki’it eng kenaramen ne nene moyang ta, ta’an se mekaan ampit e lawas najis?”
6
Wingkot-Na wia nisea: “E nulitouw e wenti’ ni Yesaya en tanume nikouw heiy tou-tou munafik! Karengan neiy i kepatik:
Bangsa i yi’i se malo’orla Niaku
ampit en sumpingna,
eng kaulitna e nate nea wa’akat wia-Niaku.
7
Reiy’ si penoron sea meraghes
wia-Niaku,
awesla en teturu’ i paturu’
neala nyi’a mouw em perenta ni tou.
8
Em perenta ni Empung em pinepar miouwla kaa laa metetiboiy witu eng kenaramen ni tou.”
9
Yesus si limila’ kangkasi wia nisea: “Uli-ulit sigha’ kouw simangawekala em perenta ni Empung, rio kouw toro miarala eng kenaramennu nuesa.
10
Karengan si Musa si limila’ mouw: “Ormatenola si ama’mu wo si ina’mu! Wo: Seiy si kumutokla si ama’na ka’apa si ina’na si lewo’ sa reiy’ mate.
11
Ta’an nikouw kouw limila’: Sa siesa tou si lumila’ wia si ama’na ka’apa si ina’na: Sapa e wawean wia niaku, en toro i ka’arala kaa em pepepiara’an nikoo, neiy mouw i ka’arala i wee en tetule – nyi’a i ti’i en sesempean wia si Empung –,
12
takar nikouw kouw reiy’ minayala nisia kasi sumiwo wo’o sapa tu’u i wee si ama’na ka’apa si ina’na.
13
Ampit en tuana e nuwu’ ni Empung e neiy miouw i papaloo’o-loo’ola reiy’ pepaken kaa eng kenaramen paki’iten niouwla i ti’i. Wo kelaker eng kapualitan walina en tanu ni’itu em patuanan niouwla.”
14
Laa o kereten ni Yesus kasi se tou kelaker wo lumila’ wia nisea: “Nikouw nu waya, luminga mouw wia-Niaku wo ghenangenola.
15
Sapa tu’u e waki luar, ghimorem witu eng gorem niesa tou, e reiy’ numajisla nisia, ta’an sapa e rimou’mi wia siesa tou, ni’itu mouw e numajisla nisia.”
16
[ Seiy i te si maka talinga kaa em palinga satorona nisia si luminga!]
17
Nu reiy’ mouw Nisia nu ghimoremla witu e nesa wale kaa laa mesesingkirla wia se tou kelaker, se murid-murid-Na se minueiy wia-Nisia tanume em penoron em peulurela i ti’i.
18
Takar e wingkot-Na: “Sapa ku’a re’en nikouw kangkasi kouw reiy’ mete’u memangartila nyi’a? Reiy’ mete’u ku’a re’en kouw kaa e reiy’ sa mina’asa wo’o sapa waki luar e ghimorem witu eng gorem niesa tou e reiy’ numajisla nisia,
19
karengan e reiy’ ghimorem witu eng gorem e nate ta’an witu eng gorem em po’otna, laa o i tea’ witu eng kakus?” Sa tuana Nisia si minapaloo’o-loo’o mola em baya eng kekaanen halal.
20
Pokeiy-Na kasi: “Sapa e rimou’mi wia siesa tou, ni’itu mouw e numajisla nisia,
21
karengan waki ghorem, waki e nate ni tou, o lumentuti e reiy’ sa mina’asa eng ghenang lewo’, em pesa’amekan, parongkitan, pawunu’an,
22
pazinah’an, eng kasorodoan, kalewo’an, kawilesan, en serit, iri ate, nojat, katingkeiyan, keba’abalan.
23
Em baya eng kapualitan-kapualitan lewo’ i yi’i e limentuti witu eng gorem wo numajisla sitou.”
24
Laa o rumou’mi witu si Yesus wo mea waki daerah Tirus, Sia ghumorem witu e nesa wale wo reiy’ pa’ar sa wawean tou mete’ula nyi’a, ta’an eng kine’e eiy-Na reiy’ mete’u i pekekirongla.
25
Awes tare siesa ina’, si oki’na wewene si sinelaran ni roh lewo’, si makarengan liminga en tanume Nisia, laa o meiy wo i kasungkur witu en sinaru ne’a-Na.
26
Si wewene i ti’i siesa tou Yunani bangsa Siro-Fenisia. Nisia si maaleiy wia si Yesus kaa me’ure’ si setang i ti’i waki si oki’na.
27
Laa o lumila’ mouw si Yesus wia nisia: “I waya mola se oki-oki’ mawesupe’la rior, karengan reiy’ waar medo e roti sinadiala i wee se oki-oki’ wo i lawala nyi’a wia se asu.”
28
Ta’an si wewene i ti’i si miningkot: “E nulit, Tuhan. Ta’an se asu witu rarem e meja kangkasi se kimaan e rema-rema neiy i lenta’la ne oki-oki’.”
29
Takar pokeiy ni Yesus wia si wewene i ti’i: “Karengan em penoto-notorennu i ti’i, mea mouw teakan karengan si setang i ti’i si rimou’ momi wia si oki’mu.”
30
Wewene i ti’i si minareng waki walena, laa o atonnala si oki’ i ti’i si ghimoleiy witu en tetekelan, ta’an si setang i ti’i si rimou’ mouw.
31
Kamurian Yesus si timele’ula kasi en daerah Tirus wo ampit timoro en Sidon minea waki lour Galilea, waki keuneran en daerah Dekapolis.
32
Witu se tou minali wia-Nisia siesa tou lunteng wo si ga’agap wo makiwee wia-Nisia, rio Sia rumeta’la e lawas-Na wia sitou i ti’i.
33
Wo nu reiy’ mouw si Yesus nu tima’atasla nisia wia se tou kelaker, i ka’ayo nisea mokan, Sia ghumoremla en tetudu’-Na witu en talinga ni tou i ti’i, laa o Sia rumura’ wo rumingkap e lila’ ni tou i ti’i.
34
Kamurian eng kasuatan si kima’ate waki langit Yesus si kimeong e nasengan wo lumila’ wia nisia: “Efrata!”, em penoronna: Mawuka’ mola!
35
Takar mawuka’ mola en talinga ni tou i ti’i wo eng katoroan i te ni’itu neiy i kareta’la kangkasi e mina’akes e lila’na, laa o sia matoto-totor eng kale’osna.
36
Yesus si minower wia se tou-tou witu rio te’a mesesusuiyla nyi’a wia si seiy i te tu’u kangkasi. Ta’an pakapalouwan-Na sea, makapelasla sea maabarla nyi’a.
37
Nisea se ma’erang wo neiy i kenganga wo lumila’: “Nisia si simiwola em baya-wayana le’os, si lunteng si siniwo-Na malinga, si wowo’ si siniwo-Na matoto-totor.”