¹ Witu e masa ni’itu i ka’ayo mouw e naba-abar tanume si Yesus wia si Herodes, raja wilayah. ² Laa o sia lumila’ wia se pegawai-pegawaina: “yi’i mouw si Yohanes Pembaptis; sia si timo’orouw witu e nelet ne tou minate wo kaa ni’itu mouw eng kuasa-kuasa i ti’i mepa’ayang witu eng gorem-Na.” ³ Karengan e memang si Herodes rimeo mouw sikopen si Yohanes, tumorongku nisia wo menjarala nisia, mato’orongan ampit em peristiwa ni Herodias, ka’awu ni Filipus patuarina. ⁴ Karengan e mekasa si Yohanes timogor nisia, pokeiyna: “Reiy’ halal koo medo si Herodias!” ⁵ Herodes si Pa’ar mewewunu’ nisia, ta’an sia si meide’ wia se tou kelaker kaa se maloo’la si Yohanes tanu si nabi. ⁶ Ta’an witu e nendo nari jadi ni Herodes, ma’engketouw si urang wewene ni Herodias witu e nuner nea wo kaa mepepa’arela e nate ni Herodes, ⁷ i ka’ayo si Herodes timiwa’ si laa meweweela sapa i te eng kiweenna. ⁸ Takar sia nu niuleanola ni ina’na, si oki’ wewene i ti’i lumila’: “Wee mola niaku wia nyi’i eng kokong ni Yohanes Pembaptis witu em baki.” ⁹ Laa o tekurouw e nate ni raja, ta’an karengan en tiwa’na wo karengan se sakeiy-sakeiyna, i perentanala tu’u i weela nyi’a. ¹⁰ Neiy i reona panggalen eng kokong ni Yohanes witu em penjara ¹¹ wo eng kokong ni Yohanes i ti’i tu’u nialimi ni tou witu em baki, laa o i weela si reraa i ti’i wo alinna nyi’a wia si ina’na. ¹² Kamurian meiy mouw se murid-murid ni Yohanes Pembaptis meiy medo e mayatna wo kumuburla nisia. Laa o mea mouw sea makite’ula nyi’a wia si Yesus. ¹³ Yesus nu liminga mola e nabar i ti’i sumingkiromi Sia witu, wo kaa laa mesesea’la en tou ampit e lodeiy witu en tampa kapenesan. Ta’an se tou kelaker se liminga nyi’a wo kumi’it Nisia timoro lalan ketana’an waki kota-kota nea. ¹⁴ Katoroan si Yesus nu simua’, Sia lumoo’ se tou kelaker kasa laker eng kelaker nea, takar moghe mouw e nate-Na kaa en tongkoupusen wia nisea wo Sia lume’osla nisea se rara’an. ¹⁵ Metare em bengi, murid-murid-Na mineiy wia-Nisia wo lumila’: “Tampa yi’i em penes wo nendo mawengi mouw. Reo mouw se tou kelaker i ti’i mea rio sea toro tumeles kekaanen waki wanua-wanua.” ¹⁶ Ta’an si Yesus si limila’ wia nisea: “Reiy’ perlu sea mea, nikouw kouw lewo’ sa reiy’ mee nisea kumaan.” ¹⁷ Wingkot nea: “Wawean wia nikeiy wia nyi’i e lima i te roti wo rua sera’.” ¹⁸ Yesus limila’: “Alinomi wia-Niaku.” ¹⁹ Laa o reo-Na se tou kelaker i ti’i rumuber witu e rukut. Wo ni’itu nu niedo-Na mola e lima roti wo se rua sera’ i ti’i, Yesus si kima’ate waki langit wo tumotorla em berkat, laa o mengebi-ngebi’la e roti i ti’i wo meela nyi’a wia se murid-murid-Na, Laa se murid-murid-Na memete-metengla nyi’a wia se tou kelaker. ²⁰ Wo em baya nea se kimaan i ka’ayo mina wesu. Kamurian se tou se minerurla eng kaketor-kaketor roti timele’u, mapulu’ o rua lo’olo’ wuta. ²¹ Se maki’i-ki’it se kimaan wo’o wona’ lima nga riwu tuama, reiy’ neiy i kaghorem se wewene wo se oki’. ²² Nu reiy’ mouw i tu Yesus si makarengan merentala se murid-murid-Na sumeret witu e lodeiy wo rumeriorla wia- Nisia mea waki lewet, kasuatan ni’itu Sia rumeo se tou kelaker mareng. ²³ Wo se tou kelaker i ti’i nu neiy mouw i reo-Na mareng, Yesus si simosor witu natas eng kuntung kaa laa mesesombayang maesa-esa. Katoroan nendo em bengi mouw, Sia si maesa-esa witu. ²⁴ Lodeiy ne murid-murid-Na em pira mola mil eng kewa’akatna witu em pante wo i palengki-lengki’ em balolongan, karengan e reghes sali’idek. ²⁵ Wo’o wona’ jam tiga wengi meiy mouw si Yesus wia nisea makelang witu natas e rano. ²⁶ Katoroan se murid-murid-Na limoo’ Nisia makelang witu natas e rano, se neiy i kalo’osit wo rumekeiy: “Ti’i si mengengide’!”, laa o mereke-rekeiy kaa meide’. ²⁷ Ta’an makarengan si Yesus limila’ wia nisea: “Menesouw! Niaku ku yi’i, te’a meide’!” ²⁸ Laa si Petrus ma’aleiy wo mingkot Nisia: “Tuhan, sa Nikoo i tu, reo mouw niaku meiy wia-Nikoo kumelang witu natas e rano.” ²⁹ Pokeiy ni Yesus: “Meiy mouw!” Takar si Petrus tumumpa witu lodeiy wo kumelang witu natas e rano meiy lumalesla si Yesus. ³⁰ Ta’an katoroan pedamenna sengoan e reghes, meide’ mouw sia wo muleiy matenem laa o rumekeiy: “Tuhan, tulungen niaku!” ³¹ Makarengan si Yesus kumaya’la e lawas-Na, tumiboiy nisia wo lumila’: “Heiy tou reiy’ kasa ma’eman, ka’a koo meware-wareng?” ³² Laa o sea sumeret witu e lodeiy wo reghes tu’u mina ompas. ³³ Wo se tou-tou witu e lodeiy minongkot wia Nisia, pokeiy nea: “Kaulitna Nikoo koo Urang ni Empung.” ³⁴ Kinekeka’ayome waki lewet nisea se simua’ waki Genesaret. ³⁵ Katoroan si Yesus sinine’u ne tou-tou witu en tampa i ti’i, nisea se minakite’ula nyi’a waki e minapekasa en daerah i ti’i. Takar em baya ne tou rara’an niali wia-Nisia. ³⁶ Nisea se makiwee rio iyonala lumelerla en jumbai eng karaiy-Na. Wo em baya se limelerla-Nyi’a se mina le’os.