¹ Witu en toro ni’itu mapa’ato mouw si Yohanes pembaptis waki padang gurun Yudea wo maabarla: ² “Makedo’ mouw, karengan eng Kerajaan Sorga en tawi mouw!” ³ Eng kaulitna nisia mouw si neiy i maksudla ni nabi Yesaya katoroan nisia nu limila’: “Wawean en suara ni tou mengale-ngaleiy waki padang gurun: Tiro’onola e lalan i wee si Tuhan rondorenouw e lalan i wee-Nisia.” ⁴ Yohanes si minake eng karaiy wu’uk ni unta wo e ne’ereten kuli’, wo eng kekaanenna se kompo’ wo madu en talun. ⁵ Takar meiy mouw wia nisia se penduduk waki Yerusalem, se waki minapekasa Yudea wo se waki minapekasa en daerah kaledong Yordan. ⁶ O laa eng kasuatan nisea nu maaku en dosa nea sea baptisen ni Yohanes waki temberan Yordan. ⁷ Ta’an eng katoroan nisia nu limoo’ kelaker se tou Farisi wo se tou Saduki mineiy kaa neiy pebebaptisen, lumila’ mouw sia wia nisea: “Heiy kouw see’ ni leloiy’ biludak. Seiy ku’a re’en si limila’la wia nikouw, kaa kouw toro i te tumingkasla en tou witu e murka e laa meiy? ⁸ Jadi i wua’ mola e wu’ana minatoroan ampit em pakedo’an. ⁹ Wo te’a mouw mawona’la, kaa nikouw kouw toro lumila’ witu e natemu: Abraham nisia mouw si ama’ meiy! Karengan niaku ku lumila’me wia nikouw: Empung si toro i te sumiwola se watu-watu i yi’i mamuli oki’-oki’ i wee si Abraham! ¹⁰ Pati en sinadia mouw witu eng kalat e nakana wo susur e nakana reiy’ mawua’la wu’ana le’os, tantu mouw em pelen wo i tea’ witu eng gorem e napi. ¹¹ Niaku ku mebaptis nikouw ampit en dano tanume eng kowa’ pakedo’an, ta’an Nisia si meiy kamurian ta’an niaku si kasa kuasa ta’an niaku wo niaku ku reiy’ waar rumeta’la eng kasut-Na. Nisia si laa maptisla nikouw ampit e Roh Kudus wo ampit e napi. ¹² Niu em bitu mouw e lawas-Na. Nisia si laa meweweresila en tampa peirikan-Na wo merurla eng gandum-Na witu eng gorem e lumbung, ta’an e riawu en daami i ti’i e laa tunun-Na witu e napi reiy’ kawunu’an.” ¹³ 13 Takar meiy mouw si Yesus waki Galilea mineiy waki Yordan wia si Yohanes kaa neiy pebebaptisenna. ¹⁴ Ta’an si Yohanes si minape’la Nisia, pokeiyna: “Niaku mouw si mepadung baptisen-Nu, wo ka’a Nikoo si mineiy wia niaku?” ¹⁵ Laa o mingkot si Yesus, pokeiy-Na wia nisia: “Ma’anouw eng kapualitan i ti’i mamuali, karengan en tuana mouw e le’osna ta lumekepla e minapekasa eng kepa’aran ni Empung.” Wo si Yohanes tu’u si kimi’it i tela Nisia. ¹⁶ Nisia nu binaptisola, Yesus si makarengan rimou’mi witu en dano wo en toro ni’itu kangkasi e langit minawuka’ wo Sia lumoo’ e Roh ni Empung tanu si burung Pombo en timumpa witu natas-Na ¹⁷ Laa o kalinga’anouw en suara waki sorga e meila’la: “Yi’i mouw si Oki’-Ku si’i koupus-Kula, wia-Nisia mouw Niaku mepa’ar.”