¹ Hey tou-tou Galatia si we’engel, seiy ku’a re’en si minilotola nikouw? Reiy’ ku’a re’en si Yesus Kristus si neiy i salibla i ti’i si neiy mouw i lukisla ampit eng katerangna witu en sinarumu? ² E nyi’i i te e laa petete’ungkula waki nikouw: Sapa ku’a re’en nikouw kouw simungkulola e Roh karengan e matuanala e nukum Taurat ka’apa eng karengan ma’eman witu em paabaran e Injil? ³ Sapa ku’a re’en nikouw kouw kawe’engel e ni’itu? Nikouw kouw minuleiy mouw ampit e Roh, pa’ar ku’a re’en nikouw en teakan kumawusla e nyi’a witu e le’ona? ⁴ E minaghio ku’a re’en em baya em pine’anan niouw momi eng kelaker e ni’itu? Ma’an tu’u e minaghio! ⁵ Jadi kumura en teakan, sapa ku’a re’en Nisia si minanugerahla e Roh wia nikouw ampit e meloko-lokon wo si timuanala e mujizat witu e nelet miouw, si masiwo en tuana karengan nikouw kouw matuanala e nukum Taurat ka’apa eng karengan nikouw kouw ma’eman witu em paabaran e Injil? ⁶ Kenaramen e ni’itu mouw kangkasi o si Abraham si ma’eman wia si Empung, en takar si Empung si minaparekenla eng kapualitan i ti’i wia nisia en tanume eng kaulitan. ⁷ Jadi loo’on niouw, kaa nisea se matou-tou waki e iman, nisea i ti’i mouw se oki-oki’ ni Abraham. ⁸ Wo eng Kitab Suci, e nu reiy’pe’ e nyi’a e minamete’ula, kaa si Empung si minangiulitola se tou-tou reiy’ Yahudi kaa eng karengan e iman, eng kasa mouw kimetare minabarla e Injil wia si Abraham: “Kaa nikoo se reiy’ sa mina’asa bangsa se laa berkaten.” ⁹ Jadi nisea se matou-tou waki e iman, nisea mouw se binerkatla mewali-wali o si Abraham si maka iman i ti’i. ¹⁰ Karengan em baya ne tou, se matou-tou witu em pepa’ayangen e nukum Taurat, se witu e wawa’ eng kutok. Karengan e wawean neiy i kepatik: “I kakutokola sitou reiy’ lale’ matuanala e reiy’ sa mina’asa wo’o sapa e neiy i kepatik witu eng kitab e nukum Taurat.” ¹¹ Wo kaa e reiy’la sitou si neiy i ulitla witu en sinaru ni Empung karengan si matuanala e nukum Taurat e nyi’a mouw e leno, karengan: “Sitou ulit si laa matou-tou kaa e iman.” ¹² Ta’an en teto’otolan e nukum Taurat e reiy’ mouw iman, ta’an i te seiy si matuanala e nyi’a, nisia si laa tumou karengan e nyi’a. ¹³ Kristus si timubuusola nikita witu eng kutok e nukum Taurat ampit e lalan si minamuali kutok karengan nikita, karengan e wawean neiy i kepatik: “I kakutokola sitou neiy i sangkong witu eng kayu salib!” ¹⁴ Yesus Kristus si simiwo mola e nyi’i, rio witu Nisia em berkat ni Abraham e ma’ayo wia se bangsa-bangsa walina, i ka’ayo kaa e iman nikita ta maka’ato e Roh e neiy mouw i ta’arla i ti’i. ¹⁵ Patuari waya, le’osouw ku makela e nesa contoh witu em patou-touan en susur en nendo. E nesa wasiat e sinahola, ma’anouw tu’u nisia si waki sitou, e reiy’ mete’u po’opolela ka’apa awesan niesa tou tu’u. ¹⁶ Sapa tu’u wia si Abraham e neiy i totorla e reiy’ sa mina’asa en ta’ar i ti’i wo wia se see’na. E reiy’ neiy i lila’la “e wia se see’-see’na” en tanu mokan e neiy i maksudla eng kelaker tou, ta’an siesa tou i te: “wo wia se see’mu”, e nyi’a i ti’i si Kristus. ¹⁷ E maksudku e nyi’a mouw: En ta’ar nu reiy’pe’ e nyi’a en sinahola ni Empung, e reiy’ mete’u po’opolela e nukum Taurat, en tare mouw rumetik epat nga atus telu nga pulu’ nge te’un kamurian, i ka’ayo en ta’ar i ti’i eng kinaliongan eng kaente’anna. ¹⁸ Karengan, sa wona’ en sapa e neiy i tantula ni Empung e nasal waki e ukum Taurat, nisia si reiy’ asal waki en ta’ar; ta’an awes tare kaa en ta’arouw ni Empung e minanugerah mola e nupus karunia-Na wia si Abraham. ¹⁹ Satuana, sapa ku’a re’en e maksudna e nukum Taurat? Nisia si neiy i awesla karengan em pasiwo-siwon – i ka’ayo meiy se see’ neiy i maksud en ta’ar i ti’i – wo nisia si neiy i pa’ayola ampit em pinaeletan ne malaikat-malaikat witu e lawas ni esa tou mengengelet. ²⁰ Siesa tou mengengelet si reiy’ i te mesawelela siesa tou i te, sedangkan si Empung e nyi’a mouw siesa. ²¹ Satuana, e minasu’usukan ku’a re’en e nukum Taurat ampit en ta’ar-ta’ar ni Empung? Ma’an mekasa e reiy’. Karengan sa andeiyna e nukum Taurat e neiy i weela en tanume e nesa en toro mangintounla, takar e memang eng kaulitan e nasal waki e nukum Taurat. ²² Ta’an eng Kitab Suci eng kimurungola e reiy’ sa mina’asa wo’o sapa witu e wawa’ eng kakuasa’an en dosa, rio kaa eng karengan e iman witu si Yesus Kristus en ta’ar i ti’i e neiy i weela wia nisea se ma’eman. ²³ nu reiy’pe’ e iman i ti’i nu mineiy nikita ta witu e wawa’ em pateperan e nukum Taurat, wo eng kinurung i ka’ayo e iman i ti’i e neiy mouw i papaloo’o-loo’ola. ²⁴ Jadi e nukum Taurat e nyi’a mouw e ma’aka-akala nikita i ka’ayo si Kristus nu meiy, rio kita i ulitla karengan e iman. ²⁵ En teakan e iman i ti’i e mineiy mouw, kaa e ni’itu ta reiy’ mouw witu kasi e wawa’ em pategha’an ni tumeteper. ²⁶ Karengan nikouw nu waya e nyi’a mouw si oki-oki’ ni Empung karengan e iman witu si Yesus Kristus. ²⁷ Karengan nikouw nu waya, si binaptis witu si Kristus, kouw limabungola si Kristus. ²⁸ Witu eng kapualitan i yi’i e reiy’la sitou Yahudi ka’apa sitou Yunani, reiy’la hamba ka’apa tou merdeka, reiy’la si tuama ka’apa wewene, karengan nikouw nu waya e nyi’a mouw siesa witu si Kristus Yesus. ²⁹ Wo sa wona’ nikouw mouw si kapunya’an ni Kristus, takar nikouw mouw kangkasi kouw see’ ni Abraham wo mekehak sumungkul en ta’ar ni Empung.