¹ Laa o tumo’orouw se minapekasa en sidang i ti’i wo si Yesus si niali sumaru si Pilatus ² witu o sea muleiy mature Nisia, pokeiy nea: “E niato meiy mola, kaa sitou i yi’i si manginseipla se bangsa meiy, wo mepalouw mear em pajak wia si Kaisar, wo tanume en tou-Na Nisia si meila’la, kaa Nisia nyi’a mouw si Kristus, nyi’a i ti’i Raja.” ³ Pilatus si minueiy wia-Nisia: “Nikoo ku’a re’en si raja ne tou Yahudi?” Wingkot ni Yesus: “Nikoo nuesa si limila’la nyi’a.” ⁴ Pokeiy ni Pilatus wia se imam-imam kepala wo se minapekasa tou kelaker i ti’i: “Niaku ku reiy’ minatola kaselokan sapa tu’u wia sitou i yi’i.” ⁵ Ta’an nisea se kasa ente’ mase’esek, pokeiy nea: “Nisia si meule’ se rakyat ampit en teturu’-Na wia minapekasa Yudea, Nisia si minuleiye’mi waki Galilea wo mina’ayo momi wia nyi’i.” ⁶ Katoroan si Pilatus nulimingala ni’itu sia mueiy, sapa ku’a re’en sitou i ti’i sitou Galilea. ⁷ Wo eng katoroan nisia nu mete’ula, kaa si Yesus sitou waki wilayah ni Herodes, sia si minakialime Nisia sumaru si Herodes, si witu e nedo ni’itu si waki kangkasi Yerusalem. ⁸ Katoroan si Herodes nu limoo’ si Yesus, nisia si kasa mepa’a-pa’ar. Karengan e nure mouw sia pa’ar meleloo’-Nisia, karengan nisia si re’eregh malingala en tanume Nisia, awes kangkasi nisia si maarapla meleloo’ eng kumura si Yesus matuanala e nesa kowa’. ⁹ Nisia si mina’ayola laker wewueiyen wia si Yesus, ta’an si Yesus si reiy’ miningkotla sapa tu’u. ¹⁰ Kasuatan e ni’itu se imam-imam kepala wo se ahli-ahli Taurat se minea waki muka wo ma’yola en teturean-teturean wuter wia Nisia. ¹¹ Takar muleiy mouw si Herodes wo se pasukanna maweleiy wo menero-nero’la Nisia, nisea se minakela eng karaiy kewangko’an wia-Nisia wo i papa’alime sumeup waki si Pilatus. ¹² Wo witukan e nendo i ti’i kangkasi se mekalo mouw si Herodes wo si Pilatus; nu reiy’pe ni’itu nisea se makatokol. ¹³ Wo erurela ni Pilatus se imam-imam kepala wo se pa’aka-aka’an-pa’aka-aka’an ma’an se rakyat, ¹⁴ wo lumila’ wia nisea: “Nikouw kouw minali momi sitou i yi’i wia niaku tanume sitou maseipla se rakyat. Kouw limoo’ mouw sandiri niaku nu mineriksa Nisia, wo witu eng kaselokan-kaselokan neiy miouw i turela wia-Nisia reiy’la e niatokula wia-Nisia. ¹⁵ Wo si Herodes kangkasi reiy’, karengan nisia si minapa’alimi Nisia marengi wia nikeiy. Eng kaulitna reiy’la e nesa sapa tu’u en siniwo-Nala e waar ampit e nukuman paten. ¹⁶ Jadi niaku ku laa sumiasa Nisia, laa o rumeta’la-Nisia.” [ ¹⁷ Karengan nisia si lewo’ sa reiy’ rumeta’la tou i wee nisea witu e nendo wangko’ i ti’i.] ¹⁸ Ta’an nisea se marekeiy mewali-wali: “Re’inola Sia, i reta’ mola si Barabas i wee nikeiy!” ¹⁹ Barabas i yi’i si neiy i ghoremla witu eng gorem em penjara minato’orongan ampit e nesa pinarontakan minamualila witu eng gorem eng kota wo eng karengan em pawunu’an. ²⁰ Mekasape’ kasi si Pilatus meila’ ampit eng kaante’ wia nisea, karengan nisia si pa’ar merereta’la si Yesus. ²¹ Ta’an nisea se marekeiy masingkomla nisia, pokeiy nea: “Salibenola Sia! Salibenola Sia!” ²² Pokeiy ni Pilatus eng kateluna wia nisea: “Kalewo’an sapa nulitna en tinuana mola ni tou i yi’i? Reiy’la siesa kaselokan tu’u niatokula wia-Nisia, e waar ampit e nukuman paten. Jadi niaku ku laa sumiasa Nisia, laa o rumeta’la-Nisia.” ²³ Ta’an ampit marekeiy nisea se mase’esek wo makiwee, rio Sia i salibla, wo eng kamurianna sea se minuntung ampit e rekeiy nea. ²⁴ Laa o i tantula ni Pilatus, rio en teturean nea e le’ele’ala. ²⁵ Wo sia rumeta’la sitou neiy i ghoremla witu eng gorem em penjara karengan em parontakan wo em pawunu’an i ti’i minatoroan ampit en teturean nea, ta’an si Yesus si neiy i sarakannala wia nisea kaa laa petetuananla witu eng kepa’a-pa’aran nea. ²⁶ 26 Katoroan sea nu maali si Yesus, nisea se timaangla siesa tou mekengaran Simon waki Kirene, si tare mouw i te meiy waki luar kota, laa o sia reta’ala en salib i ti’i witu natas em palukana, rio tu pesa’anenna kasuatan maki’itla si Yesus. ²⁷ Kasa ka’asa’an se tou maki’itla Nisia; witu e neletna laker se wewene maame’ wo ma’aripla Nisia. ²⁸ Yesus si limenge wia nisea wo lumila’: “Heiy puteri-puteri Yerusalem, te’a mouw kouw maame’la Niaku, ta’an i te maame’ mola en toumu nuesa wo se oki-oki’mu! ²⁹ Karengan loo’on, e laa meiy masana se tou lumila’: Ma’aruiyola se wewene mandul wo e rahimna reiy’ ma’an mekasa tumimea’la, wo en toto’na e reiy’ ma’an mekasa tumoto’la. ³⁰ Takar se tou se laa muleiy lumila’ wia se kuntung-kuntung: Rumonga’ mouw tumoromi nikeiy! wo eng kentur-kentur: Tawunanomi keiy! ³¹ Karengan sa sitou sumiwo en tuana ampit eng kayu matou-tou, sapa mouw e laa mamuali ampit eng kayu pera?” ³² Wo wawean kangkasi se rinawir se rua tou walina, sea i ti’i se rua lumelewo’ se pe’ukumen paten mewali-wali ampit Nisia. ³³ Katoroan sea nu i ka’ayola waki tampa mekengaran Tereuka’, sea sumalibla si Yesus witu wo kangkasi se rua tou meneniwo lewo’ i ti’i, siesa si witu esa nga weka lele’os-Na wo siesa si witu esa nga weka kaawi-Na. ³⁴ Yesus si limila’: “Oh Ama’, ampungala sea, karengan nisea se reiy’ mete’u sapa en siniwo neala.” Wo nisea se kimoba’la kaa meweweteng e labung-Na. ³⁵ Se tou kelaker se rimedeiy witu wo limoo’ em baya nyi’a. Se pa’aka-aka’an-pa’aka-aka’an se masero’ wia Nisia, pokeiy nea: “Se tou walina se linawir-Nala, ma’anouw en teakan Sia lumawirla en tou-Na nuesa, sa Nisia mouw si Mesias, sitou pineleng ni Empung.” ³⁶ O kangkasi se perajurit-perajurit se menero-nero’la wia Nisia; nisea se minayatla e nanggor esem wia-Nisia ³⁷ wo lumila’: “Sa Nikoo mouw si raja ne tou Yahudi, lawirenola en tou-Mu!” ³⁸ Wawean kangkasi neiy i kepatik witu natas eng kokong-Na: “Yi’i mouw si raja ne tou Yahudi”. ³⁹ Siesa wia se meneniwo lewo’ neiy i sangkong i ti’i si minojat Nisia, pokeiyna: “Reiy’ ku’a re’en Nikoo nyi’a mouw si Kristus? Lawirenola en tou-Mu wo nikeiy!” ⁴⁰ Ta’an siesa si timogor nisia, pokeiyna: “Reiy’ ku’a re’en meide’ koo, o reiy’ kangkasi wia si Empung, kasuatan nikoo koo minaka’ato e nukuman masuat? ⁴¹ Nikita ta memang waar ukumen, karengan nikita ta minaka’ato suli’ e waar ampit em pasiwo-siwon ta, ta’an sitou i yi’i si reiy’ simiwola sapa en selok.” ⁴² Laa o sia lumila’: “Yesus, ghenangela niaku, sakawisa Koo meiy tanume si Raja.” ⁴³ Pokeiy ni Yesus wia nisia: “Niaku ku lumila’me wia nikoo, eng kaulitna e nendo i te i yi’i kangkasi nikoo koo laa mewali-wali ampit Niaku waki Firdaus.” ⁴⁴ Katoroan ni’itu e nendo wo’o mouw wona’ jam dua belas, o laa eng kareideman simongkouwi e minapekasa en daerah i ti’i i ka’ayo en jam tiga, ⁴⁵ karengan siendo si reiy’ masena’. Wo em peremel em Bait Suci minaparua. ⁴⁶ Laa o maaleiy si Yesus eng kaente’: “Oh Ama’, witu e lawas-Mu i sarakan-Kula e nyawa-Ku.” Wo Sia nu limila’ mola en tuana Sia sumarakanla e nyawa-Na. ⁴⁷ Katoroan si kepala pasukan nu limoo’ sapa e minamuali, sia lumo’orla si Empung, pokeiyna: “E nulit, sitou i yi’i nyi’a mouw sitou ulit!” ⁴⁸ Wo nu reiy’ mouw i tu em baya ne tou kelaker, se mineiy muyut witu kaa em pa’aton i ti’i, se meleloo’ sapa e minamualila i ti’i, marengouw sea kasuatan memewe-mewe en tou. ⁴⁹ Em baya ne tou se kasa sumine’u si Yesus, ampitouw se wewene-wewene kimi’iti ampit Nisia waki Galilea, se rimedeiy mina’aka-wa’akat wo meleloo’ em baya nyi’a i ti’i. ⁵⁰ Wawean siesa tou mekengaran Yusuf. Nisia si anggota Majelis Wangko’, wo siesa tou le’os si ulite’ kasi. ⁵¹ Nisia si reiy’ esa nga iyon ampit em putusan wo e winta’ ne Majelis i ti’i. Nisia si asal waki Arimatea, e nesa kota Yahudi wo nisia si mengena-ngena’la eng Keraja’an ni Empung. ⁵² Nisia si minea sumaru si Pilatus wo kumiwee e mayat ni Yesus. ⁵³ Wo nu reiy’ mouw nisia nu timumpala e mayat i ti’i, sia kumafanla nyi’a ampit e roko’ lenan, laa o i gholeiynala witu eng gorem eng kubur kiniar witu eng gorem eng kuntung watu witu e reiy’pe’ ma’an mekasa gholeiyala mayat. ⁵⁴ E nendo ni’itu nyi’a mouw e nendo patiro’an wo en sabat en tawi mouw muleiy. ⁵⁵ Wo se wewene-wewene se mineiy mewali-wali ampit si Yesus waki Galilea, se kimi’it mewali-wali wo nisea se limoo’ eng kubur i ti’i wo kumura e mayat-Na neiy i gholeiyla. ⁵⁶ Wo sea nu minarengouw, sea sumadiala rampa-rampa wo e lana mur. Wo witu e nendo Sabat sea maseng i ki’it e nukum Taurat,