¹ Yesus nu simampetouw minowerla wia se mapulu’ o rua murid-Na, mea mouw Sia kaa mea mewewee teturu’ wo ma’abarla Injil witu eng kota-kota nea. ² Witu eng gorem penjara si Yohanes liminga tanume em pepa’ayangen ni Kristus, ³ laa o rumeo se murid-muridna mueiy wia-Nisia: “Nikoo re’en si laa meiy i ti’i ka’apa lewo’ sa reiy’ re’en keiy ma’ana’la sitou walina?” ⁴ Yesus miningkot nisea: “Mea mouw wo i lila’ mola wia si Yohanes sapa e lininga miouw wo linoo’ miouw: ⁵ tou rapa si limoo’, tou we’ol si kimelang, tou kusta si mina lenas, tou lunteng si liminga, tou minate si tino’orela wo wia se tou miskin neiy i abarla e nabar le’os. ⁶ Wo ma’aruiyola si tou reiy’ minerara e nate wo kumelong Niaku.” ⁷ Se murid-murid ni Yohanes nu minea mouw, muleiy mouw si Yesus sumusuiy wia se tou kelaker i ti’i en tanume si Yohanes: “Kaa en sapa ku’a re’en kouw mea waki padang gurun? Lumoo’ en tabelang em paoghela e reghes mea o meiy? ⁸ Ka’apa kaa en sapa ku’a re’en kouw mea? Lumoo’ sitou minake e nalus? Sitou minake e nalus i ti’i en tampana waki istana raja. ⁹ Jadi kaa en sapa ku’a re’en kouw mea? Lumoo’ si nabi? Ulit, wo Niaku lumila’me wia nikoo, awes tare e lumantouwla wia si nabi ¹⁰ Karengan en tanume Nisia wawean e neiy i patik: Loo’onouw, Niaku ku rimeo si tetoke-Ku rumeriorla wia Nikoo, sia si laa tumiro’la e lalan-Nu witu en sinaru-Mu. ¹¹ Niaku lumila’me wia nikoo: Kaulitna witu e nelet nea nu neiy i patoula ni wewene reiy’pe’ ma’an mekasa mapa’ato siesa tou lumantouwla eng kewangko’ ni Yohanes Pembabtis, ta’an si kasa rintek witu eng Keraja’an Sorga si lumantouwla eng kewangko’ ta’an nisia. ¹² Rengan minapa’atola si Yohanes Pembabtis i ka’ayomi yi’i, eng Keraja’an Sorga neiy i warat wo sitou minarat nyi’a mewewa’awa’ mekekontoiyla nyi’a. ¹³ Karengan em baya ne nabi wo eng kitab Taurat se manubuat i ka’ayo sia minapa’ato si Yohanes ¹⁴ wo - sa kouw pa’ar sumungkulla nyi’a – sia mouw si Elia si laa meiy i ti’i. ¹⁵ Seiy si makatalinga, satorona sia si luminga! ¹⁶ Ampit en sapa re’en e laa Ku i ulurla se angkatan yi’i? Nisea i ti’i se i ulurla se oki-oki’ rimuber waki pasar wo maaleiy wia se ka’ampit nea: ¹⁷ Nikeiy keiy masengo no’olingen i wee nikoo, ta’an nikoo koo reiy’ maengket, nikeiy keiy mekantarla eng kidung duka, ta’an nikouw kouw reiy’ mengasi’. ¹⁸ Karengan si Yohanes mineiy, sia si reiy’ kimaan, wo reiy’ kimoo’, wo sea lumila’: sia si sinelaran ni setang. ¹⁹ Kamurian si Oki’ ni Tou mineiy, Sia kumaan wo kumoo’, wo sea lumila’: Loo’onouw, Sia si esa tou karoko’ wo kapengoo’, kalo ni mememurut cukai wo ne tou berdosa. Ta’an eng hikmat ni Empung neiy i ulitela kaa em pasiwo-siwonna.” ²⁰ Laa o muleiy si Yesus mapero eng kota-kota reiy’ mina kedo’, ma’anouw tu’u witu Sia si kasa laker timuanala e mujizat-mujizat-Na: ²¹ “Cilaka mouw koo ee Khorazim! Cilaka mouw koo ee Betsaida! Karengan sa waki Tirus wo waki Sidon minamuali e mujizat-mujizat minamuali mola witu e nuner miouw, e nure mouw sea mina kedo’ wo mengasi’. ²² Ta’an Niaku lumila’me wia nikoo: Witu nendo, paakiman, pemesa’anen ni Tirus wo ni Sidon e laa makawure’la ta’an em pemesa’anennu. ²³ Wo nikoo ee Kapernaum, sapa re’en nikoo koo laa i longkotla i ka’ayo waki langit? Reiy’, nikoo koo laa i tumpala i ka’ayo witu eng kaoatan ne tou minate! Karengan sa waki Sodom minamuali e mujizat-mujizat minamuali mola witu e nuner miouw, eng kota i ti’i tantu rimedeiye’ i ka’ayomi e nendo yi’i. ²⁴ Ta’an Niaku lumila’me wia nikoo: Witu nendo paakiman, em pemesa’anen ni wanua Sodom e laa makawure’la ta’an em pemesa’anennu.” ²⁵ Witu en toro ni’itu lumila’ mouw si Yesus: “Niaku ku masyukuur wia-Nikoo, Ama’, Tuhan e langit wo em bumi, karengan em baya nyi’a i ti’i e neiy i kirong-Mu wia se tou bijak wo se tou sigha’, ta’an neiy i papa’ato-Mu wia se tou rintek. ²⁶ Ya Ama’, ni’itu mouw e mekepa’aren wia-Nikoo. ²⁷ Nyi’a nu waya neiy mouw i sarakanla ni Ama’-Ku wia-Niaku wo reiy’ siesa tou tu’u sumine’u si Oki’ ta’an si Ama’ i te, wo reiy’ siesa tou tu’u sumine’u si Ama’ ta’an si Oki’ i te wo sitou wia nisia si Oki i ti’i pa’ar mapa’atola nyi’a. ²⁸ Meiy mouw wia-Niaku, em baya ne reawa’ wo minesa’an wuter, Niaku ku laa meela eng karoisan wia nikoo. ²⁹ Pesa’anenouw em bongkouw neiy Ku i todongla wo metete’u mola wia-Niaku, karengan Niaku ku le’os ate wo rinda wo si imukurmu si laa maka’ato eng kaleneran. ³⁰ Karengan em bongkouw neiy Ku i todongla i ti’i en sedap wo em pemesa’anen-Ku tu’u e wure’.”