¹ Yesus nu neiy mouw i patoula waki Betlehem waki tana’ Yudea witu en zaman ni raja Herodes, meiy mouw se tou-tou majus waki sendangan mineiy waki Yerusalem ² wo memue-mueiy: “Wisa ku’a re’en Sia, si raja ne tou Yahudi si tarekan i patoula i ti’i? Nikeiy keiy limoo’o mouw si sumesena’-Na waki sendangan wo keiy meiy kaa meiy mesesempe Nisia.” ³ Katoroan si raja Herodes nu limingala eng kapualitan i ti’i i kasenge’ mouw sia ampit se minapekasa e Yerusalem. ⁴ Takar nierurnala em baya se imam kepala wo se ahli Taurat ne bangsa Yahudi, laa o kiweeanna katerangan wia nisea, waki wisa si Mesias laa i patoula. ⁵ 5 Sea lumila’ wia nisia: “Waki Betlehem waki tana’ Yudea, karengan en tuana mouw wawean neiy i kepatik witu eng kaol ne nabi: ⁶ Wo nikoo ee Betlehem, tana’ Yudea, nikoo ma’an mekasa koo reiy’kan i te si kasa rintek witu e nelet nea nu maperenta e Yehuda, karengan wia mouw nikoo si laa tumo’or siesa tou pa’aka-aka’an si laa rumawirla se umat-Ku Israel.” ⁷ Laa o memene-menes si Herodes si kimeret se tou-tou majus i ti’i wo kasa maasi-asi’ mawueiy wia nisea, sakawisa si sumesena’ i ti’i kaloo’an. ⁸ Kamurian sia rumeo nisea mea waki Betlehem, pokeiyna: “Mea wo soisapela maka le’o-le’os en tanume si Oki’ i ti’i wo sa kouw minato mola Nisia, makarengan i abarla wia niaku rio niaku tu’u ku meiy sumempe Nisia.” ⁹ Sea nu liminga mola em patotorla ni raja i ti’i, mea mouw sea. Wo loo’onouw, si sumesena’ linoo’ nea waki Sendangan i ti’i marerior wia nisea i ka’ayo tume’up wo mena’ witu natas en tampa, wisa si Oki’ i ti’i witu. ¹⁰ Katoroan sea nu limoo’ si sumesena’ i ti’i, kasa mouw mepa’a-pa’ar sea. ¹¹ Takar ghumoremouw sea witu eng gorem em bale i ti’i wo lumoo’ si Oki’ i ti’i ma’an si Maria, ina’-Na, laa o maongkot masempe Nisia. Sea tu’u muka’ en tampa eng harta benda nea wo sumempela en sesempe wia- Nisia, nyi’a i ti’i e mas, kamania wo e mur. ¹² Wo eng karengan neiy i nge’enge’la witu nipi, rio te’a mewewareng waki si Herodes, takar marengouw sea waki wanua nea timoro e lalan walina. ¹³ Se tou-tou majus i ti’i nu minae mouw, kaloo’anouw ni Yusuf si malaikat ni Tuhan witu nipi wo lumila’: “Tumo’orouw, edonouw si Oki’ i ti’i ma’an si ina’-Na, tumingkasouw waki Mesir wo mena’ mouw maname i ka’ayo Niaku nu meela nuwu’ wia nikoo, karengan si Herodes si laa sumero si Oki’ i ti’i kaa si laa mewewunu’ Nisia.” ¹⁴ Takar si Yusuf tu’u tumo’orouw, edonnala si Oki’ i ti’i ma’an si ina-Na wengi i te ni’itu kangkasi laa o sea sumingkir waki Mesir, ¹⁵ wo mena’ maname i ka’ayo si Herodes mate. Eng kapualitan i ti’i minamuali rio lekepouw neiy i nuwu’la ni Tuhan kaa se nabi: “Waki Mesir Ku kumeret si Oki’- Ku.” ¹⁶ Katoroan si Herodes nu mete’ula, kaa nisia si lini’ibusanouw ne tou-tou majus i ti’i, nisia si kasa meupi’. Laa o sia rumeo wunu’un em baya se oki’ waki Betlehem wo eng kaledongna, sea i ti’i se oki-oki’ makaumur rua nge te’un o mawa’, minatoroan ampit e nedo en toro kinakete’uanna wia se tou-tou majus i ti’i. ¹⁷ Ampit en tuana lekepouw e nuwu’ neiy i pa’ayola ni nabi Yeremia: ¹⁸ “Kinalinga’anouw en suara waki Rama, e name’ wo e narip eng kasa maka’aripen; Rahel si maame’ se oki’na wo nisia si so’o eluren, karengan nisea se reiy’ mouw wia.” ¹⁹ 19 Herodes nu minate mouw, o loo’onouw ni Yusuf si malaikat ni Tuhan witu e nipi waki Mesir, pokeiyna: ²⁰ Tumo’orouw, edonouw si Oki’ i ti’i ma’an si ina’-Na wo mae mouw waki tana’ Israel, karengan si mewewunu’ si Oki’ i ti’i, si minate mouw.” ²¹ Laa o tumo’orouw tu’u si Yusuf, edonnala si Oki’ i ti’i ma’an si ina’-Na wo mea waki tana’ Israel. ²² Ta’an lininganala, kaa si Arkhelaus si minamuali raja waki Yudea simawelela wia si Herodes, ama’na, nisia si meide’ mea maname. Karengan neiy i nge’enge’ witu nipi, mea mouw si Yusuf waki daerah Galilea. ²³ I kekeka’ayona maname sia tu’u mena’ witu e nesa kota mekengaran Nazaret. Eng kapualitan i ti’i minamuali rio lekepouw e nuwu’ neiy i pa’ayola ne nabi-nabi, kaa Nisia si laa totoren: Tou Nazaret.