¹ Kamurian meiy mouw se tou-tou Farisi wo Saduki se mewewa’awa’ si Yesus. Sea se kimiwee rio Sia mapaloo’ola e nesa kowa’ waki sorga wia nisea. ² Ta’an wingkot ni Yesus: “Witu e nendo mawengido karengan e langit mea’, kouw limila’: Nendo laa tumerang, ³ wo witu e nendo memo’odo, karengan e langit mea’ wo ke’erem, kouw limila’: Nendo wuruk. Gio e langit kete’uan niouw mememange’anla nyi’a ta’an eng kowa-kowa en zaman reiy’. ⁴ Angkatan ne lewo’ wo reiy’ lale’ yi’i se makiwee e nesa kowa’. Ta’an wia nisea se reiy’ laa weeanla eng kowa’ ta’an i te eng kowa’ ni nabi Yunus.” Laa si Yesus tumele’ula nisea wo mea. ⁵ 5 Witu e nedo se murid-murid ni Yesus limewet e lour, nisea se limiur minaali roti. ⁶ Yesus si limila’ wia nisea: “Maato-ato mouw wo mategha-tegham witu e ragi ne tou Farisi wo Saduki.” ⁷ Takar sea meghena-ghenang wo siesa mila’ wia se walina: “Ni’itu neiy i lila’-Na karengan ta reiy’ maali-ali roti.” ⁸ Wo katoroan Yesus si mete’u sapa em penusu-nusuiyen nea, Sia lumila’: “Ka’a kouw menusu-nusuiyla eng kapualitan reiy’la roti? Heiy tou-tou reiy’ kasa ma’eman! ⁹ Reiy’pe’ kasi kouw mangarti? Reiy’ ghinenang miouw kasi e lima roti neiy i wee se lima ngariwu tou i ti’i wo pirape’ lo’olo’ e roti nierur miouwla kamurian? ¹⁰ Ka’apa tu’u em pitu roti neiy i wee se epat ngariwu tou i ti’i wo pirape’ lo’olo’ nierurmiouwla kamurian? ¹¹ Wo’o kumura wona’ o reiy’ pangartian niouw kaa e reiy’ roti em pemaksud-Ku. Niaku lumila’me wia nikoo: Mategha-tegham witu e ragi ne tou Farisi wo Saduki.” ¹² Entoro ni’itu tare mouw i te pangartian nea kaa e reiy’ maksud-Na rio sea tegham witu e ragi roti, ta’an i te witu en teturu’ ne tou Farisi wo Saduki. ¹³ Si Yesus nu mina’ayo mouw waki daerah Kaisarea Filipi, Sia mueiy wia se murid-murid-Na: “Pokeiy ne tou, seiy re’en si Oki’ ni Tou i ti’i?” ¹⁴ Wingkot nea: “Wawean se meila’la : Yohanes Pembaptis, wawean kangkasi se meila’la : Elia wo wawean kangkasi se meila’la : Yeremia ka’apa si meta’asa’an wia se pakasa’an nabi.” ¹⁵ Laa si Yesus mueiy wia nisea : “ Ta’an sapa em peila’mu, seiy ku’a re’en Niaku yi’i ?” ¹⁶ Takar e wingkot ni Simon Petrus : “ Nikoo mouw koo Mesias, Oki’ ni Empung matou-tou!” ¹⁷ Pokeiy ni Yesus wia nisia : “ Ma’aruiyola koo ee Simon bin Yunus karengan reiy’ sitou si minila’la ni’itu wia nikoo, ta’an i te si Ama’-Ku waki sorga. ¹⁸ Wo Niaku tu’u Ku lumila’me wia nikoo: Nikoo mouw koo Petrus wo witu e natas watu karang yi’i Niaku Ku laa rumedeiyla jema’at-Ku wo e alam maut e reiy’ laa kumuasala nyi’a. ¹⁹ Wia nikoo e laa Ku i weela eng kekusi’ Keraja’an Sorga. Sapa e wina’akesmu wia eng kaoatan yi’i e laa i kewa’akes waki sorga wo sapa e neiynu i reta’la wia eng kaoatan yi’i e laa i kareta’ waki sorga.” ²⁰ Laa si Yesus si minalouw wia se murid-murid-Na rio te’a maki te’ula wia si seiy i te tu’u kaa Nisia si Mesias. ²¹ Rengan en toro ni’itu Yesus si muleiy mapa’atola wia se murid-murid-Na kaa Nisia si lewo’ sa reiy’ mea waki Yerusalem wo mesa’an e laker peme’itan witu em beteng ne tu’a-tu’a, imam-imam kepala wo se ahli-ahli Taurat, laa o wunu’un wo to’orela witu e nendo katelu. ²² Ta’an si Petrus kimeong si Yesus sumangaweka wo tumogor Nisia, pokeiyna: “Tuhan, satorona si Empung si ma’akatla eng kapualitan i ti’i! Eng kapualitan i ti’i ma’an mekasa i te reiy’ laa tumoro Nikoo.” ²³ Takar si Yesus si limenge wo lumila’ wia si Petrus: “Rumou’la Iblis. Nikoo koo esa watu kasu’usu’an wia-Niaku, karengan nikoo koo reiy’ maghenangela sapa em paghenangen ni Empung, ta’an i te sapa em paghenangela ni tou.” ²⁴ Laa si Yesus lumila’ wia se murid-murid-Na: “Susur tou si pa’ar kumi’it Niaku, sia si lewo’ sa reiy’ sumangkal en tetouna, mesa’an en salibna wo kumi’it Niaku. ²⁵ Karengan seiy i te si pa’ar melelawirela e nyawana, sia si laa kere’ian e nyawana; ta’an seiy i te si kere’ian e nyawana kaa Niaku, sia si laa maka’ato nyi’a. ²⁶ Sapa em penoronna si esa nga touan maka’ato e minapekasa eng kaoatan ta’an si kinaliongan e nyawana? ²⁷ Karengan si Oki’ ni Tou si laa meiy witu eng kamulia’an ni Ama’-Na patepe-teperen ne malaikat-malaikat-Na; witu en toro ni’itu Sia si laa sumuli’ susur tou i ki’it em pasiwo-siwon nea. ²⁸ Niaku lumila’me wia nikoo: Kaulitna witu e nelet ne tou wia nyi’i wawean se reiy’ laa mate nu reiy’pe’ sea limoo’ si Oki’ ni Tou meiy tanume si Raja witu eng gorem keraja’an-Na.”