¹ Witu e mekasa Yesus si muleiy mouw kasi mawee teturu’ witu li’ilik e lour. Takar meiy mouw se tou kelaker se ka’asa’an eng kelakerna se minuyutla Nisia, i ka’ayo Sia sumeret witu e nesa lodeiy kasuatan simuwa’ laa o rumuber witu, kasuatan em baya ne tou kelaker i ti’i se witu eng ketana’an, witu li’ilik e lour i ti’i. ² Wo Nisia si mineela teturu’ kelaker kapualitan witu em peulurela wia nisea. Witu en teturu’-Na i ti’i Nisia si limila’ wia nisea: ³ “Linganouw! Wawean siesa tou mememu’uwur si rimou’mi kaa laa mewewu’uwur. ⁴ Witu e nedo nisia nu mawu’uwur esa nga weteng koloko i ti’i limenta’ witu li’ilik e lalan, laa o meiy mouw se wara o kumaan nyi’a i ka’ayo mina’apu. ⁵ Esa nga weteng e limenta’ witu en tana’ wewatun, reiy’ laker en tana’na, laa em bibit i ti’i tu’u e makarengan timou, karengan en tana’na e napis. ⁶ Ta’an sia nu rimetikouw siendo, minawelesouw sia wo minapera karengan e reiy’ kimalat. ⁷ Esa nga weteng kasi e limenta’ witu eng kongkom tetunean, laa o makasela mouw eng kongkom i ti’i wo kumimpit nyi’a i ka’ayo minate i ka’ayo sia reiy’ minee wu’ana . ⁸ Wo esa nga weteng e limenta’ witu en tana’ le’os, sia tumou eng kasoborna wo mee wu’ana, wua’na wawean e limepet maka telu nga pulu’ wawean e limepet maka enem nga pulu’, wawean e limepet maka esa nga atus.” ⁹ Wo pokeiy-Na: “Seiy si makapunya en talinga palinga, satorona nisia si luminga!” ¹⁰ Katoroan Nisia nu ma’esa-esa, se maki’i-ki’it-Nisia wo se mapulu o rua murid i ti’i se mawueiyla wia Nisia tanume em peulurela i ti’i. ¹¹ Wingkot-Na: “Wia nikoo neiy mouw i weela em pengiro-ngirong eng Keraja’an ni Empung, ta’an wia se tou walina e reiy’. sa mina’asa wo’o sapa neiy i pa’ayola witu em peulurela, ¹² rio : Ma’anouw tu’u limoo’, nisea se reiy’ limoo’ makale’os, ma’anouw tu’u liminga, nisea se reiy’ mangarti, rio te’a sea murikiti wo maka’ato ampung.” ¹³ Laa o Sia lumila’ wia nisea: “Reiy’ ku’a re’en pangartian niouw em peulurela i yi’i? Sa tuana kumura kouw toro mamete’ula em baya em peulurela walina? ¹⁴ Si mememu’uwur i ti’i si mawu’uwurla e nuwu’. ¹⁵ Se tou-tou witu li’ilik e lalan, en tampa e nuwu’ i ti’i neiy i wu’uwurla, nyi’a mouw nisea se melelinga e nuwu’, laa o meiy mouw si Iblis wo medo e nuwu’ en tare mouw i te i wu’uwurla witu nisea. ¹⁶ Tuanakan kangkasi neiy i wu’uwurla witu en tana’ wewatun, nyi’a mouw se tou-tou liminga e nuwu’ i ti’i wo makarengan minedola nyi’a ampit e mepa’a-pa’ar, ¹⁷ ta’an nisea se reiy’ kimalat wo se timaang i tela reiy’ ure. Sakawisa eng kamurian tu meiy em palotoiyan ka’apa em pasiasa’an karengan e nuwu i ti’i, nisea se makarengan mina murtad. ¹⁸ Wo e walina nyi’a mouw neiy i wu’uwurla witu nuner eng kongkom tetunean, ni’itu mouw se liminga e nuwu’ i ti’i, ¹⁹ o laa eng kalieiyan eng kaoatan i yi’i wo em biles eng kekaya’an wo eng kepa’a-pa’aran-kepa’a-pa’aran witu eng kapualitan walina ghimorem o kumopit e nuwu’ i ti’i i ka’ayo reiy’ minee wu’ana. ²⁰ Wo mamuri neiy i wu’uwurla witu en tana’ le’os, nisea mouw se tou liminga wo simungkul e nuwu’ i ti’i laa o mee wu’ana, wawean e limepet minaka telu nga pulu’, wawean e limepet minaka enem nga pulu’, wo wawean e limepet minaka esa nga atus.” ²¹ O laa si Yesus lumila’ wia nisea: “Sitou maali-ali em solo reiy’ o rio i reta’la witu rarem e wantang ka’apa witu rarem en tetekelan, ta’an i te rio i weela witu natas ne’ana en solo. ²² Karengan reiy’la wo’o sapa neiy i kakirong e reiy’ laa i papa’atola, wo reiy’la wo’o sapa em pengiro-ngirong o reiy’ laa i kawuka’. ²³ Seiy i te si makapunya talinga kaa em palinga, satorona nisia si luminga!” ²⁴ Laa o Sia lumila’ kasi: “Weeanola ghenang sapa e lininga miouw! E nukuran pinake miouw kaa meukur, e laa i ukurla wia nikoo wo mewali-wali ampit e ni’itu e laa i awesla kasi wia nikoo. ²⁵ Karengan seiy si makapunya, wia nisia e laa i weela, ta’an seiy si reiy’ makapunya, sapa i te tu’u kangkasi em bia nisia e laa edoni wia nisia.” ²⁶ Laa o pokeiy ni Yesus: “Teinti’i mouw eng kapualitan eng Keraja’an ni Empung i ti’i: e nulur sitou minu’uwurla em bibit witu en tana’, ²⁷ o laa witu e nendo wengi sia tumekel wo witu nendo oat sia tumo’or, wo em bibit i ti’i minee mouw suru wo en suru i ti’i mekerakekouw, kumura eng kinesesuruna reiy’ kete’uan ni tou i ti’i. ²⁸ Em tana' mouw nuesa e maweemi wu’ana, ketare-tare en tolena, laa e wulisna, kamurian e wu’ana-wu’ana wesu witu e wulisna i ti’i. ²⁹ Sakawisa e wu’ana i ti’i e nawesouw eng kawowosna, sitou i ti’i si makarengan sumampur, karengan e noras meupu’ em bia mouw.” ³⁰ Pokeiy-Na kasi: “Ampit en sapa ta mesesuatla eng Keraja’an ni Empung i ti’i, ka’apa ampit em peulurela wisa ku’a re’en satorona ta gumambarla nyi’a? ³¹ Kapualitan eng Keraja’an i ti’i nulur e watuna en sesawi neiy i wu’uwurla witu en tana’. Maan e watuna i ti’i eng kasa rintek witu e reiy’ sa mina’asa jenis em bibit wia em bumi. ³² Ta’an sakawisa sia i wu’uwurla, sia si tumou wo mamuali sumelala ta’an e reiy’ sa mina’asa raaren walina wo mineela pangana-pangana sela, i ka’ayo se burung-burung wia natas se toro sumala witu en tinerunganna.” ³³ Witu eng kelaker peulurela tanu ni’itu Nisia si maabarla e nuwu’ wia nisea minatoroan ampit em pangartian nea, ³⁴ wo sa reiy’la em peulurela Nisia si reiy’ mengila-ngila’ wia nisea, ta’an wia se murid-murid-Na Nisia si minitarla e reiy’ sa mina’asa wo’o sapa witu eng kenaramen neiy i ketampas. ³⁵ Witu e nendo ni’itu, e nendo mawengindo mouw, Yesus si limila’la wia nisea: “Meiy mouw ta tumodome waki lewet.” ³⁶ Sea tumele’ula se tou kelaker i ti’i laa o tumodome wo mali si Yesus mewali-wali ampit nisea witu e lodeiy wisa si Yesus rimuberouw wo e lodeiy-lodeiy walina kangkasi e rimapitla Nisia. ³⁷ Laa o rumangu mouw e reghes tumokol eng kasa ente’ wo em balolongan en simerewok ghimorem witu eng gorem e lodeiy, i ka’ayo e lodeiy i ti’i muleiy mouw mawuta rano. ³⁸ Witu en toro ni’itu Yesus si timekel witu muri lodeiy witu e nesa na’ali’. Takar se murid-murid-Na se minongkela Nisia wo lumila’ wia-Nisia: “Guru, Nikoo koo reiy’ mepadung sa kita mapuneng?” ³⁹ Sia tu’u tumo’or, o rumekak e reghes i ti’i wo lumila’ wia si lour i ti’i: “Makapenes, Mena’ mola!” Laa e reghes i ti’i e minompas wo e lour i ti’i eng kasa minalompon. ⁴⁰ Laa o Sia lumila’ wia nisea: “Ka’a kouw meide’ tuana? Ka’a ku’a re’en kouw reiy’ ma’eman?” ⁴¹ Nisea se kasa mineide’ wo lumila’ siesa wia se walina: “Seiy mouw ee pasil sitou i yi’i, i ka’ayo e reghes wo e lour e lale’ wia-Nisia?”