¹ Yesus nu minerosomi waki kuntung, kelaker tou se mareo-reok maki’i-ki’it Nisia. ² Takar meiy mouw wia-Nisia siesa tou rara’an kusta, laa o maongkot masempe Nisia wo lumila’: “Tuang, sa si Tuang pa’ar, tuang si toro i te lumenasla niaku.” ³ Laa o i yayatla ni Yesus e lawas-Na, lumelerla sitou i ti’i wo lumila’: “Niaku ku pa’ar, mamuali mola koo lenas.” Eng katoroan i te ni’itu kangkasi lenasouw sitou i ti’i witu eng kustana. ⁴ Laa o lumila’ mouw si Yesus wia nisia: “Ghena-ghenangen, te’a i pakite’umula eng kapualitan i yi’i wia si seiy i te tu’u, ta’an mea mouw, i papa’ato mola en toumu wia se imam wo i sempe mola en sesempe neiy i perentala ni Musa, tanume eng kowa’ wia nisea.” ⁵ Katoroan si Yesus nu ghimorem waki Kapernaum, meiy mouw siesa perwira lumalesla Nisia wo makiwee wia-Nisia: ⁶ “Tuang, hambaku si neiy i katekel witu em bale kaa si we’ol wo nisia si kasa peme’itan.” ⁷ Yesus si limila’ wia nisia: “Niaku ku laa meiy melele’osla nisia.” ⁸ Ta’an wingkot ni perwira i ti’i wia-Nisia: “Tuang, niaku ku reiy’ waar sumungkulla si Tuang witu eng gorem em baleku, lumila’ mola esa nga totor, takar si hambaku i ti’i si laa male’os. ⁹ Karengan niaku nuesa ku bawahan, wo witu em bawa’ku waweane’ kangkasi perajurit. Sa aku lumila’ wia si meta’asa’an perajurit i t’i: Mea!, takar sia mea, wo wia si esape’ kasi: Meiy!, takar sia meiy, ka’apa tu’u wia si hambaku: Pa’ayangenouw e nyi’i!, takar sia ma’ayangla nyi’a.” ¹⁰ Ni’itu nu lininga mola ni Yesus eng kapualitan i ti’i, ma’erangouw Sia wo lumila’ wia nisea se maki’i-ki’it-Nisia: “Niaku ku lumila’me wia nikoo, eng kaulitna iman eng kasela i yi’i e rey’pe’ ma’an mekasa atong-Kula wia siesa tou tu’u witu e nelet ne tou Israel. ¹¹ Niaku ku lumila’me wia nikoo: Laker tou se laa meiy waki sendangan wo talikuran wo rumuber kumaan mewali-wali ampit si Abraham, Ishak wo si Yakub witu eng gorem eng Keraja’an Sorga, ¹² Kasuatan se oki’-oki’ eng Keraja’an i ti’i se laa i lobo’la witu eng gorem eng kareiydeman kasa reiydem, mana mouw e laa atoan e narip wo eng kare’eket em ba’ang.” ¹³ Laa o pokeiy ni Yesus wia si perwira i ti’i: “Marengouw wo mamuali mouw wia nikoo tanu em pa’emanennu.” Takar witu i te en toro ni’itu kangkasi le’osouw si hambana. ¹⁴ kekeka’ayola waki wale ni Petrus, Yesus tu’u si limoo si ina’ manuang ni Petrus si neiy i katekel karengan si nanar’. ¹⁵ Takar tu tiboiyan-Na e lawas ni wewene i ti’i, laa o mere’ila e nanarna. Sia tu’u tumo’orouw wo melayanla Nisia. ¹⁶ Melaa mouw mawengi o alinouw wia si Yesus kelaker se tou sinelaran wo ampit e nesa nga totor Yesus si minure’la se roh-roh i ti’i wo lime’osla se tou-tou peme’itan e rumara. 17 Eng kapualitan i ti’i minamuali rio lekepouw e nuwu’ neiy i pa’ayola ni nabi Yesaya: Melaa mouw mawengi o alinouw wia si Yesus kelaker se tou sinelaran wo ampit e nesa nga totor Yesus si minure’la se roh-roh i ti’i wo lime’osla se tou-tou peme’itan e rumara. ¹⁷ Eng kapualitan i ti’i minamuali rio lekepouw e nuwu’ neiy i pa’ayola ni nabi Yesaya: “Nisia mouw si minesa’an eng kalewea’an ta wo timanggong e rumara ta.” ¹⁸ Katoroan si Yesus nu limoo’ se tou kelaker se limedong-Nisia, Sia rumeo tumodo mouw lumewet. ¹⁹ Laa o meiy mouw siesa tou ahli Taurat wo lumila’ wia –Nisia: “Guru, niaku ku laa kumi’it Nikoo, wisa i te Koo mea.” ²⁰ Yesus si limila’ wia nisia: “Serigala si maka ruragh wo se burung se meke sala’, ta’an si Oki’ ni Tou si reiy’la sitampa laa merereta’la eng kokong-Na.” ²¹ Siesa tou walina, nisia i ti’i si meta’asa’an murid-Na, si limila’ wia-Nisia: “Tuhan, iyonala niaku meape’ mekekuburla si ama’ku.” ²² Ta’an si Yesus si limila’ wia nisia: “Kumi’itouw Niaku wo ma’anouw se tou-tou minate kumuburla se tou-tou minate nea.” ²³ Laa o sumeretouw si Yesus witu eng gorem e lodeiy wo se murid-murid-Na tu’u se kimi’it-Nisia. ²⁴ I kalo’ositi merangu mouw e reghes tumokol witu e lour i ti’i, i ka’ayo e lodeiy i ti’i en sinongkouw em balolong, ta’an si Yesus si timekel. ²⁵ Takar meiy mouw se murid-murid-Na mongkela Nisia, pokeiy nea: “Tuhan, tulungen, ta mapunengouw.” ²⁶ Sia lumila’ wia nisea: “Ka’a kouw meide’, nikouw si reiy’ kasa ma’eman?” Laa o tumo’orouw si Yesus rumekak e reghes wo e lour i ti’i, takar e lour i ti’i eng kasa mina lompon. ²⁷ Wo ma’erangouw se tou-tou i ti’i, pokeiy nea: “Tou en sapa ku’a re’en Nisia i yi’i, i ka’ayo e reghes wo e lour tu’u e lale’ wia-Nisia?” ²⁸ I kekeka’ayome waki lewet, nyi’a i ti’i waki daerah ne tou Gadara, o meiy mouw se waki pakuburan se rua tou sinelaran o lumalesi si Yesus. Nisea se kasa bahaya, i ka’ayo reiy’ siesa tou tu’u si berani tumoro e lalan i ti’i. ²⁹ Wo nisea i ti’i tu’u se rimekeiy, pokeiy nea: “Sapa e nurusan-Nu ampit nikeiy, heiy Oki’ ni Empung? Sapa ku’a re’en Nikoo koo mineiy kaa meiy mesesiksa nikeiy nu reiy’pe’ e nedona?” ³⁰ Reiy’ wa’akat wia nisea i ti’i se pirala eng kelakerna se tieiy masero kumaan. ³¹ Takar se setang-setang i ti’i se kimiwee wia-Nisia, pokeiy nea: ”Sa Koo mure’ nikeiy, reo mouw keiy sumoro’ witu eng gorem ne tieiy kawang i ti’i.” ³² Yesus si limila’la wia nisea: “Mea mouw!” Laa o rumou’ mouw sea wo ghumorem witu eng gorem ne tieiy-tieiy i ti’i. Takar tumumpele’ mouw se pakasa’an kawang ne tieiy i ti’i witu en tebir en temping witu eng gorem e lour wo mate witu eng gorem e rano. ³³ Takar tumingkasouw se tumetayur-tumetayur ne tieiy i ti’i wo i kekeka’ayome waki kota, i susuiy nea mola e reiy’ sa mina’asa wo’o sapa, o kangkasi en tanume se tou-tou sinelaran i ti’i. ³⁴ Takar rumou’ momi se pakasa’an eng kota ma’atola si Yesus wo sea nu minaatoanola ampit Nisia, o sea tu’u sume’esek, rio Sia tumele’ula en daerah nea.