¹ Nu reiy mouw i tu sumeretouw si Yesus witu eng gorem e lodeiy laa o lumewet. Kamurian i ka’ayo mouw Sia witu eng kotana nuesa. ² Takar alinouw ne tou wia-Nisia siesa tou we’ol si neiy i katekel witu en tetekelanna. Katoroan si Yesus nu limoo’ iman nea, lumila’ mola Sia wia sitou we’ol i ti’i: “Ma’emanouw, heiy urang-Ku, en dosamu niampunganouw.” ³ Takar mila’ mouw se pirala tou ahli Taurat witu eng gorem e nate nea: “Nisia si maojat si Empung.” ⁴ Ta’an si Yesus si mete’u em peghena-ghenangen nea, laa o lumila’: “Ka’a kouw meghena-ghenang eng kapualitan-kapualitan lewo’ witu eng gorem e natemu? ⁵ Wisa ku’a re’en eng kasa wure’, lumila’la: En dosamu niampunganouw, ka’apa lumila’la: Tumo’orouw wo kumelangouw? ⁶ Ta’an rio kouw mete’u, kaa wia eng kaoatan i yi’i si Oki’ ni Tou si wawean kuasa ma’ampungla en dosa”- laa o lumila’ mola Sia wia sitou we’ol i ti’i- : “Tumo’orouw, poponouw en tetekelannu wo marengouw waki walemu!” ⁷ Wo sitou i ti’i tu’u si timo’or laa o mareng. ⁸ Takar se tou kelaker se limoo’ eng kapualitan i ti’i se meide’ laa o lumo’orla si Empung si minee mola eng kuasa katuanana i ti’i wia sitou. ⁹ Yesus nu rimeu’momi witu, Sia lumoo’ siesa tou mekengaran Matius si rimuber witu em bale cukai, laa o Sia lumila’ wia nisia: “Kumi’itouw Niaku.” Takar rumedeiy mouw si Matius laa o kumi’it Nisia. ¹⁰ Kamurian eng katoroan si Yesus nu mekaan witu em bale ni Matius, meiy mouw se ka’asa’an se mememurut cukai wo se tou berdosa wo kumaan mewali-wali ampit Nisia wo se murid-murid-Na. ¹¹ Witu en toro se tou Farisi nu limoo’ eng kapualitan i ti’i, lumila’ mouw sea wia se murid-murid ni Yesus: “Ka’a si gurumu si mekaan mewali-wali ampit se mememurut cukai wo se tou berdosa?” ¹² Yesus si limingala nyi’a wo lumila’: “Reiy’ sitou segaya’ si mepadungla mengelot, ta’an sitou rara’an. ¹³ Jadi mea mouw wo petete’unola em penoron e nuwu’ i yi’i: Neiy-Ku i kepa’ar nyi’a mouw en tongkoupusen wo reiy’ en sesempe, karengan Niaku ku mineiy reiy’ kaa meiy mekekeret se tou ulit, ta’an i te se tou berdosa.” ¹⁴ Kamurian meiy mouw wia si Yesus se murid-murid ni Yohanes wo lumila’: “Ka’a nikeiy wo se tou Farisi keiy maposo, ta’an se murid-murid-Mu se reiy?” ¹⁵ Wingkot ni Yesus wia nisea: “Toro ku’a re’en se kalo-kalo ni peredegom se mengasi’ eng kaurean si peredegom i ti’i mewali-wali nisea? Ta’an e nedona e laa meiy si peredegom i ti’i si edoni wia nisea wo witu e nedo ni’itu mow nisea se laa moso. ¹⁶ Reiy’ siesa tou tu’u si kumubarla esa nga kisi’ roko’ reiy’pe’ kimo’okos witu e labung ure, karengan satuana e roko’ pakubar i ti’i e laa kumurensang e labung i ti’i, laa o maka sela mouw e wirangna. ¹⁷ Tuanakan kangkasi e nanggor weru reiy’ i pumpunla witu eng gorem en sompoiy kuli’ ure, karengan satuana en sompoiy i ti’i e laa makurensang i ka’ayo e nanggor i ti’i i ka tea’ wo en sompoiy i ti’i tu’u e makemu. Ta’an e nanggor weru en tu’utulan ni tou witu en sompoiy weru kangkasi, wo ampit en tuana e minapiara mouw marua-ruana.” ¹⁸ Kasuatan si Yesus nu masusuiy en tuana wia nisea, meiy mouw siesa tou si kapala wale ibadat, laa o masempe Nisia wo lumila’: “Si oki’ku wewene si tare mouw i te tumayanla, ta’an meiy mouw wo i reta’ mola e lawas-Mu wia nisia takar sia laa tumou.” ¹⁹ Laa o tumo’orouw tu’u si Yesus wo kumi’it sitou i ti’i mewali-wali ampit se murid-murid-Na. ²⁰ witu en toro ni’itu siesa wewene si mapulu’ o rua mouw nge te’un eng keurena peme’itan em peraa’an si mineiy tumawimi si Yesus waki muri wo lumelerla en jumbai eng karaiy-Na. ²¹ Karengan em pokeiyna witu eng gorem e natena: “Asal ku limelerouw eng karaiy-Na, niaku ku laa male’os.” ²² Ta’an si Yesus si limenge wo tumu’us wia nisia ampit limila’: “Te’etepenola e natemu, heiy oki’-Ku, imanmu e limawirola nikoo.” Takar rengan e nedo ni’itu le’osouw si wewene i ti’i. ²³ Katoroan si Yesus nu tume’upla waki wale ni kapala wale ibadat i ti’i wo lumoo’ se sumesengo- sumesengo e no’olingen wo se tou kelaker se marungkea’, ²⁴ o lumila mouw Sia: “Mea mouw, karengan si oki’ i yi’i si reiy’ minate, ta’an si timekel.” Ta’an nisea se kime’eke’ i tela Nisia. ²⁵ Se tou kelaker i ti’i nu neiy mouw i ure’, Yesus si ghimorem wo tumiboiy e lawas ni oki’ i ti’i, laa o tumo’orouw si oki’ i ti’i. ²⁶ Takar tu rumangketouw e nabar tanume eng kapualitan i ti’i waki em pakasa’an en daerah i ti’i. ²⁷ Katoroan si Yesus nu minapawee-weela em pakela-kelangan-Na maname, se rua tou rapa mengi’itla-Nisia se mengale-ngaleiy wo lumila’: “I koupus i tela keiy, heiy urang ni Daud.” ²⁸ Nu reiy’ mouw si Yesus nu ghimoremla witu eng gorem e nesa wale, o meiy mouw se rua tou rapa i ti’i wia-Nisia wo si Yesus si limila’ wia nisea: “Ma’eman ku’a re’en kouw, kaa Niaku ku toro tumuanala nyi’a?” Sea mingkot: “Iyon Tuhan, nikeiy keiy ma’eman.” ²⁹ Laa o lelerela ni Yesus em beren nea kasuatan limila’: “Mamuali mouw wia nikoo i ki’it e imannu.” ³⁰ Takar maloo’ mouw em beren nea. Wo si Yesus tu’u si kasa tegol ngime’enge’ wia nisea, pokeiy-Na: “Jagan rio te’a siesa tou tu’u mete’ula eng kapualitan i yi’i.” ³¹ Ta’an nisea se rimou’la wo malo’orla Nisia waki pakasa’an en daerah i ti’i. ³² Kasuatan se rua tou rapa i ti’i nu rumou’la, alinola wia si Yesus siesa tou wowo’ si sinelaran. ³³ Wo si setang i ti’i nu neiy mouw i ure’la, sitou wowo’ i ti’i si toro mouw meila’, takar ma’erangouw se tou kelaker, pokeiy nea: “En tuana e reiy’pe’ ma’an mekasa loo’on ne tou wia Israel. ³⁴ Ta’an se tou Farisi se limila’: “Ampit eng kuasa ni kokong ne setang Sia mure’ si setang. ³⁵ Tuana mouw si Yesus nu limedong em baya eng kota wo en desa; Nisia si mawee teturu’ witu eng gorem e wale-wale ibadat wo maabarla e Injil Keraja’an Sorga wo mare’ila e reiy’ sa mina’asa rumara wo eng kalewea’an. ³⁶ Limoo’ se tou kelaker i ti’i, neiy i kaoghe e nate ni Yesus kaa en tongkoupusen wia nisea, karengan nisea se wedu wo neiy i kewaya tanu se domba reiy’la si rumerawir. ³⁷ Takar pokeiy-Na wia se murid-murid-Na: “Em peupu’un memang laker, ta’an se memema’ayang se toyo’. ³⁸ Kaa ni’itu kumiwee mouw wia si tuang makapunya em peupu’un, rio sia mapa’alimi se memema’ayang-memema’ayang i wee em peupu’un i ti’i.”