¹ Witu e nendo ni’itu rumou’ momi si Yesus witu em bale i ti’i wo rumuber witu e li’ilik lour. ² Takar meiy mouw se tou kelaker mareo-reok laa o muyutla Nisia, i ka’ayo Sia sumeret witu e lodeiy wo rumuber witu, sedangkan se tou kelaker em baya nea se rimedeiy witu em pante. ³ Wo Sia si timotorla kelaker eng kapualitan witu em peulurela wia nisea. Pokeiy-Na: “Wawean siesa tou mememu’uwur rumou’mi kaa laa mewewu’uwur. ⁴ Witu en toro sia nu mawu’uwur, esa nga weteng benih i ti’i rima’aragh witu e li’ilik lalan, laa o meiy mouw se burung wo kumaan nyi’a i ka’ayo mina’apu. ⁵ Esa nga weteng rima’aragh witu en tana’ wewatun, e reiy’ laker en tana’na, laa o makarenganouw tu’u timou em benih i ti’i, karengan en tana’na e napis. ⁶ Ta’an si endo nu rimetikouw, welesouw sia wo minapera karengan reiy’ kimalat. ⁷ 7 Esa nga weteng kasi rima’aragh witu nuner eng kongkom tetunean, laa o maka sela mola eng kongkom i ti’i wo kumimpit nyi’a i ka’ayo minate. ⁸ Wo esa nga weteng rima’aragh witu en tana’ le’os laa o mee wu’ana: wawean e limepet maka esa nga atus, wawean e limepet maka enem nga pulu’ wawean e limepet telu nga pulu’. ⁹ Seiy si maka talinga, sa torona sia si luminga!” ¹⁰ Takar meiy mouw se murid-murid-Na wo mueiy wia-Nisia: “Ka’a Koo mengila-ngila’ wia nisea witu em peulurela?” ¹¹ Wingkot ni Yesus: “Wia nikoo wineean karunia laa mete’ula em pengiro-ngirong eng Keraja’an Sorga, ta’an wia nisea reiy’. ¹² Karengan seiy si makapunya, wia nisia laa i wee, i ka’ayo sia kakuwuan; ta’an seiy si reiy’ makapunya, sapa i te tu’u kangkasi em bia nisia e laa edoni wia nisia. ¹³ 13 Ka ni’itu mouw Niaku mengila-ngila’ witu em peulurela wia nisea; karengan ma’anouw tu’u limoo’, sea se reiy’ limoo’ wo ma’anouw tu’u liminga, sea se reiy’ liminga wo reiy’ mangarti. ¹⁴ Takar wia nisea e lekepouw nubuat ni Yesaya, e lininga: Nikouw kouw laa luminga wo luminga, ta’an reiy’ mangarti, nikouw kouw laa lumoo’ wo lumoo’, ta’an reiy’ limoo’ makale’os. ¹⁵ Karengan e nate ne bangsa yi’i eng kimuraberouw, wo en talingana wuterouw malinga, wo em berenna eng kimerut minereng; rio te’a sea lumoo’ ampit em berenna wo luminga ampit en talingana wo mangarti ampit e natena, laa o murikiti i ka’ayo Niaku lume’osela nisea. ¹⁶ Ta’an ma’aruiyola em berennu karengan limoo’ wo en talingamu karengan liminga. ¹⁷ Karengan Niaku lumila’me wia nikoo: Kaulitna laker se nabi wo se tou ulit se pa’ar lumoo’ sapa e linoo’mu, ta’an se reiy’ limoo’ nyi’a, wo se pa’ar luminga sapa e liningamu, ta’an se reiy’ liminga nyi’a. ¹⁸ 18 Kaa ni’itu, linganouw em penoron peulurela si mememu’uwur i ti’i. ¹⁹ Wia se susur tou liminga e nuwu’ tanume eng Keraja’an Sorga, ta’an reiy’ mangarti nyi’a, meiy mouw si lewo’ wo kumaat e neiy i wu’uwurla witu eng gorem nate ni tou i ti’i; ni’itu mouw em benih neiy i wu’uwurla witu e li’ilik lalan. ²⁰ Benih e neiy i wu’uwurla witu en tana’ wewatun nyi’a mouw sitou si liminga e nuwu’ i ti’i wo makarengan medo nyi’a ampit e naruiy. ²¹ Ta’an nisia si reiy’ kimalat wo timaang i tela reiy’ ure. Sakawisa meiy em patindasan ka’apa em paghioan karengan e nuwu’ i ti’i, sitou i ti’i tu’u si makarengan murtad. ²² E neiy i wu’uwurla witu e nuner eng kongkom tetunean nyi’a mouw sitou si liminga e nuwu’ i ti’i, laa eng kalieiyan kaoatan yi’i wo e wiles kekaya’an eng kimimpit e nuwu’ i ti’i i ka’ayo reiy’ minee wu’ana. ²³ E neiy i wu’uwurla witu en tana’ le’os sia mouw sitou liminga e nuwu’ i ti’i wo mangarti, wo kaa ni’itu sia si minee wu’ana, wawean e limepet maka esa nga atus, wawean e limepet maka enem nga pulu’, wawean e limepet maka telu nga pulu’.” ²⁴ Yesus si minitarla e nesa peulurela walina kasi wia nisea, pokeiy-Na: “Kapualitan eng Keraja’an Sorga i ti’i e nulur sitou si minu’uwurla em benih le’os witu e numana. ²⁵ Ta’an witu en toro em baya ne tou se timekel, meiy mouw si kesaruna mu’uwurla em benih lalang witu e nelet eng gandum i ti’i, laa o mea. ²⁶ Katoroan eng gandum i ti’i matou mouw wo muleiy mawulis, loo’onola kangkasi e lalang i ti’i. ²⁷ Takar meiy mouw se hamba-hamba ni makauma i ti’i wia nisia wo lumila’: Tuang, reiy’ ku’a re’en em benih le’os, e neiy i wu’uwurla ni tuang witu e numa ni tuang? Wisa ku’a re’en o meiy e lalang i ti’i? ²⁸ Wingkot ni tuang i ti’i: Sikesaru si timuanala nyi’a. Laa o lumila’ mouw se hamba-hamba i ti’i wia nisia: Jadi pa’ar re’en si tuang rio keiy mea sumawutla e lalang i ti’i? ²⁹ Ta’an sia si limila’: Tea’, karengan wona’ eng gandum i ti’i i kaki’iti mesawut witu en toro kouw mesawut e lalang i ti’i. ³⁰ Waya mola marua-rua tumoumi mewali i ka’ayo nedo mupu’. Witu e nedo ni’itu niaku ku laa mila’ wia se mengengupu’: Erurene’la rior e lalang i ti’i wo wa’akesenouw esa nga ke’kes-esa nga ke’kes kaa em petetunun; kamurian erurenola eng gandum i ti’i witu eng gorem e lumbungku.” ³¹ Yesus si minitarla em peulurela walina kangkasi wia nisea, pokeiy-Na: “Kapualitan eng Keraja’an Sorga i ti’i e nulur watuna en sesawi, e niedo wo i wu’uwurla ni tou witu e numana. ³² Memang e watuna i ti’i eng kasa rintek witu e reiy’ sa mina’asa jenis em benih, ta’an sa timou mouw, en sesawi i ti’i en sumelala ta’an e raaren walina, awes tare e mamuali akana, i ka’ayo se burung-burung wia natas se mineiy sumala witu em pangana-pangana.” ³³ Wo Sia si simusuiyla em peulurela i ti’i kangkasi wia nisea: “ Kapualitan eng Keraja’an Sorga i ti’i nulur e ragi niedo ni esa wewene wo i kayo’la witu en topong terigu telu sukat i ka’ayo mina sewokan em baya nyi’a.” ³⁴ Em baya nyi’a i ti’i neiy i pa’ayola ni Yesus wia se tou kelaker witu em peulurela, wo reiy’ siesa peulurela tu’u e reiy’ neiy i pa’ayo-Na wia nisea, ³⁵ Rio lekepouw e nuwu’ neiy i pa’ayola ne nabi: “Niaku ku pa’ar muka’ en suma-Ku lumila’la em peulurela, Niaku ku pa’ar tumotorla eng kapualitan e neiy i kakirong rengan eng kaoatan siniwola.” ³⁶ Takar si Yesus tu’u tumele’ula se tou kelaker i ti’i, laa o mareng. Murid-murid-Na mineiy wo lumila’ wia-Nisia: “Welaromi wia nikeiy em peulurela tanume e lalang witu numa i ti’i.” ³⁷ Sia mingkot, pokeiy-Na: “Sitou minu’uwurla em benih le’os sia mouw si Oki’ ni Tou; ³⁸ numa nyi’a mouw eng kaoatan. Em benih le’os i ti’i se oki-oki’ eng Keraja’an wo e lalang se oki-oki’ ni lewo’. ³⁹ Kesaru si minu’uwurla em benih lalang sia mouw si Iblis. Nedo meupu’ nyi’a mouw eng kesampetan en zaman wo se mengengupu’ i ti’i se malaikat. ⁴⁰ Takar en tanume e lalang i ti’i ni erurla wo tinunu witu e napi, tuana mouw kangkasi witu eng kesampetan en zaman. ⁴¹ Oki’ ni Tou si laa rumeo se malaikat-malaikat-Na wo sea se laa merurla e reiy’ sa mina’asa maka seipen wo em baya se tou se simiwola eng kalewo’an witu eng gorem Keraja’an-Na. ⁴² Em baya nyi’a e laa i terekla witu eng gorem nawu napi; mana mouw e laa atoan e narip wo eng kare’eket em ba’ang. ⁴³ Witu en nedo ni’itu mouw se tou-tou ulit se laa sumena’ tanu si endo witu eng keraja’an ni Ama’ nea. Seiy si maka talinga, le’osouw sia luminga!” ⁴⁴ “Kapualitan eng Keraja’an Sorga i ti’i e nulur eng harta neiy i kakirong waki uma, e niatola ni tou, laa o i kirongnala kasi. Karengan eng kepa’a-pa’aranna mea mouw sia mangker e minapekasa eng kapunya’anna laa o tumeles e numa i ti’i. ⁴⁵ Tuana mouw kangkasi eng kapualitan Keraja’an Sorga i ti’i e nulur sitou belante’ si masero mutiara wangun. ⁴⁶ Ni’itu nu niatona mola e mutiara kasa wawean arga, sia tu’u mea mangker e minapekasa kapunya’anna laa o tumeles e mutiara i ti’i.” ⁴⁷ “Tuana mouw kangkasi eng kapualitan Keraja’an sorga i ti’i e nulur em puket neiy i tumpala waki tasik, laa o merurla se minegheghioan jenis ne sera’. ⁴⁸ Ni’itu nu wuta mouw, em puket i ti’i tu’u eng kineong ne tou waki pante, laa o rumuberouw sea wo maarurla se sera’ le’os witu eng gorem sempe wo se sera’ reiy’ le’os i tea’ nea. ⁴⁹ Tuana mouw kangkasi witu eng kesampetan en zaman: Malaikat-malaikat se laa meiy meteta’atasla sitou lewo’ wia sitou ulit, ⁵⁰ laa o tumerekla sitou lewo’ witu eng gorem nawu napi; mana mouw e laa atoan e narip wo eng kare’eket em ba’ang. ⁵¹ Mangartikan em baya miouw i ti’i?” Sea se miningkot: “Yon, keiy mangarti.” ⁵² Takar mila’ mouw si Yesus wia nisea: “Kaa ni’itu susur ahli Taurat si minaka’ato en teturu’ witu eng kapualitan eng Keraja’an Sorga i ti’i e nulur si mekewale si rimeu’mi eng harta weru wo nure witu en tinu’utulanna.” ⁵³ Yesus nu simampetouw simusuiyla em peulurela-peulurela i ti’i, Sia tu’u rumou’mi witu. ⁵⁴ 54 I kekeka’ayola waki tampa ketare-Na, Yesus si mawee teturu’ se tou-tou witu witu em bale ibadat nea. Takar ma’erangouw sea wo lumila’: “Wisa eng kina’atoan-Na eng hikmat i ti’i wo eng kuasa kaa metetuanala e mujizat-mujizat i ti’i? ⁵⁵ Reiy’ ku’a re’en Sia yi’i si urang ni tukang kayu? Reiy’ ku’a re’en si ina’-Na si mekengaran Maria wo se patuari-patuari-Na: Yakobus, Yusuf, Simon wo si Yudas? ⁵⁶ Wo reiy’ ku’a re’en se patuari-patuari-Na wewene em baya nea se mewali-wali nikita? Jadi wisa eng kina’atoan-Na em baya nyi’a i ti’i?” ⁵⁷ Laa o sea oki’ ghenang wo sumede’ Nisia. Takar si Yesus limila’ wia nisea: “ Si nabi si paormaten wisa-wisa i te, kacuali witu en tampa asalna sandiri wo witu em balena.” ⁵⁸ Wo reiy’ karengan eng kapa’emanan nea, o kaa e reiy’ laker e mujizat siniwo-Na witu.