¹ 1 Takar si Yesus si niali ni Roh waki padang gurun kaa laa i pewewa’awa’la ni Iblis. ² Wo Nisia nu minoso mola epat nga pulu’ nga endo wo epat nga pulu’ nga wengi, kamurian maaremouw si Yesus. ³ Laa o meiy mouw si mewewa’awa’ i ti’i wo lumila’ wia-Nisia: “Sa Koo Oki’ ni Empung, perentanola rio se watu-watu i yi’i mamuali roti.” ⁴ Ta’an si Yesus si miningkot: “Neiy i kepatik: Sitou si matou-tou reiy’kan i te witu e roti, ta’an witu en susur e nuwu’ rimeu’mi witu en suma ni Empung.” ⁵ Kamurian si Iblis si minali-Nisia waki Kota Suci wo tumampala Nisia witu en songkouw em Bait ni Empung, ⁶ laa o lumila’ wia-Nisia: “Sa Koo Oki’ ni Empung, mapalenta’ mola en tou-Mu mepewawa’, karengan wawean neiy i kepatik: Tanume Nikoo Nisia si laa merentala se malaikat-malaikat-Na wo nisea se laa malar Nikoo witu natas e lawas nea, rio e ne’a-Mu reiy’ i kasu’usu’ witu em batu.” ⁷ Yesus si limila’ wia nisia: “Wawean tu’u neiy i kepatik: Te’a mouw koo mewewa’awa’la si Tuhan, Empungmu!” ⁸ Wo si Iblis si minali-Nisia kasi waki atas eng kuntung kasa rakek wo minapaloo’ola wia-Nisia em baya eng keraja’an eng kaoatan ampit eng kamega’anna, ⁹ wo lumila’ wia-Nisia: “Em baya ni’itu e laa ku i weela wia-Nikoo, sa Koo mongkot sumempe niaku.” ¹⁰ Takar lumila’ mouw si Yesus wia nisia: “Rumou’la, iblis! Karengan wawean neiy i kepatik: Nikoo koo lewo’ sa reiy’ sumempe si Tuhan, Empungmu, wo wia Nisia i te koo lumukar!” ¹¹ O laa si iblis si tumele’ula Nisia, wo loo’onouw, se malaikat-malaikat se mineiy o melayanla si Yesus. ¹² Ta’an e nedo si Yesus nu liminga, kaa si Yohanes si sinikopouw, sumingkirouw sia waki Galilea. ¹³ Nisia si timele’ula e Nazaret wo mena’ waki Kapernaum, waki li’ilik e lour, waki daerah Zebulon wo Naftali, ¹⁴ rio lekepouw e nuwu neiy i pa’ayola ni nabi Yesaya: ¹⁵ “Tana’ Zebulon wo en tana’ Naftali, Lalan mengea waki, daerah lewet en temberan Yordan, Galilea, wilayah ne bangsa-bangsa walina, - ¹⁶ bangsa se maana’ witu eng kareiydeman, se limoo’ mouw en Terang wangko’ wo wia nisea se maana’ waki wanua tinerungan e maut, rimetikouw en Terang.” ¹⁷ Rengan e nedo ni’itu mouw si Yesus si maabarla: “Makedo’ mouw, karengan eng Keraja’an Sorga en tawi mouw!” ¹⁸ Wo katoroan si Yesus nu makelang masusu e lour Galilea, Sia lumoo’ se rua matuari, sea i ti’i si Simon patotoren Petrus, wo si Andreas, patuarina. Nisea se mapitar em puket waki lour, karengan nisea se mememuket sera’. ¹⁹ Yesus si limila’ wia nisea: “Meiy, kumi’itouw Niaku, wo nikouw kouw laa Kusiwon mememuket tou.” ²⁰ Laa o sea tu’u makarengan tumele’ula em puket nea wo kumi’it Nisia. ²¹ Wo si Yesus nu rimou’ momi maname, linoo’-Na kangkasi se rua matuari, sea i ti’i si Yakobus urang ni Zebedeus wo si Yohanes patuarina, mewali-wali si ama’ nea, Zebedeus, si kasuatan matu’utul em puket witu eng gorem e lodeiy. Yesus si kimeret nisea ²² wo sea makarengan tumele’ula e lodeiy ma’an si ama’ nea, laa o kumi’it Nisia. ²³ Yesus tu’u si maledong waki minapekasa eng Galilea; Nisia si mawee teturu’ witu eng gorem e wale-wale ibadah wo maabar e Injil Keraja’an ni Empung ma’an mare’ila e reiy’ sa mina’asa rumara wo eng kalewea’an witu e nelet ne bangsa i ti’i. ²⁴ Takar rumangketouw e nabar tanume Nisia waki minapekasa en Siria wo alinouw wia-Nisia em baya se tou wuruk eng ka’ada’anna, se peme’itan e reiy’ sa mina’asa rumara wo en sengsara, sinelaran, rara’an ayan wo si pekol, o laa si Yesus si lime’osla nisea. ²⁵ Takar se tou kelaker se mareo-reok maki’i-ki’it ampit Nisia. Nisea nu mineiy se waki Galilea, wo se waki Dekapolis, se waki Yerusalem wo se waki Yudea wo se waki lewet e Yordan.