¹ Katoroan si Yesus wo se murid-murid-Na se tawi mouw e Yerusalem, reten em Betfage wo em Betania e rimeta’ waki kuntung Zaitun, Yesus si rimeo se rua murid-Na ² ampit e nower: “Mea mouw waki wanua witu en sinarumu i ti’i. Witu e nedo kouw nu ghumoreme witu, kouw makarengan laa matola siesa keledai mudape’ si neiy i ka’antung, si reiy’pe’ ma’an mekasa sakeala ni tou. I reta’la si keledai i ti’i wo alini wia nyi’i. ³ Wo sa wawean tou si lumila’la wia nikoo: Ka’a kouw timuanala ni’itu, wingkotenouw: Tuhan si mepadungla nisia. Sia si makarengan marengla nisia wia nyi’i.” ⁴ Sea tu’u mea, wo matola siesa keledai muda neiy i ka’antung witu en sinaru em pepalen waki luar, witu li’ilik e lalan, laa o rumeta’la nisia. ⁵ 5Wo se pirala tou witu se limila’ wia nisea: “Sapa e maksudna kouw rimeta’la si keledai i ti’i?” ⁶ Laa o sea mingkot tanu e neiy mouw i lila’la ni Yesus. Takar se tou-tou i ti’i se minayala nisea. ⁷ Laa o alin nea si keledai i ti’i wia si Yesus, wo ali’an neala ampit e labung nea, kamurian si Yesus si simeret witu natasna. ⁸ Laker se tou minitarla e labung nea witu lalan, wawean kangkasi se simerala em pangana-pangana lisouw niedo neami waki uma. ⁹ Se tou-tou makelang marerior wo nisea se maki’i-ki’it wia muri se maaleiy: “Hosana! Binerkatola Sia si mineiy witu e ngaran ni Tuhan, ¹⁰ binerkatola eng Keraja’an mineiy, Eng Keraja’an ni ama’ ta Daud, Hosanna waki tampa kasarakek !” ¹¹ I kekeka’ayome waki Yerusalem Sia ghumorem witu em Bait ni Empung. Maname Sia meloo-loo’ em baya nyi’a, ta’an karengan e nendo en tawi mouw mawengi Sia rumou’mi o mea waki Betania minewali ampit se mapulu’ o rua murid-Na. ¹² Kawo’odoanna nu reiy’ mouw si Yesus wo se mapulu’ o rua murid-Na timele’ula em Betania, Yesus si mapedam maarem. ¹³ Wo waki wa’akat Sia lumoo’ e nakana ara limaleiyna mouw. Sia tumawila nyi’a kaa meleloo’ sa wona’ Sia maka’ato sapa-sapa witu e nakana i ti’i. Ta’an witu e nedo Sia nu i ka’ayola witu, Nisia si reiy’ minatola sapa-sapa witu e nakana i ti’i ta’an e laleiyna-laleiyna i te, karengan memang reiy’ oras em bu’ana ara. ¹⁴ Takar pokeiy-Na wia si akana ara i ti’i: “Te’a kasi siesa tou tu’u si kumaan em bu’amu eng keure-urena!” Wo se murid-murid-Na tu’u se liminga nyi’a. ¹⁵ Laa o ma’ayo mola si Yesus wo se murid-murid-Na waki Yerusalem. Yesus nu ghimoremola witu em Bait ni Empung, o muleiy mouw Sia meure’ se tou-tou mewangker mateles witu eng kalasan em Bait ni Empung. E meja-meja peno’oran loit wo e wangkoiy-wangkoiy ne belante’ pombo neiy i purikit-Na, ¹⁶ wo Nisia si reiy’ mineela se tou-tou maali em barang-barang lumease eng kalasan em Bait ni Empung. ¹⁷ Laa o Sia mee teturu’ wia nisea, pokeiy-Na: “Reiy’ ku’a re’en wawean neiy i kepatik: Wale-Ku e laa totoren wale sesombayangan wia se reiy’ sa mina’asa bangsa? Ta’an siniwo miouw mola nyi’a sala ne penyamun!” ¹⁸ Se imam-imam kepala wo se ahli-ahli Taurat se liminga tanume em peristiwa i ti’i, wo nisea se me’inakut laa mepepunengla Nisia, karengan nisea se meide’ wia Nisia, se limoo’ kaa se minapekasa ne tou kelaker se ma’erang witu en teturu’-Na. ¹⁹ Melelaa mouw wengi sea rumou’mi kasi waki kota. ²⁰ Memo’odope’ katoroan si Yesus wo se murid-murid-Na nu melangkoiy, sea lumoo’ e nakana ara ketare em pera mouw mina’ayo eng kalat-kalatna. ²¹ Takar i kaghenangouw si Petrus witu en sapa minamuali mola, laa o sia lumila’ wia si Yesus: “Rabi, loo’onouw, e nakana ara neiy-Mu i kutokla i ti’i em pera mouw.” ²² Yesus si miningkot nisia: “Ma’emanouw wia si Empung! ²³ Niaku ku lumila’me wia nikoo: Eng kaulitna seiy i te si lumila’ wia si kuntung i yi’i: Kumesotola wo i katerekola waki ghorem en tasik! Asal reiy’ meware-wareng e natena, ta’an ma’eman, kaa en sapa neiy i lila’nala i ti’i e laa mamuali, takar eng kapualitan i ti’i e laa mamuali i wee nisia. ²⁴ Kaa ni’itu Niaku ku lumila’me wia nikoo: sapa i te em pakiweennu wo i sombayangla, emanenouw kaa nikoo koo minaka’ato mola nyi’a, takar eng kapualitan i ti’i e laa i weela wia nikoo. ²⁵ Wo sa koo rumedeiy kaa mesesombayang, ampungane’la ketare sa wona’ wawean wo’o sapa witu e natemu wia siesa tou, rio kangkasi si Ama’mu waki sorga si mampungla eng kaselokan-kaselokannu.” [ ²⁶ Ta’an sa kouw reiy’ maampungla, takar si Ama’mu waki sorga kangkasi si reiy’ laa mampungla eng kaselokan-kaselokannu.] ²⁷ 27 O laa si Yesus wo se murid-murid-Na i ka’ayola kangkasi waki Yerusalem. Katoroan si Yesus nu makelang witu eng kalasan em Bait ni Empung, o meiy mouw wia-Nisia se imam-imam kepala, se ahli-ahli Taurat wo se tu’a-tu’a, ²⁸ 28 wo mueiy wia-Nisia: “Ampit eng kuasa sapa ku’a re’en Koo matuanala eng kapualitan-kapualitan i ti’i? Wo seiy ku’a re’en si mineela eng kuasa i ti’i wia-Nikoo, i ka’ayo Koo matuanala eng kapualitan-kapualitan i ti’i?” ²⁹ Wingkot ni Yesus wia nisea: “Niaku ku laa ma’ayola e nesa wewueiyen wia nikoo. Weeanola Niaku wewingkotna, takar Niaku ku laa lumila’la wia nikoo ampit eng kuasa sapa ku’a re’en Niaku ku matuanala eng kapualitan-kapualitan i ti’i. ³⁰ Em baptisan ni Yohanes i ti’i, waki sorga ka’apa waki sitou? Weeanola Niaku wewingkotna!” ³¹ Nisea se minesesusuiye’la nyi’a witu e nelet nea, wo lumila’: “Sa kita lumila’la : Waki sorga, Nisia si laa lumila’: Sa tuana, ka’a kouw reiy’ ma’eman wia nisia? ³² Ta’an masa’kan ta lumila’la: Waki sitou!” Karengan nisea se meide’ wia se tou kelaker, karengan em baya ne tou se maloo’ola kaa si Yohanes si uli-ulit nabi. ³³ Laa o sea mingkot si Yesus: “Nikeiy keiy reiy’ mete’u.” Takar pokeiy ni Yesus wia nisea: “Sa tuana, Niaku kangkasi ku reiy’ lumila’la wia nikoo ampit eng kuasa sapa ku’a re’en Niaku matuanala eng kapualitan-kapualitan i ti’i.”