¹ Laa o i ka’ayo mola sea waki lewet e lour, waki daerah ne tou Gerasa. ² Tare mouw i te si Yesus nu tumumpami witu lodeiy o meiy mouw siesa tou sinelaran ni roh lewo’ waki pakuburan meiy mato Nisia. ³ Sitou i ti’i si maena’ maname wo reiy’ siesa tou tu’u si pa’ar ma’akes nisia, ma’anouw tu’u ampit e rante, ⁴ karengan e re’ereghouw sia patorongkun wo peranten ta’an e rante em perangkutenna i te wo en torongkuna em pare’inna i tela, i ka’ayo reiy’la siesa tou tu’u si awes eng keter kaa menenaramla nisia. ⁵ Oat o wengi si memoya-moya waki pakuburan wo waki kuntung-kuntung ampit mereke-rekeiy wo mawewe en touna ampit em batu. ⁶ Katoroan sia nu limoo’ si Yesus waki wa’akat, tumingkasouw sia meiy matola-Nisia laa o sumempe-Nisia, ⁷ wo eng kaente’ sia rimekeiy: “Sapa e nurusan-Nu ampit niaku, heiy Yesus, Oki’ ni Empung Si Kasarakek? Demi si Empung, te’a pesesiasan niaku!” ⁸ Karengan nu reiy’pe’ nyi’a Yesus si limila’la wia nisia: “Heiy koo ee roh lewo’! Rumou’la wia sitou i yi’i!” ⁹ Kamurian Sia mueiy wia sitou i ti’i: “Sapa ngarannu?” Wingkotna: “Ngaranku Legion, karengan keiy kelaker.” ¹⁰ Nisia si kasa makiwee rio si Yesus te’a me’ure’ se roh-roh i ti’i rumou’ waki daerah i ti’i. ¹¹ Wawean maname waki lembe eng kuntung se ka’asa’an se tieiy kasuatan masero kumaan, ¹² laa se roh-roh i ti’i se kimiwee wia-Nisia, pokeiy nea: “Reo mouw keiy sumoro’ witu eng gorem ne tieiy-tieiy i ti’i, i wayamola keiy ghumoremla wia nisea!” ¹³ Yesus si lime’ele’la em pengiween nea. Laa o rumou’ mouw se roh-roh lewo’ i ti’i wo ghumoremla wia se tieiy-tieiy i ti’i. Se kawang ne tieiy se wo’o wona rua nga riwu eng kelaker nea i ti’i se timumpele’ witu en tebir en temping witu eng gorem e lour wo mate mina le’emes witu eng gorem e lour. ¹⁴ Takar tumingkasouw se tumetayur-tumetayur ne tieiy i ti’i wo mesesusuiyla eng kapualitan i ti’i waki kota wo waki wanua-wanua kaledongna. Laa o rumou’mi se tou kaa meiy meleloo’ sapa e minamuali. ¹⁵ Nisea se mineiy wia si Yesus wo limoo’ sitou sinelaran i ti’i si rimuber, limabungouw wo wena’asouw, sitou eng ketare si sinelaran ni legion i ti’i. Takar meide’ mouw sea. ¹⁶ Se tou-tou se limoo’ mouw sandiri eng kapualitan i ti’i se simusuiyla wia nisea tanume en sapa e minamuali mola wia sitou sinelaran ni setang i ti’i, wo en tanume se tieiy-tieiy i ti’i. ¹⁷ Laa o sea malupu si Yesus rio sia tumele’ula en daerah nea. ¹⁸ Witu eng katoroan si Yesus nu sumeret kasi witu eng gorem e lodeiy, sitou eng ketarena sinelaran ni setang i ti’i si kimiwee, rio sia eneala rumapit Nisia. ¹⁹ Yesus si reiy’ minenela nisia, ta’an Nisia si limila’ wia sitou i ti’i: “Marengouw waki walemu, wia se tou-tou esa nga wanuamu, wo pakite’u mola wia nisea e reiy’ sa mina’asa wo’o sapa en siniwo mola ni Tuhan wia nikoo wo kumura Nisia nu mineupusola nikoo!” ²⁰ Sitou i ti’i tu’u mea wo muleiy maabarla waki daerah Dekapolis e reiy’ sa mina’asa sapa en siniwo mola ni Yesus witu en touna wo nisea nu waya se mina’erang. ²¹ Yesus nu limewetomi kasi ampit e lodeiy, se tou kelaker se mareo-reokan mineiy laa o muyutla wia Nisia. Kasuatan Nisia nu witu li’ilik e lour, ²² meiy mouw siesa tou si kepala wale ibadat mekengaran Yairus. Katoroan nisia nu limoo’ si Yesus, i kasungkurouw sia witu en sinaru ne’a-Na ²³ wo kasa makiwee wia-Nisia: “Si oki’ku wewene si rara’an, ta’arouw mate, meiy mouw satorona wo i reta’ mola e lawas-Mu wia nisia, rio sia melawir wo tumoukan.” ²⁴ Laa o mea mouw si Yesus ampit sitou i ti’i. Tou kelaker se mareo-reokan maki’i-ki’it Nisia wo se mineimpesekan witu en tawi-Na ²⁵ Wawean witu siesa wewene si mapulu’ o rua mouw nge te’un eng keurena peme’itan em peraa’an. ²⁶ Nisia si pinenou-noupouw pinaelotla ne reiy’ sa mina’asa mengelot, i ka’ayo kina’apuna mola em baya-waya wia nisia, ta’an eng kasa reiy’la penoronna awes tare e minurikit minakawurukla. ²⁷ Nisia si liminga mouw e naba-abar tanume si Yesus, takar witu eng keuneran ne tou kelaker i ti’i sia tumawila si Yesus wia muri wo lumelerla eng karaiy-Na. ²⁸ Karengan em pokeiyna: “Asal ku limelerola eng karaiy-Na, niaku ku laa male’os.” ²⁹ Rengan i te e ni’itu kangkasi minena’ mouw em peraa’anna wo sia medam, kaa e neuwakna le’osouw witu rumarana. ³⁰ Witu i te en toro ni’itu kangkasi Yesus si minete’ula, kaa wawean eng keter rimou’mi witu en touna, laa o Sia lumengeme waki se tou kelaker wo mueiy: “Seiy si limelerla eng karaiy-Ku?” ³¹ Se murid-murid-Na se miningkot: “Nikoo koo limoo’ mouw kumura se tou-tou i yi’i se mesese’ese’an witu e reten-Nu, wo Nikoo koo mawueiy: Seiy si limelerla Niaku?” ³² Laa o Sia lumoo’me eng kaledong-Na kaa meleloo’ seiy si timuana mola eng kapualitan i ti’i. ³³ Si wewene i ti’i, si mineide’ wo matenggo’ogho’ katoroan mamete’ula sapa e minamuali mola witu en touna, sia mapa’ato wo i kasungkur witu en sinaru ni Yesus wo ampit en tulus makite’ula e reiy’ sa mina’asa wo’o sapa wia-Nisia. ³⁴ Takar pokeiy-Na wia si wewene i ti’i: “Heiy oki’-Ku, imanmu e limawirola nikoo. Mea mouw ampit eng kelawiran wo male’osouw witu e rumaramu!” ³⁵ Katoroan si Yesus nu masusuiye’ meiy mouw siesa tou wia se me’urang ni kapala wale ibadat i ti’i wo lumila’: “Si oki’mu si minate mouw, sapape’ kasi em pemandungenna koo menusa-nusa mokan si Guru?” ³⁶ Ta’an si Yesus si reiy’ minadungla em peila’ neala wo lumila’ wia si kapala wale ibadat: “Te’a meide’, ma’emanola!” ³⁷ O laa si Yesus si reiy’ mineela siesa tou tu’u kumi’it mewali-wali, kacuali si Petrus, Yakobus wo si Yohanes, patuari ni Yakobus. ³⁸ Sea i ka’ayome waki wale ni kepala wale ibadat, wo maname linoo’-Na se tou-tou marungkea’, maame’, wo ma’arip eng kaente’. ³⁹ Nu reiy’ mouw Nisia nu ghimoremla Sia lumila’ wia se tou-tou i ti’i: “Ka’a kouw marungkea’ wo maame’? Si oki’ i yi’i si reiy’ minate, ta’an si timekel!” ⁴⁰ Ta’an nisea se kime’eke’ i tela Nisia.Takar neiy i ure’-Na em baya se tou i ti’i, laa o alin-Na si ama’ wo si ina’ ni oki’ i ti’i wo sea mewali-wali ampit Nisia ghumorem witu eng kamar ni oki’ i ti’i. ⁴¹ Laa o tiboiyan-Na e lawas ni oki’ i ti’i, pokeiy-Na: “Talitakum,” em penoronna: “Heiy oki’, Niaku ku lumila’me wia nikoo, tumo’orouw!” ⁴² Eng katoroan i te e ni’itu kangkasi si oki’ i ti’i si timo’or rumedeiy wo kumelang, karengan e numurna mapulu’ o rua mouw ngete’un. Em baya se tou witu se kasa ma’erang. ⁴³ Ampit eng kasa ulit Nisia si minower wia nisea, rio te’a siesa tou tu’u mete’ula eng kapualitan i ti’i, laa o Sia rumeo nisea meela si oki’ i ti’i kumaan.