¹ Kamurian meiy mouw se pirala tou Farisi wo se ahli Taurat waki Yerusalem wia si Yesus wo lumila’: ² “Ka’a se murid-murid-Mu se limangkoiy mouw eng kenaramen ne nene moyang ta? Nisea se reiy’ minoas e lawas nu reiy’pe’ kimaan.” ³ Ta’an wingkot ni Yesus wia nisea: “Ka’a nikouw kangkasi kouw limangkoiy em perentah ni Empung kaa eng kenaramen ne nene moyangmu? ⁴ Karengan Empung si minee nuwu’: Ormatela si ama’mu wo si ina’mu; wo kasi: Seiy si kimutokla si ama’na ka’apa si ina’na tantu mouw si ukumen paten. ⁵ Ta’an nikouw kouw limila’: Seiy i te si limila’ wia si ama’na ka’apa wia si ina’na: Sapa e wia niaku en toro pinakela kaa em pepepiarala nikoo, em pinake mola neiy i wee sesempe wia si Empung, ⁶ sitou i ti’i si reiy’ mouw wajib kasi maormat’la si ama’na ka’apa si ina’na. Satuana e nuwu’ ni Empung neiy mouw i papaloo-loo’ miouwla e reiy’ paken demi eng kenaramen niouw nuesa. ⁷ Heiy tou-tou munafik! Nulitouw e nubuat ni Yesaya tanume nikouw: ⁸ Bangsa yi’i se malo’orla Niaku ampit e wiwina, kaulitna e nate nea wa’akat wia-Niaku. ⁹ Percuma sea maibadah wia-Niaku, awesla en teturu’ paturu’ neala nyi’a mouw em perenta ni tou.” ¹⁰ Laa si Yesus kumeret se tou kelaker wo lumila’ wia nisea ¹¹ “Lingan wo weeanola ghenang: reiy’ e ghimorem witu eng gorem suma e numajisla sitou, ta’an i te e rimeu’mi witu en suma, ni’itu mouw e numajisla sitou.” ¹² Takar meiy mouw se murid-murid-Na wo mueiy wia-Nisia: “Kete’uan-Nu kaa em peila’-Mu i ti’i e minamuali paape’ wia se tou-tou Farisi?” ¹³ Wingkot ni Yesus: “Susur en tanemen e reiy’ neiy i tanem ni Ama’-Ku waki sorga e laa sawuten ampit e namut-namutna. ¹⁴ I waya mola nisea i ti’i. Nisea se tou rapa se matuntun se tou rapa. Sa se tou rapa matuntun se tou rapa, tantu mouw sea nu rua se i kera’aragh witu eng gorem ko’okor.” ¹⁵ Laa si Petrus lumila wia-Nisia: “Welarola em peulurela i ti’i wia nikeiy.” ¹⁶ Wingkot ni Yesus: “Nikouw tu’u kouw reiy’ pe’ kasi ulit-ulit mangarti nyi’a? ¹⁷ Reiy’ kete’uan niouw re’en kaa e reiy’ sa mina’asa wo’o sapa eng ghimorem witu eng gorem en suma en tumumpa witu eng gorem en tian laa o i tea’ witu en jamban? ¹⁸ Ta’an sapa e rimeu’mi witu en suma eng ketarena witu e nate wo ni’itu mouw e numajisla sitou. ¹⁹ Karengan witu e nate o lumentuti e reiy’ sa mina’asa ghenang lewo’, pawunu’an, pazina’an, pesa’amekan, parongkitan, en tiwa’ palsu wo e nojat. ²⁰ Ni’itu mouw e numajisla sitou. Ta’an kumaan ampit e lawas reiy’ nioasan e reiy’ numajisla sitou.” ²¹ Laa si Yesus rumou’mi witu wo sumingkir waki daerah Tiros wo Sidon. ²² Takar meiy mouw si esa wewene Kana’an waki daerah i ti’i wo marekeiy: “Koupus i tela niaku, ee Tuhan, Oki’ ni Daud, karengan si urangku wewene si sinelaran ni setang wo si kasa peme’itan.” ²³ Ta’an si Yesus si kasa reiy’ miningkot nisia. Laa se murid-murid-Na meiy wo kumiwee wia-Nisia : “ Reo mouw sia mea, sia kumi’itla nikita ampit mereke-rekeiy.” ²⁴ Wingkot ni Yesus : “ Niaku ku neiy i toke wia i te se domba-domba neiy i kaliong wia se umat Israel.” ²⁵ Ta’an si wewene i ti’i rimeten wo sumempe Nisia kasuatan lumila’ : “ Tuhan, tulungen niaku.” ²⁶ Ta’an si Yesus miningkot : “ Reiy’ waar medo roti en sinadiala i wee se oki’ wo i lawala nyi’a wia si asu.” ²⁷ Pokeiy ni wewene i ti’i : “ Ulit Tuhan, ma’anouw si asu i ti’i kumaan e rema-rema rima’aragh witu e meja ni tuangna.” ²⁸ Takar si Yesus miningkot wo lumila’ wia nisia : “ Heiy ina’, wangko’ imanmu, takar mamuali mouw wia nikoo en tanu neiynu i kepa’arla.” Wo eng katoroan i te ni’itu kangkasi si urangna si minale’os. ²⁹ Sia nu timele’u mola en daerah i ti’i, Yesus si simusu em pante lour Galilea wo sumosor witu e natas eng kuntung laa o rumuber witu. ³⁰ Kamurian se tou ka’asa’an se mareo-reok meiy wia-Nisia maali-ali tou pekol, tou we’ol, tou rapa, tou wowo’ wo lakere’ kasi se walina, laa o rumeta’la nisea witu e ne’a ni Yesus wo Sia lume’osla nisea em baya nea. ³¹ Takar ma’erangouw se tou kelaker i ti’i limoo’ sitou wowo’ mengila-ngila’, sitou we’ol mina le’os, sitou pekol kimelang, sitou rapa limoo’, wo nisea se limo’orla si Empung Israel. ³² Laa si Yesus kumeret se murid-murid-Na wo lumila’: “Nate-Ku minoghe kaa en tongkoupusen wia se tou kelaker i ti’i. En telu mouw nga endo sea maki’i-ki’it Niaku wo sea se reiy’la kekaanen. Niaku ku so’o rumeo nisea mareng ampit e narem, sangari sea mawuleng wia lalan.” ³³ Pokeiy ne murid-murid-Na wia-Nisia: “Kumura wia en tampa kapenesan yi’i ta maka’ato roti kaa mewewesula se tou kelaker se tuana eng ka’asa eng kelakerna?” ³⁴ Pokeiy ni Yesus wia nisea: “Wawean pira roti wia nikoo?” “Pitu,” wingkot nea, wo waweane’ kangkasi se pirala sera’ rintek.” ³⁵ Laa si Yesus rumeo se tou kelaker i ti’i rumuber witu en tana’, ³⁶ Ni’itu nu reiy’ mouw Sia medo em pitu roti wo se sera’-sera’ i ti’i, tumotorla en syukur, mengebi-ngebi’la nyi’a wo meela nyi’a wia se murid-murid-Na, laa se murid-murid-Na mineela nyi’a kangkasi wia se tou kelaker. ³⁷ Wo em baya nea se kimaan i ka’ayo wesu. Kamurian se tou se minerurla eng kaketor-kaketor e roti tele’u, em pitu lo’olo’ wuta. ³⁸ Se kimi’it kimaan sea mouw se epat ngariwu tuama, reiy’ neiy i kaghorem se wewene wo se oki’. ³⁹ Laa si Yesus rumeo se tou kelaker i ti’i mareng. Sia sumeret lodeiy wo tumodome waki daerah Magadan.