¹ Katoroan si Yesus nu limoo’ se tou kelaker i ti’i, o sumosorouw Sia witu natas eng kakenturan wo Nisia nu rimuberouw, o meiy mouw wia-Nisia se murid-murid-Na. ² Takar si Yesus tu’u muleiy lumila’ wo tumuru’ nisea’ pokeiy-Na: ³ “Ma’aruiyola se tou miskin witu en sinaru ni Empung, karengan nisea mouw se makapunya eng Keraja’an Sorga. ⁴ Ma’aruiyola se tou mengasi’, karengan nisea se laa iboren. ⁵ Ma’aruiyola se tou rinda, karengan nisea se laa makapunya em bumi. ⁶ Ma’aruiyola se tou arem wo re’o eng kaulitan, karengan nisea se laa pakateu-teun. ⁷ Ma’aruiyola se tou mura e natena, karengan nisea se laa maka’ato kamura’an. ⁸ Ma’aruiyola se tou lenas e natena, karengan nisea se laa lumoo’ si Empung. ⁹ Ma’aruiyola se tou maali-ali en dame, karengan nisea se laa totoren ura-urang ni Empung. ¹⁰ Ma’aruiyola se tou siniasa karengan eng kaulitan, karengan nisea mouw se makapunya eng Keraja’an Sorga. ¹¹ Ma’aruiyola kouw, sa karengan Niaku kouw sero’an wo siasan wo wia nikoo ni’i fitnahla e reiy’ sa mina’asa e lewo’. ¹² Mepa’a-pa’ar wo lumaya-laya’ mouw, karengan en tetoromu e wangko’ waki sorga, karengan tuana mouw kangkasi se nabi-nabi se siniasa mola nu reiy’pe’ nikouw.” ¹³ “Nikouw mouw kouw wuras eng kaoatan. Sa e wuras i ti’i minatewangouw, ampit en sapa ku’a re’en sia wurasen sumeup? Reiy’ mouw kasi si penoronna kacuali i tea’ wo i le’ek ne tou ¹⁴ Nikouw mouw kouw terang eng kaoatan. Eng kota rimeta’ waki natas eng kuntung e reiy’ wona’ i ka kirong. ¹⁵ 15 Awes kangkasi sitou si reiy’ tumutungla en solo laa o i reta’la witu rarem e wantang, ta’an i te witu natas e ne’ana en solo i ka’ayo tumerangla em baya ne tou witu eng gorem em bale i ti’i. ¹⁶ Tuana mouw satorona en terangmu sumena’ witu en sinaru ne tou, rio sea lumoo’ em pasiwo-siwonnu le’os wo lumo’orla si Ama’mu waki sorga.” ¹⁷ “Te’a mouw kouw mapokeiyla, kaa Niaku ku mineiy kaa meiy merere’ila e nukum Taurat ka’apa eng kaol em baya nabi. Niaku ku mineiy reiy’ kaa meiy merere’ila nyi’a, ta’an i te melelekepla nyi’a. ¹⁸ Karengan Niaku ku lumila’me wia nikoo: Eng kaulitna eng kaurean reiy’pe’ minere’i e langit wo em bumi i yi’i, esa iota ka’apa esa ti’itik tu’u e reiy’ laa re’inla witu e nukum Taurat, nu reiy’pe’ em baya nyi’a mamuali. ¹⁹ Kaa ni’itu seiy si laa rume’ila meta’asa’an em perentah e nukum Taurat ma’anouw tu’u eng kasa rintek, wo tumuru’la nyi’a tuana wia se tou walina, nisia si laa rumuber witu en tampa kasa kumeng witu eng gorem eng Keraja’an Sorga; ta’an seiy si tumuanala wo tumuru’la e reiy’ sa mina’asa em perentah-perentah e nukum Taurat, nisia si laa rumuber witu en tampa kerakekan witu eng gorem eng Keraja’an Sorga. ²⁰ Takar Niaku ku lumila’me wia nikoo: Sa em patou-touan ka’agama’annu e reiy’ lebe ulit ta’an em patou-touan ka’agama’an ne ahli-ahli Taurat wo ne tou-tou Farisi, eng kaulitna kouw reiy’ laa ghumorem witu eng gorem eng Keraja’an Sorga. ²¹ Nikouw kouw liminga mola neiy i nuwu’la wia se nene moyang ta: Te’a mawunu’; seiy si munu’ si lewo’ sa reiy’ ukumen. ²² Ta’an Niaku ku lumila’me wia nikoo: Susur tou si meupi’ wia si patuarina si lewo’ sa reiy’ ukumen; seiy si lumila’ wia si patuarina: Kafir! Si lewo’ sa reiy’ i sarula witu Mahkamah Agama wo seiy si lumila’: Jahil! si lewo’ sa reiy’ i sarakan witu eng gorem naraka melaya-layas. ²³ Kaa ni’itu, sa koo mesesempela en sesempemu witu natas e mezbah wo koo i kaghenang wo’o sapa witu eng gorem e nate ni patuarimu wia nikoo, ²⁴ tele’u mola en sesempemu witu en sinaru e mezbah i ti’i wo mea mouw medameane’la rior ampit si patuarimu, laa o marengla laa sumempela en sesempemu i ti’i. ²⁵ Makarenganouw medamean ampit si kesarumu eng kaurean koo mewali-wali ampit nisia witu nuner e lalan, rio si kesarumu i ti’i te’a sumarakan nikoo wia si akim wo si akim i ti’i si sumarakan nikoo wia si sumesawangna wo koo i lawala witu eng gorem penjara. ²⁶ Niaku ku lumila’me wia niko: Eng kaulitna nikoo koo reiy’ laa rumou’mi maname, nu reiy’pe’ koo mear e nutangmu i ka’ayo malekep. ²⁷ Nikoo koo liminga mola e nuwu’: Te’a masiwo en zinah. ²⁸ Ta’an Niaku ku lumila’me wia nikoo: Susur tou si matu’usla wia si wewene ampit mepa’arla nisia, si zinah mouw ampit nisia witu eng gorem e natena. ²⁹ Takar sa em berennu lele’os en sumeipla nikoo, tu’ilenouw wo i terekouw, karengan e le’os wia nikoo sa e nesa witu e nouwakmu mapuneng ta’an i te em pakasa’an e nouwakmu i lobo’la witu eng gorem e naraka. ³⁰ Wo sa e lawasmu lele’os en sumeipela nikoo, panggalenouw wo i tea’ mouw i tu, karengan e le’os wia nikoo sa e nesa witu e nouwakmu mapuneng ta’an i te em pakasa’an e nouwakmu eng ghumorem naraka. ³¹ Neiy mouw i nuwu’la kangkasi: Seiy si tuma’atasla si ka’awuna si lewo’ sa reiy’ meela surat cere wia nisia. ³² Ta’an Niaku ku lumila’me wia nikoo: Susur tou si tima’atasla si ka’awuna kacuali kaa en zinah, nisia si simiwo mola si ka’awuna minamuali zinah; wo seiy si kimaweng ampit si wewene tina’atasla, nisia si simiwo en zinah. ³³ Nikouw kouw liminga mola kangkasi neiy i nuwu’la wia se nene moyang ta: Te’a matiwa’ e reiy’ ulit, ta’an i te tiboiyanouw en tiwa’mu witu en sinaru ni Tuhan. ³⁴ Ta’an Niaku ku lumila’me wia nikoo: Te’a mouw ma’an mekasa i te tumiwa’, le’os kaa e langit, karengan e langit nyi’a mouw en takhta ni Empung, ³⁵ ma’anouw tu’u kaa em bumi, karengan em bumi nyi’a mouw eng kontoiyan e ne’a-Na, ka’apa tu’u kaa e Yerusalem, karengan e Yerusalem nyi’a mouw eng kota Raja Wangko’; ³⁶ te’a mouw kangkasi koo tumiwa’ kaa eng kokongmu, karengan nikoo koo reiy’ sikuasa mepeputi’la ka’apa me’itemla e nesa wu’uk tu’u. ³⁷ Sa iyon, satorona kouw lumila’la: iyon, sa reiy’, satorona kouw lumila’la: reiy’. Sapa e limantouwla ni’itu eng kimetaremi waki si lewo’. ³⁸ Nikouw kouw liminga mola e nuwu’: Weren sawelan weren wo e wa’ang sawelan wa’ang. ³⁹ Ta’an Niaku ku lumila’me wia nikoo: Te’a mouw kouw mesesaru si tou masiwo lewo’ wia nikoo, ta’an i te seiy tu’u si sumepe’ eng keremu lele’os, i wee mouw kangkasi wia nisia eng keremu kawii. ⁴⁰ Wo wia sitou laa mererapotla nikoo karengan si pa’ar e labungmu, sarakanola kangkasi eng karaiymu. ⁴¹ Wo seiy i te tu’u si malupu nikoo kumelang esa mil, kumelangouw mewali nisia rua mil eng kewa’akat. ⁴² weeala sitou makiwee wia nikoo wo te’a mouw i pature sitou pa’ar mepepinjang wia nikoo. ⁴³ Nikouw kouw liminga mouw e nuwu’: I keupus i tela si kasuat en toumu wo ri’irisenouw si kesarumu. ⁴⁴ Ta’an Niaku ku lumila’me wia nikoo: I keupus i tela si kesarumu wo sumombayangouw i wee nisia si simiasala nikouw. ⁴⁵ Kaa en tuana mouw nikouw kouw mamuali urang-urang ni Ama’mu waki Sorga, si rimetikla si endo i wee se tou lewo’ wo se tou le’os wo timumpala e naro i wee se tou ulit wo se tou reiy’ ulit. ⁴⁶ 46 Sa kouw meupusla sitou meupus nikouw, sapa ku’a re’en en tetoromu? Reiy’ ku’a re’en si mememurut cukai kangkasi si simiwo en tuana? ⁴⁷ Wo sa kouw mawee i te tabea wia se patuari-patuarimu, sapa ku’a re’en e lumantouwla nyi’a ta’an em pasiwo-siwon ne tou walina? Reiy’ ku’a re’en sitou reiy’ sumine’u si Empung tu’u si simiwo en tuana? ⁴⁸ Kaa ni’itu e lewo’ sa reiy’ mouw kouw reiy’ siperoan, masuat tanu si Ama’mu waki Sorga nyi’a mouw si reiy’ siperoan.”