¹ Nendo wangko’ e Roti Reiy’ Siragi, em patotoren Paskah, en tawi mouw. ² Se imam-imam kepala wo se ahli-ahli Taurat se masero lalan, kumura sea toro munu’ si Yesus, karengan nisea se meide’ wia se tou kelaker. ³ Takar ghumoremouw si Iblis wia si Yudas, mekengaran Iskariot, siesa wia se mapulu’ o rua murid i ti’i. ⁴ Laa o mea mouw si Yudas wia se imam-imam kepala wo se kepala-kepala pengawal em Bait ni Empung wo rumunding ampit nisea, sa kumura sia toro sumarakanla si Yesus wia nisea. ⁵ Nisea se kasa mepa’a-pa’ar wo se minaesa’an kaa laa meweweela eng kelakerna e loit wia nisia. ⁶ Nisia si miniyonla nyi’a, wo muleiye’mi en toro ni’itu nisia si menero-nero e nedo le’os kaa laa mesesarakanla si Yesus wia nisea ampit e reiy’ kakete’uala ne tou kelaker. ⁷ Takar mina’ayo mouw e nendo wangko’ Roti Reiy’ Siragi, nyi’a i ti’i e nendo wisa se tou se lewo’ sa reiy’ rumeretla domba Paskah. ⁸ O laa si Yesus si rimeo si Petrus wo si Yohanes, pokeiy-Na: “Mea mouw, tiro’onola en sesakeiyan Paskah i wee nikita rio kita kumaan.” ⁹ Pokeiy nea wia-Nisia: “Witu e wisa ku’a re’en eng kepa’aran-Nu keiy tumiro’la nyi’a?” ¹⁰ Wingkot-Na: “Sakawisa kouw ghumorem witu eng gorem eng kota, nikouw kouw laa masungkul ampit siesa tou maali-ali eng kure’ pinumpunan rano. Todeiyanouw sia witu eng gorem em bale ghinoremannala, ¹¹ wo i lila’ mola wia si mekewale i ti’i: Guru si mawueiy wia nikoo: witu wisa ku’a re’en e woang tampa Niaku mewali-wali ampit se murid-murid-Ku laa kumaan Paskah? ¹² O laa sitou i ti’i si laa mapa’atola wia nikoo e nesa woang atas kasa sela e lekepouw, witu ni’itu mouw kouw lewo’ sa reiy’ tumiro’la nyi’a.” ¹³ Takar mae mouw sea wo sea matola em baya nyi’a en tanu neiy i lila’la ni Yesus wia nisea. Laa o sea tumiro’la em Paskah. ¹⁴ Katoroan neiy mouw i ka’ayola e nedona, Yesus si rimuber mekaan mewali-wali ampit se rasul-rasul-Na. ¹⁵ Pokeiy-Na wia nisea: “Niaku ku kasa lumelo kumaan Paskah i yi’i mewali-wali ampit nikouw, nu reiy’pe’ Niaku nu peme’itan. ¹⁶ Karengan Niaku ku lumila’me wia nikoo: Niaku ku reiy’ mouw laa kumaan nyi’a kasi i ka’ayo sia maka’atola eng kalekepanna witu eng Keraja’an ni Empung.” ¹⁷ Kamurian Sia medo e nesa cawan, tumotor syukur, laa o lumila’: “Edonouw e nyi’i wo i wetengola witu e nelet miouw. ¹⁸ Karengan Niaku ku lumila’me wia nikoo: muleiy i temi en teakan i yi’i Niaku ku reiy’ mouw laa kumoo’ kasi e wua’na nakana e nanggor i ka’ayo eng Keraja’an ni Empung e mineiy mouw.” ¹⁹ Laa o Sia medo e roti, tumotor syukur, mengebi-ngebi’la nyi’a wo meela nyi’a wia nisea, pokeiy-Na: “Nyi’i mouw e nouwak-Ku neiy i sarakan i wee nikouw; siwonouw e nyi’i mamuali paghenangan Niaku.” ²⁰ Tuanakan kangkasi en siniwo-Na ampit en cawan ni’itu nu kimaanola; Sia si limila: “En cawan i yi’i nyi’a mouw en teta’aran weru kaa e raa’-Ku, neiy i toa’la i wee nikouw. ²¹ Ta’an, loo’on, e lawas nitou simarakan Niaku, si wia mewali-wali ampit Niaku wia e meja i yi’i. ²² Karengan si Oki ni Tou si memang laa mea tanu neiy mouw i tantula, ta’an, cilaka mouw sitou kaa nisia o Sia i sarakan!” ²³ Laa o muleiy mouw sea mewewueiyan, seiy si witu e nelet nea si laa sumiwo en tuana. ²⁴ O mamuali mola kangkasi em pe’isingan witu nelet ne murid-murid ni Yesus, sa seiy mouw si toro paloo’ola kasa wangko’ witu nelet nea. ²⁵ Yesus si limila’ wia nisea: “Raja-raja ne bangsa-bangsa se maperenta se rakyat nea wo se tou-tou makelangla eng kuasa wia nisea se patotoren tumeterung-tumeterung. ²⁶ Ta’an nikouw kouw reiy’ i te tuana, ta’an i te si kasa wangko’ witu e nelet miouw satorona si mamuali tanume si kasa muda wo pa’aka-aka’an tanume si pelayan. ²⁷ Karengan seiy ku’a re’en si lumantouwla eng kewangko’: si rimuber mekaan, ka’apa si melayanla? Reiy ku’a re’en nisia si rimuber mekaan? Ta’an Niaku ku witu eng keuneran niouw ku tanume si pelayan. ²⁸ Nikouw mouw si minena-ena’ mewali-wali ampit Niaku witu e reiy’ sa mina’asa pewa’awa’an em pine’an-Kumi. ²⁹ Wo Niaku ku metantula eng hak-hak eng Keraja’an i wee nikouw, masuatkan tanu si Ama’-Ku si timantula nyi’a i wee-Niaku, ³⁰ kaa nikouw kouw laa kumaan wo kumoo’ esa meja ampit Niaku witu eng gorem eng Keraja’an-Ku wo nikouw kouw laa rumuber witu natas en takhta kaa laa ma’akimla se mapulu’ o rua suku Israel. ³¹ Simon, Simon, loo’on, Iblis si makiwee mouw kaa laa mesesiri nikouw tanu eng gandum, ³² Ta’an Niaku ku simombayangola i wee nikoo, rio e imanmu te’a i kera’aragh. Wo nikoo, sa wona’ koo mina wena’asouw, keterenola se patuari-patuarimu.” ³³ Wingkot ni Petrus: “Tuhan, niaku ku sadia ghumorem em penjara wo mate mewali-wali ampit Nikoo.” ³⁴ Ta’an si Yesus si limila’: “Niaku ku lumila’me wia nikoo, Petrus, e nendo i yi’i se ko’oko’ se reiy’ laa kumukuk, nu reiy’pe’ koo nu sumangkal maka telu, kaa nikoo koo sumine’u Niaku.” ³⁵ Laa o Sia lumila’ wia nisea: “Katoroan Niaku nu tumoke nikouw ampit e reiy’ maali sompoiy-sompoiy, walun wo eng kasut, wawean ku’a re’en kouw reiy’ siawes en sapa-sapa?” ³⁶ Wingkot nea: “E nesa tu’u reiy’.” Pokeiy-Na wia nisea: ”Ta’an en teakan i yi’i, seiy si makapunyala en sompoiy-sompoiy, satorona nisia si maali nyi’a, tuanakan kangkasi si makapunya walun; wo seiy si reiy’ makapunyala nyi’a satorona nisia si mangkerla eng karaina wo tumeles en santi. ³⁷ Karengan Niaku ku lumila’me wia nikouw, kaa nats eng Kaol Suci i yi’i e lewo’ sa reiy’ i lekepela wia-Niaku: Nisia si laa i kareken witu e nelet ne rumerangu-rumerangu Karengan sapa neiy i kepatik tanume Niaku eng kasuatan palekepen.” ³⁸ Pokeiy nea: “Tuhan, nyi’i e rua santi.” Wingkot-Na: “E nawesouw.” ³⁹ Laa o mea mouw si Yesus waki luar kota wo kumura eng kenaramen Nisia nu matorome em bukit Zaitun. Se murid-murid-Na kangkasi se maki’itla Nisia. ⁴⁰ Nisea nu mina’ayo mola en tampa i ti’i o Sia lumila’ wia nisea: “Sumombayangouw rio kouw reiy’ i kawolon witu em pewa’awa’an.” ⁴¹ Kamurian Sia ma’akatla en tou wia nisea wo’o’ wona esa nge lawa watu eng kewa’akatna’, laa o Sia kumudu wo sumombayang, pokeiy-Na: ⁴² “Oh Ama-Ku, sa wona’ Koo pa’ar, edonouw en cawan i yi’i wia-Niaku; ta’an reiy’ eng kepa’arang-Ku, ta’an i te eng kepa’aran-Nu mouw e minamuali.” ⁴³ Takar siesa malaikat waki langit si minapa’atola en tou wia-Nisia kaa laa mewewee eng kaketeran wia-Nisia. ⁴⁴ Nisia si kasa kineide’an wo makauli-ulitola masombayang. Logo-Na minamuali tanu en ti’itik-ti’itik raa’ e mangatetiis witu en tana’. ⁴⁵ Laa o Sia tumo’ori witu en sesombayangen-Na wo mareng waki se murid-murid-Na, wo Sia matola nisea se kasuatan timekel karengan e mengasi’. ⁴⁶ Pokeiy-Na wia nisea: “Ka’a kouw tumekel? Tumo’orouw wo sumombayangouw, rio kouw te’a i kawolon witu em pewa’awa’an.” ⁴⁷ E nedo si Yesus nu masusuiye’ o meiy mouw se esa nga reok tou, kasuatan si murid-Na mekengaran Yudas, siesa wia se mapulu’ o rua murid i ti’i, si makelang witu rerior nea. Yudas si timawila si Yesus kaa laa mesesiongla-Nisia. ⁴⁸ Takar pokeiy ni Yesus wia nisia: “Heiy Yudas, nikoo koo simarakan si Oki’ ni Tou ampit en siong?” ⁴⁹ Katoroan nisea, se mewali-wali ampit si Yesus, se limoo’ sapa e laa mamuali, o lumila’ mouw sea: “Tuhan, lewo’ sa reiy’ ku’a re’en keiy sumeke’ nisea ampit en santi?” ⁵⁰ Wo siesa wia nisea si simeke’ si hamba Imam wangko’ i ka’ayo mineta’atas en talingana lele’os. ⁵¹ Ta’an si Yesus si limila’: “Tuana mouw i tu.” Laa o Sia lumelerla en talinga ni tou i ti’i wo lume’osla nisia. ⁵² Takar si Yesus si limila’ wia se imam-imam kepala wo se kepala-kepala pengawal em Bait ni Empung ma’an se tu’a-tu’a se mineiy kaa meiy mesesikop Nisia, pokeiy-Na: “Peila’ miouw i te Niaku i yi’i ku penyamun, takar kouw mineiy lekep ampit en santi wo em bewewe?” ⁵³ Eng kaulitna susur nendo Niaku ku witu nuner miouw witu eng gorem em Bait ni Empung, wo kouw reiy’ sumikop Niaku. Ta’an nyi’i mouw e nedo miouw, wo e nyi’i mouw eng kuasa kareiydeman i ti’i. ⁵⁴ Laa o sikopen si Yesus wo alin rumou’mi witu. Sia alinouw waki wale ni Imam Wangko’. Wo si Petrus si maki’iti waki wa’akat. ⁵⁵ Witu eng keuneran eng kalasan e wale i ti’i se tou se timutung api wo nisea se rimuber limedong nyi’a. Petrus kangkasi si rimuber witu nuner nea. ^{56 58} Siesa hamba wewene si limoo’ nisia rimuber tawi e napi; sia si menegha-negha’ nisia, laa o lumila’: “O kangkasi sitou i yi’i si mewali-wali ampit Nisia.” ⁵⁷ Ta’an si Petrus si simangkal, pokeiyna: “Reiy’, niaku ku reiy’ sumine’u Nisia!” Reiy’ pirala eng keurena kamurian siesa tou walina si limoo’ nisia laa o lumila’: “Nikoo kangkasi siesa wia nisea!” Ta’an si Petrus si limila’: “Reiy’, niaku ku reiy’!” ⁵⁹ Wo wo’o wona’ satu jam kamurian siesa tou walina si limila’ eng kategol: “E nulit, sitou i yi’i kangkasi si mewali-wali ampit Nisia, karengan nisia kangkasi sitou Galilea.” ⁶⁰ Ta’an si Petrus si limila’: “Reiy’, Niaku ku reiy’ mete’u en sapa neiymu i lila’la.” Katoroan i te ni’itu kangkasi, kasuatan nisia nu meila’, kumukukouw se ko’oko’. ⁶¹ Laa o lumenge mouw si Tuhan tumu’usla si Petrus, Takar i kaghenangouw si Petrus kaa si Tuhan si limila’ mola wia nisia: “Nu reiy’pe’ se ko’oko’ kimukuk wia nendo i yi’i, nikoo koo makatelu mouw simangkal Niaku.” ⁶² Laa o sia mea witu luar wo maame’ kasa ma’arip. ⁶³ Wo se tou-tou timaang si Yesus, se menero-nero’la wia Nisia wo mawewe-Nisia. ⁶⁴ Nisea se timutuwla eng gio-Na wo mawueiy: “Ma’awa’ mouw mila’la seiy ku’a re’en si minewe Nikoo?” ⁶⁵ Wo lakere’ kasi e nojat neiy i totor neala wia-Nisia. ⁶⁶ Wo ni’itu nu oatouw merurouw se sidang em baya ne tu’a-tu’a ne bangsa Yahudi wo se imam-imam kepala wo se ahli-ahli Taurat, laa o Sia i saru neala witu se Mahkamah Agama nea, ⁶⁷ pokeiy nea: “Sa wona’ Nikoo mouw si Mesias, i lila’ momi wia nikeiy.” Wingkot ni Yesus: “Ma’anouw tu’u Ku lumila’la nyia wia nikouw, ta’an nikouw kouw reiy’ laa ma’eman; ⁶⁸ wo ma’anouw tu’u Ku mueiyla sapa wia nikouw, ta’an nikouw kouw reiy’ laa mingkot. ⁶⁹ Muleiy en teakan si Oki’ ni Tou si rimuberouw witu esa nga weka lele’os ni Empung Si Kasakuasa.” ⁷⁰ Pokeiy nea nu waya: “Sa tuana, Nikoo i yi’i si Oki’ ni Empung?” Wingkot ni Yesus: “Nikouw nuesa si limila’la, kaa Niaku mouw si Oki’ ni Empung.” ⁷¹ Laa o pokeiy nea: “Edon sapa ta madunge’ kasi eng kasairian? Nikita i yi’i ta liminga mola nyi’a witu en suma-Na nuesa.”