¹ Katoroan si Yesus nu kuma’ati eng gio-Na, Sia lumoo se tou-tou kaya se ghimoremla en sesempe nea witu eng gorem em piti sesempean. ² Sia lumoo’ kangkasi siesa balu miskin ghimoremla e rua peser witu eng gorem em piti i ti’i. ³ Laa o Sia lumila’: “Niaku ku lumila’me wia nikoo, eng kaulitna si balu miskin i yi’i si minee e lumantouwla eng kelaker ta’an em baya ne tou i ti’i. ⁴ Karengan nisea nu waya se minee en sesempe nea witu eng kinalokonan nea ta’an si balu i yi’i si minee witu eng kareiy’awesanna awes tare nisia si minee e minapekasa eng kamangna.” ⁵ Katoroan se pirala tou se mesesusuiy tanume em Bait ni Empung wo ma’erangla em bangunan i ti’i e lino’or ampit e watu wangun-wangun wo ampit e minegheghioan barang sesempe, o lumila’ mouw si Yesus: ⁶ “Sapa e linoo’mu witu – e laa meiy e nendona witu e wisa reiy’la esa watu tu’u e laa i wayala rumeta’ witu natas e watu walina; em baya nyi’a e laa i rewala.” ⁷ Wo se murid-murid se minueiy wia si Yesus, pokeiy nea: “Guru, kawisa ku’a re’en e ni’itu laa mamuali? Wo sapa ku’a re’en eng kowa’na, sa i tu laa mamuali?” ⁸ Wingkot-Na: “Mategha-teeghamola, rio kouw te’a i seipla. Karengan kelaker se tou laa meiy ampit mepakela e ngaran-Ku wo lumila’: Niaku mouw Sia, wo: Nedona en tawi mouw. Te’a mouw kouw kumi’itla nisea. ⁹ Wo sakawisa kouw luminga tanume em perang wo em peranguan, te’a mouw kouw i kalo’osit. Karengan em baya nyi’a i ti’i e lewo’ sa reiy’ mamualipe’la rior, ta’an e ni’itu reiy’ makapenoron eng kesampetanna e laa makarengan meiy.” ¹⁰ Sia lumila’ wia nisea: “Se bangsa se laa tumo’or sumaru se bangsa wo eng keraja’an sumaru eng keraja’an, ¹¹ wo e laa mamuali em pengero’ kasa ringka’ wo witu e reiy’ sa mina’asa tampa e laa wawean rumara menganup wo eng kelalenan, wo e laa mamuali kangkasi eng kapualitan-kapualitan makalo’ositen wo eng kowa’-kowa’ kasa ringka’ waki langit. ¹² Ta’an nu reiy’pe’ em baya nyi’a i ti’i nikouw kouw laa sikopen wo ghioan; nikouw kouw laa i sarakan witu e wale-wale ibadat wo em penjara-penjara, wo nikouw kouw laa i sarula wia se raja-raja wo se penguasa-penguasa karengan e ngaran-Ku. ¹³ Eng kapulitan i ti’i e laa mamuali kalempotan wia nikoo kaa laa sumairi. ¹⁴ Kaa ni’itu i tantu mola witu eng gorem e natemu, rio te’a kouw megheghenange’la rior en sesa’alimu. ¹⁵ Karengan Niaku nuesa ku laa meweweela wia nikoo en tetotoren-tetotoren hikmat, i ka’ayo kouw reiy’ toro kawaren ka’apa i pero ne kesaru-kesarumu. ¹⁶ Wo nikoo koo laa i sarakan kangkasi ne tu’amu, ne patuari-patuarimu, kaum ne me’urangmu wo se kalo-kalomu wo se pirala tou witu e nelet miouw se laa wunu’un ¹⁷ wo nikouw kouw laa i kari’iris em baya ne tou karengan e ngaran-Ku. ¹⁸ Ta’an reiy’ siesa tu’u witu em bu’uk eng kokongmu e laa i kaliong. ¹⁹ Sa koo minena’ timaang, nikoo koo laa maka’ato em patou-touannu.” ²⁰ “Sakawisa kouw lumoo’ e Yerusalem kinepung ne tentara-tentara, kete’uanola, karengan eng karonga’anna en tawi mouw ²¹ Witu e nedo ni’itu se tou-tou waki Yudea se lewo’ sa reiy’ tumingkasla en tou waki kakuntungan, wo se tou-tou witu eng gorem eng kota se lewo’ sa reiy’ tumewa, wo se tou-tou waki tewa te’a mouw megheghorem kasi witu eng kota, ²² Kaa ni’itu mouw e masa pesesuli’an witu e wisa e laa malekep waya neiy i kepatik. ²³ Cilaka mouw se ina’-ina’ se kasuatan megandong ka’apa se matoto’la si dade witu e masa ni’itu! Karengan e laa meiy eng kapedisan kasa ringka wia e minapekasa wanua wo wia se bangsa i yi’i, ²⁴ wo nisea se laa mate kaa em beren en santi wo alin tanume si tawanan mea waki se reiy’ sa mina’asa bangsa, wo e Yerusalem e laa i pele’e-le’ek ne bangsa-bangsa reiy’ makasine’u si Empung, i ka’ayo lekepoouw en zaman ne bangsa-bangsa i ti’i.” ²⁵ “Wo e laa wawean eng kowa’-kowa’ wia si endo wo si sumendot wo se sumesena’-sumesena’ wo wia em bumi se bangsa -bangsa se laa meide’ wo likoko mesesarula e nerut wo e wuayana en tasik. ²⁶ Tou si laa mate kineide’an karengan si melie-lieiy minato’orong ampit e reiy’ sa mina’asa sapa en timoro em bumi i yi’i, karengan eng kuasa-kuasa langit e laa tumenggo’ogho’ ²⁷ Witu e nedo ni’itu se tou se laa lumoo’ si Oki’ ni Tou mineiy witu e linaak ampit e reiy’ sa mina’asa kakuasa’an wo eng kamulia’an-Na. ²⁸ Sakawisa em baya nyi’a i ti’i muleiy mamuali, tumo’orouw i ka’atouw eng giomu, karengan em pelelawirannu en tawi mouw.” ²⁹ Laa o lumila’la si Yesus em peulurela i yi’i wia nisea: “Weeanola ghenang e nakana ara ka’apa e nakana sapa i te. ³⁰ Sakawisa kouw lumoo’ e nakana-nakana i ti’i en simuru mouw, kete’uan niouw ampit en sandirina kaa noras e ra’ar en tawi mouw. ³¹ Tuanakan kangkasi, sa kouw lumoo’ eng kapualitan-kapualitan i ti’i mamuali, kete’uanola, kaa eng Keraja’an ni Empung en tawi mouw. ³² Niaku ku lumila’me wia nikoo: Eng kaulitna se angkatan i yi’i se reiy’ laa lumeas, nu reiy’pe’ em baya nyi’i mamuali. ³³ Langit wo em bumi e laa lumeas, ta’an e lelila’eng-Ku e reiy’ laa lumeas.” ³⁴ “Tayuranouw en toumu, rio e natemu te’a mawuta ampit em pelesir wo eng katinawean ma’an eng kapoongan-kapoongan eng kaoatan wo rio e nendo ni Tuhan te’a tu lumo’ositi o lumenta’ witu natas en tuomu tanu e nesa we’etes. ³⁵ Karengan nyi’a e laa tumoro em baya ne penduduk em bumi i yi’i. ³⁶ Te’amaena-ena’ mategha-tegham kasuatan masombayang, rio kouw maka’ato kaketeran kaa laa i kase’engket witu em baya e laa mamuali i ti’i, wo rio kouw taang rumedeiy witu en sinaru ni Oki’ ni Tou.” ³⁷ Witu e nendo oat Yesus si mawee teturu’ witu em Bait ni Empung wo witu e nendo wengi Sia rumou’ wo minapawengi waki kuntung mekengaran Bukit Zaitun. ³⁸ Wo e memo’odope’ em baya ne tou kelaker se mineiy wia-Nisia witu eng gorem em Bait ni Empung kaa se meiy melelingala Nisia.