¹ Yesus si ghimorem waki kota Yerikho wo makelang mapawee-wee malease eng kota i ti’i. ² Witu wawean siesa tou mekengaran Zakheus, si kapala ne mememurut cukai, wo nisia sitou kaya. ³ Nisia si me’inakut laa meleloo’ sa tou en sapa ku’a re’en si Yesus i ti’i, ta’an nisia si reiy’ i kaloo’ kaa se tou se kelaker, karengan e nouwakna em potot. ⁴ Takar tumingkasouw sia rumeriorla se tou kelaker, laa o kumawok e nakana ara kaa laa meleloo’ si Yesus, laa lumangkoiy witu. ⁵ Katoroan si Yesus i ka’ayola witu en tampa i ti’i, Sia kuma’atla wo lumila’: “Zakheus, makarenganouw tumumpa, karengan e nendo i yi’i Niaku ku lewo’ sa reiy’ tume’up waki walemu.” ⁶ Laa si Zakheus si makarengan timumpa wo sumungkul si Yesus ampit e mepa’a-pa’ar. ⁷ Ta’an em baya ne tou se limoo’ eng kapualitan i ti’i se mengu’ungu-ngu’ungul, pokeiy nea: “Nisia si time’up witu em bale ni tou berdosa.” ⁸ Ta’an si Zakheus si rimedeiy wo lumila’ wia si Tuhan: “Tuhan, esa nga parua witu eng kapunya’angku e laaku i weela wia se tou miskin wo sa wona’ wawean sapa em pinerasku wia sitou e laa ku i wareng maka epat lumepet.” ⁹ Pokeiy ni Yesus wia nisia: “E nendo i yi’i minamuali mola eng kelawiran wia em bale i yi’i, karengan sitou i yi’i tu’u sioki’ ni Abraham. ¹⁰ Karengan si Oki’ ni Tou si mineiy kaa meiy mesesero wo melelawirla se neiy i kaliong.” ¹¹ I wee nisea se limingala Nisia si witu, Yesus si minapawee-weela elelila’an-Na ampit e nesa peulurela, karengan Nisia si tawi mouw e Yerusalem wo nisea se mapokeiyla, kaa eng Keraja’an ni Empung e laa makarengan kaloo’an. ¹² Takar Sia lumila’: “Wawean siesa bangsawan si minae waki e nesa wanua kasa wa’akat kaa si pepepopon mamuali raja witu wo nu reiy’ mouw i tu tare sia mareng. ¹³ Sia kumeret se mapulu’ tou hambana wo meela mapulu’ mina wia nisea, pokeiyna: “Pakenola nyi’i ni’i belante’ i ka’ayo niaku nu meiy sumeup. ¹⁴ Ta’an se tou-tou esa nge bangsana se mari’iris nisia, laa o mapa’alila tetoke tumodeiy wia nisia kaa laa melelila’la: Nikeiy keiy so’o sitou i yi’i sia mamuali raja wia nikeiy. ¹⁵ Wo mamuali mola, eng katoroan nisia nu marengi, nisia nu pinopo mola minamuali raja, sia rumeo kereten se hamba-hambana, wineeanna mola loit i ti’i, rio mamete’ula sa takura e wua’na em belante’ nea siesa o siesa. ¹⁶ Sitou ketare-tare si mineiy wo lumila’: Tuang, e mina ni tuang esa i ti’i e minua’ mola mapulu’ mina. ¹⁷ Pokeiyna wia sitou i ti’i: Eng kasa le’os em pasiwo-siwonnu i ti’i, heiy hamba le’os; nikoo koo lale’ mouw witu em perkara rintek, kaa ni’itu sungkulenouw eng kakuasa’an witu e mapulu’ kota. ¹⁸ Meiy mouw si karua wo lumila’: Tuang, e mina ni tuang minua’ mola lima mina. ¹⁹ Pokeiyna wia sitou i ti’i: Wo nikoo, kontoiyanouw e lima kota. ²⁰ Wo si hamba katelu si mineiy wo lumila’: Tuang, nyi’i mouw e mina ni tuang, niaku ku timu’utulla e ni’itu witu lenso. ²¹ Karengan niaku ku meide’ si tuang, kaa si tuang sitou kete; tuang si maedo sapa e reiy’pe’ ma’an mekasa i reta’ ni tuang wo si tuang si meupu’ sapa e reiy’ neiy i keror ni tuang. ²² Pokeiyna wia sitou iti’i: Heiy hamba lewo’, niaku ku laa makimla nikoo ni’i ki’it e lelila’annu nuesa. Nikoo koo mete’u kaa niaku nyi’a mouw sitou kete, ku maedo en sapa e reiy’pe’ ma’an mekasa i reta’kula wo ku meupu’ witu en sapa e reiy’ neiyku i keror. ²³ Sa tuana, ka’a e loitku i ti’i e reiy’ neiynu i weela wia sitou makelang loit? Takar eng kewewarengku ku toro medola nyi’a mewali ampit em bungangna. ²⁴ Laa o pokeiyna wia se tou-tou rimedeiy witu: Edonouw e mina esa i ti’i wia nisia wo i wee mola wia sitou makapunya mapulu’ mina i ti’i. ²⁵ Pokeiy nea wia nisia: Tuang, nisia si makapunya mouw e mapulu’ mina. ²⁶ Wingkotna: Niaku ku lumila’me wia nikoo: Susur tou si makapunya, wia nisia si laa weean, ta’an seiy si reiy’ makapunya, wia nisia e laa edon, o kangkasi sapa em bia nisia. ²⁷ Ta’an em baya se kesaruku i yi’i, se reiy’ pa’ar niaku ku minamuali raja nea, alinomi sea wia nyi’i wo wunu’unouw witu en sinaru em berenku.” ²⁸ Wo nu reiy’ mouw Nisia nu limila’la em baya nyi’a i ti’i Yesus si rimeriorla wia nisea wo mapawee-weela em pakela-kelangan-Na mea waki Yerusalem. ²⁹ Katoroan Nisia nu tawi mouw em Betfage wo em Betania, rimeta’ waki kuntung mekengaran Bukit Zaitun, Yesus si rimeo se rua murid-Na ³⁰ ampit e nower: “Mea mouw waki wanua witu en sinarumu i ti’i: Witu eng katoroan kouw nu ghumorem witu nikouw kouw laa matola siesa keledai muda si neiy i ka’antung, si reiy’pe’ ma’an mekasa sakeala ni tou. I reta’ mola si keledai i ti’i wo alinomi wia nyi’i. ³¹ Wo sa wawean sitou mawueiyla wia nikoo: Ka’a kouw rumeta’la nisia? Wingkotenouw teinti’i: Tuhan si mepadungla nisia.” ^{32 34} Laa o mea mouw se i pareo i ti’i, wo sea matola e reiy’ sa mina’asa wo’o sapa en tanu mouw neiy i lila’la ni Yesus. ³³ Katoroan nisea nu rumeta’la si keledai i ti’i, lumila’ mouw sitou makapunya si keledai i ti’i: “Ka’a kouw rumeta’la si keledai i ti’i?” 34 Pokeiy nea: “Tuhan si mepadungla nisia.” ³⁵ Nisea se minali si keledai i ti’i wia si Yesus, laa o ali’an nea ampit e labung nea wo tumulung si Yesus sumeret witu natasna. ³⁶ Wo eng kasuatan si Yesus nu maali si keledai i ti’i nisea se mapitarla e labung nea witu lalan. ³⁷ Katoroan Sia nu tawi mouw e Yerusalem, witu en tampa lalan memerosi waki Bukit Zaitun, muleiy mouw em baya ne murid matepe-teper Nisia se mepa’a-pa’ar wo malo’or si Empung ampit en suara menaleinteng karengan e reiy’ sa mina’asa mujizat e linoo’ nea mola. ³⁸ Pokeiy nea: “Binerkatola Sia nu mineiy tanume si Raja witu e ngaran ni Tuhan, dame sejahtera waki sorga wo eng kamulia’an waki tampa kasarakek!” ³⁹ Pirala tou Farisi se kimi’it ampit se tou kelaker i ti’i se limila’ wia si Yesus: “Guru, togorela se murid-murid-Mu i ti’i.” ⁴⁰ Wingkot-Na: “Niaku ku lumila’me wia nikoo: Sa nisea i yi’i se makapenes, takar em batu i yi’i e laa rumekeiy.” ⁴¹ Wo eng katoroan si Yesus tawi mouw wo lumoo’ eng kota i ti’i, Sia si miname’la nyi’a, ⁴² pokeiy-Na: “Ohoiy, kumura eng kale’osna sa wia nendo i yi’i kangkasi koo mangarti sapa em pemandungen i wee en dame sejahteramu! Ta’an en teakan eng kapualitan i ti’i neiy i kakirong i wee em berennu. ⁴³ Karengan e laa meiy e nendona, kaa si kesarumu si laa lumedongla nikoo ampit e rereen, laa o kumepung nikoo wo kumimpit nikoo witu e reiy’ sa mina’asa ruuna, ⁴⁴ wo nisea se laa munengla nikoo ampitouw se pendudukmu wo witu eng kedir watumu nisea se reiy’ laa mayala e nesa watu tu’u e minena’ rimeta’ witu natas em batu walina, karengan nikoo koo reiy’ mete’ula e nedo, sakawisa si Empung lumalesi nikoo.” ⁴⁵ Olaa si Yesus ghumorem witu em Bait ni Empung wo muleiy mouw Sia meure’ em baya ne belante’ witu, ⁴⁶ pokeiy-Na wia nisea: “Wawean neiy i kepatik: Wale-Ku nyi’a mouw e wale sesombayangan. Ta’an nikouw kouw masiwola nyi’a sala ne penyamun.” ⁴⁷ Susur e nendo Sia si mawee teturu’ witu eng gorem em Bait ni Empung. Se imam-imam kepala wo se ahli-ahli Taurat ma’an se tou kasa i pamuka-muka wia se bangsa Israel se me’inakut mepepunengla Nisia, ⁴⁸ ta’an nisea se reiy’ mete’u, kumura e lewo’ sa reiy’ tuanan neala, karengan se minapekasa rakyat se neiy i kepa’ar wia-Nisia wo se pa’ar melelingala Nisia.