¹ Kamurian si Yesus si ghimorem kasi witu e wale pa untepan. Witu wawean siesa tou minate mouw e nesa lawasna. ² Nisea se menegha-negha’ si Yesus, kaa wo’o wona’ lume’osla sitou i ti’i witu e nendo Sabat, rio sea toro manginselokla Nisia. ³ Pokeiy ni Yesus wia sitou minate mouw e nesa lawasna i ti’i: “Meiy, rumedeiy mouw witu nuner!” ⁴ Kamurian pokeiy-Na wia nisea: “Wisa ku’a re’en en toro i te siwon ta' witu e nendo Sabat, sumiwo le’os ka’apa sumiwo lewo’, lumawirla e nyawa ni tou ka’apa munu’ sitou?” Ta’an nisea i ti’i se minakapenes i te. ⁵ Nisia si ma’arip karengan eng kaketekokongan nea wo ampit e nupi’ Sia tumu’use eng kaledong-Na wia nisea laa o Sia lumila’ wia sitou i ti’i: “I yayatola e lawasmu!” Wo i yayatnala, takar le’osouw e lawasna i ti’i. ⁶ Laa o rumou’ mouw se tou Farisi wo se makarengan minaesa’an ampit se tou-tou Herodian kaa laa mewewunu’ Nisia. ⁷ Kamurian si Yesus ampit se murid-murid-Na sumingkir waki lour, wo kelaker tou waki Galilea se mengi’iti-Nisia. O kangkasi se waki Yudea, ⁸ waki Yerusalem, waki Idumea, waki lewet e Yordan, wo se waki daerah Tirus wo en Sidon se ka’asa’an se tou mineiy wia–Nisia, nisea nu liminga mola e reiy’ sa mina’asa en tinuana-Nala. ⁹ Sia rumeo se murid-murid-Na sumadiala esa lodeiy i wee-Nisia karengan se tou kelaker i ti’i, rio sea te’a i ka’ayo rumansak-Nisia. ¹⁰ Karengan Nisia si lime’osla kelaker tou, i ka’ayo em baya se peme’itan rumara se mesese’ese’an wia-Nisia kaa melelelerla-Nisia. ¹¹ Sakawisa se roh-roh lewo’ lumoo’ Nisia, sea nu mapawewe kumurur witu en sinaru-Na wo sea rumekeiy: “Nikoo mouw koo Oki’ ni Empung.” ¹² Ta’an Nisia si kasa kete mepalouw nisea sa makite’ula seiy Sia. ¹³ Kamurian sumosorouw si Yesus witu natas eng kuntung. Sia kumeret se tou-tou neiy i kepa’ar-Na wo sea tu’u meiy wia-Nisia. ¹⁴ Nisia si timantula se mapulu’ o rua tou kaa laa rumapit Nisia kaa laa i petetoke-Na ma’abarla e Injil ¹⁵ wo wineean-Na kuasa kaa laa me’ure’la se setang. ¹⁶ Se mapulu’ o rua tou neiy i tantu-Na i ti’i nyi’a mouw: Si Simon, si wineean-Na ngaran Petrus, ¹⁷ si Yakobus oki’ ni Zebedeus wo si Yohanes patuari ni Yakobus sea nu rua se wineean-Na ngaran Boanerges, e makapenoron se oki-oki’ e lenter, ¹⁸ todongla nyi’a si Andreas, si Filipus, si Bartolomeus, si Matius, si Tomas, si Yakobus oki’ ni Alfeus, si Tadeus, si Simon tou Zelot, ¹⁹ wo si Yudas Iskariot, si khimianatla Nisia. ²⁰ Kamurian si Yesus si ghimorem witu e nesa wale. Takar meiy mouw se tou kelaker o merur kangkasi, i ka’ayo kumaan tu’u se reiy’ minaka’ato. ²¹ E nedo se kaum ne me’urang-Na nu liminga eng kapualitan i ti’i, sea meiy kaa ma’edola Nisia, kaa pokeiy nea Nisia si reiy’ mouw tu’utul kasi. ²² Wo se ahli-ahli Taurat se waki Yerusalem o meiy se limila’: “Nisia si sinelaran ni Beelzebul,” wo: “Ampit si kokong ne setang Sia mure’ se setang.” ²³ Yesus si kimeret nisea, laa o lumila’ wia nisea witu em peulurela: “Kumura si Iblis o toro mure’ si Iblis? ²⁴ Sa e nesa keraja’an e mina pete-pete’, eng keraja’an i ti’i e reiy’ laa tumaang, ²⁵ wo sa e nesa rumah tangga e mina pete-pete’, e rumah tangga i ti’i e reiy’ laa tumaang. ²⁶ Tuanakan kangkasi sa si Iblis si rumangu sumaru en teuna nuesa wo sa sia mina wete-weteng, nisia si reiy’ laa tumaang, ta’an i te si mina’ayo mouw eng kesampetanna. ²⁷ Ta’an reiy’ siesa tou tu’u si ghumoremla em bale ni esa tou ente’ kaa laa mekekaat eng kapunya’anna sa sia reiy’ i wa’akesnape’la rior sitou ente’ i ti’i. Nu reiy mouw i tu tare mouw i te sia toro rumampokla em bale i ti’i. ²⁸ Niaku ku lumilame wia nikoo: Eng kaulitna em baya en dosa wo e nojat ne oki-oki’ ni tou e laa ampungala, iyon, em baya e nojat neiy nea i totorla. ²⁹ Ta’an sakawisa sitou maojat e Roh Kudus, nisia si reiy’ maka’ato ampung eng keure-urena, ta’an i te si simelok karengan si simiwo en dosa kekal.” ³⁰ Nisia si limila’ en tuana karengan nisea se limila’la kaa Nisia si sinelaran ni roh lewo’. ³¹ Laa o meiy mouw si ina’ wo se patuari-patuari ni Yesus. Kasuatan sea nu rimedeiy witu podol, sea rumeo tou kumeret Nisia. ³² Wawean tou kelaker se rimuber limedong Nisia, sia lumila’ wia-Nisia: “Loo’on, si ina’ wo se patuari-patuari-Mu se witu luar, wo nisea se me’inakut ma’atola Nikoo.” ³³ Wingkot ni Yesus wia nisea: “Seiy si ina’-Ku wo seiy se patuari-patuari-Ku?” ³⁴ Nisia si limoo’ wia se tou-tou rimuber witu eng kaledong -Na i ti’i wo lumila’: “Yi’i si ina-Ku wo se patuari-patuari-Ku! ³⁵ Seiy i te si timuanala eng kepa’aran ni Empung, nisia mouw si patuari-Ku tuama,nisia mouw si patuari-Ku wewene, nisia mouw si ina’-Ku.”