¹ E neiy i maksudla e nyi’a mouw: eng keurean siesa ahli waris si reiy’pe’ dewasa, ma’an oki’ i te tu’u nisia si reiy’ silaeng ampit siesa hamba, ma’anouw tu’u sia mouw si tuang ne reiy’ sa mina’asa e wo’o sapa; ² ta’an nisia si witu e wawa’ em pe’uru-urusan wo em pategha-tegha’an i ka’ayola witu e nedo e neiy mouw i tantula ni ama’na. ³ En tuanakan kangkasi nikita: eng keurean ta reiy’pe’ dewasa, ta tu’utuk kangkasi witu e roh-roh eng kaoatan. ⁴ Ta’an nu lekepouw e nedona, takar si Empung si tumoke si Oki’-Na, si minatoumi wia siesa wewene wo si tu’utuk witu e nukum Taurat. ⁵ Nisia si neiy i toke kaa laa tumubus nisea, se tu’utuk witu e nukum Taurat, rio kita sungkulen mamuali oki’. ⁶ Wo eng karengan nikouw mouw si oki’, takar si Empung si rimeo mouw e Roh ni Oki-Na lumaa witu eng gorem e nate ta, e maaleiy: “Ya Abba, ya Ama’!” ⁷ Jadi nikouw kouw reiy’ mouw kasi hamba, ta’an i te oki’; sa wona’ kouw oki’, takar nikouw kangkasi kouw ahli-ahli waris, kaa si Empung. ⁸ 8 Eng ketarean, eng katoroan nikouw nu reiy’ sumine’u si Empung, niaku ku minapahambala en tou wia se empung-empung e witu eng kaulitna se reiy’ Empung. ⁹ Ta’an en teakan nu reiy’ mouw nikouw nu simine’u mola si Empung, ka’apa eng kasa le’os, nikouw nu sinine’u mola ni Empung, kumura mouw re’en ku’a o kouw mepepurikite’ kasi witu e roh-roh eng kaoatan e lewea’ wo e deila sapa wo pa’ar mememuleiy mapahambala en tou kasi wia nisia? ¹⁰ Nikouw ampit eng kasa maato-ato mapiara e nendo-nendo e neiy i ketantu, en sumedot-sumedot, e masa-masa tataap wo en te’un-te’un. ¹¹ Niaku ku lieiy sa wona’ em pinemedu-meduangku i wee nikouw e minaghio-ghio mouw. ¹² Niaku ku makiwee wia nikoo, patuari waya, mamuali mouw tanu niaku, karengan niaku tu’u ku minamuali mouw masuat en tanu nikouw. E reiy’pe’ ma’an mekasa ku me’anla e wo’o sapa e reiy’ le’os waki nikoo. ¹³ Kete’uan niouw, kaa niaku eng kasa ketare ku minabarola e Injil wia nikoo kaa eng karengan niaku e raran witu e nouwakku. ¹⁴ Uli-ulit tu’u en tuana eng ka’ada’an e nouwakku i ti’i, en tanukan em pewa’awa’ wia nikouw, ta’an nikouw kouw reiy’ mapokeiyla e nyi’a en tanume e wo’o sapa eng hina wo e makari’irisen, ta’an nikouw kouw simungkulouw niaku, e masuat tanu en simungkul siesa malaikat ni Empung, awes tare e masuat en tanu en simungkul si Kristus Yesus nuesa. ¹⁵ Kumura mouw eng ka’aruiyna nikouw nu witu e nedo ni’itu! Wo en teakan, witu e wisa ku’a re’en e naruiymu i ti’i? Karengan niaku ku toro sumairi en tanume nikouw, kaa sa wona’, kouw timu’ilouw em beren nu wo mineela e nyi’a wia niaku. ¹⁶ Sapa ku’a re’en e ampit e limila’la eng kaulitan wia nikoo niaku ku minamuali mouw kesarumu? ¹⁷ Nisea ampit eng kasa mengente’ se me’inakut kaa laa mekekeong nikouw, ta’an e reiy’ ampit eng kauli-ulitan e nate, karengan nisea se pa’ar mesesea’la nikouw, rio kouw ampit eng kasa mengente’ maki’itla nisea. ¹⁸ Memang le’os sa sitou si kasa mengente’ me’inakut mekekeong tou walina witu em perkara-perkara le’os, ta’an witu en susur e nedo wo e reiy’ i te sa aku witu e neletmu. ¹⁹ Hey oki-oki’ku, karengan nikouw o ku peme’itan e rumara matimea’ kasi, i ka’ayo eng gio ni Kristus e minamuali pakaloo’o-loo’ola witu nikouw. ²⁰ Eng kumura e leloku kaa laa witu e nelet miouw witu e nedo i yi’i wo toro sumusuiy ampit en suara walina, karengan niaku ku kina’apuanouw akal mesarula nikouw. ²¹ mola wia niaku, hey kouw si pa’ar matou-tou witu e wawa’ e nukum Taurat, reiy’ ku’a re’en nikouw kouw melelingala e nukum Taurat? ²² Reiy’ ku’a re’en e wawean neiy i kepatik, kaa si Abraham si makapunya rua oki’, siesa wia si wewene si minamuali hambana wo siesa wia si wewene merdeka? ²³ Ta’an si oki’ wia si wewene si minamuali hambana i ti’i si neiy i peurangla i ki’it e le’ona wo si oki’ wia si wewene merdeka i ti’i kaa eng karengan en ta’ar. ²⁴ E nyi’i e nyi’a mouw e nesa kiasan. Karengan se rua wewene i ti’i e nyi’a mouw se rua katantuan ni Empung: siesa si asal waki kuntung Sinai wo si timimea’la se oki-oki’ pehamba’an, e ni’itu mouw si Hagar – ²⁵ Hagar nisia mouw si kuntung Sinai waki en tana’ Arab – wo nisia si masuat ampit e Yerusalem en teakan, karengan nisia si matou-tou witu em pehamba’an ampit se oki-oki’na. ²⁶ Ta’an e Yerusalem sorgawi e nyi’a mouw si wewene merdeka wo nisia mouw si ina’ ta. ²⁷ Karengan e wawean neiy i kepatik: “Mepa’a-pa’arola , hey si mandul si reiy’ ma’an mekasa tumimea’la! Lumaya-laya’ wo rumio-rio mouw, hey koo si reiy’ ma’an mekasa e peme’itan e rumara matimea’! Karengan si neiy i tele’ula ni tu’atuamana si laa makapunyala lebe laker oki’ ta’an si makatu’atuama.” ²⁸ Wo nikouw, patuari waya, nikouw kouw masuat tanu si Ishak e nyi’a mouw si oki-oki’ en ta’ar. ²⁹ Ta’an en tanu eng ketarean, nisia, si neiy i peurangla i ki’it e le’ona, si simiasa se neiy i peurangla i ki’it e Roh, en tuanakan kangkasi en teakan i yi’i. ³⁰ Ta’an sapa e lelila’an eng Kitab Suci? “I ure’ mouw si hamba wewene i ti’i ma’an si oki’na, karengan si oki’ ni hamba wewene i ti’i si reiy’ laa mamuali ahli waris mewali-wali ampit si oki’ ni wewene merdeka i ti’i.” ³¹ Kaa e ni’itu, patuari waya, nikita ta reiy’ mouw oki-oki’ ni hamba wewene, ta’an i te oki-oki’ ni wewene merdeka.