¹ Kamurian nu limangkoiyouw e mapulu o epat nge te’un, o ku mea kangkasi waki e Yerusalem ampit si Barnabas wo si Titus tu’u si nialiku kangkasi. ² Niaku ku minea en timo’otolela witu e nesa pinapaloo’o-loo’oan. Wo wia nisea e neiy i pitarkula e Injil e neiy i abarkula witu e nelet ne bangsa-bangsa reiy’ Yahudi – witu en sesusuiyen neiy i ketampas wia nisea se paloo’-loo’on –, rio te’a ampit em peghio-ghion niaku ku me’inakut ka’apa mine’inakutola. ³ Ta’an ma’anouw tu’u si Titus, si mewali-wali ampit niaku, e nyi’a mouw siesa tou Yunani, ta’an nisia si reiy’ palupuan kaa laa mesesunatla en touna. ⁴ Memang e wawean en se’esekan waki se patuari-patuari palsu se simori’isip ghimorem, e nyi’a i ti’i nisea se simori’isip witu eng gorem kaa laa ma’adang eng kabebasan ta, eng kapunya’an ta witu si Kristus Yesus, rio ampit e lalan i ti’i nisea se toro mepehambala nikita. ⁵ Ta’an esa nga nedo tu’u nikeiy keiy reiy’ pa’ar mundur wo tumu’utuk wia nisea, rio eng kaulitan e Injil en toro mena-ena’ witu ni kouw. ⁶ Wo en tanume nisea se papokeiyla paloo’o-loo’on i ti’i – kumura eng kadudukan nea eng ketarean, e ni’itu e reiy’ pe’ukumen wia niaku, karengan si Empung si reiy’ matu’us eng gio – kumura mouw tu’u kangkasi, nisea se paloo’o-loo’on i ti’i se reiy’ malupula e wo’o sapa walina wia niaku. ⁷ Ta’an eng kapurikitna, nisea nu limoo’ mola wia niaku e neiy mouw i emanla em paabaran e Injil i wee se tou-tou reiy’ makasunat, e masuat en tanu wia si Petrus i wee se tou-tou makasunat ⁸ – karengan Nisia si minee mola eng kaketeran wia si Petrus kaa laa mamuali rasul i wee se tou-tou makasunat, Nisia kangkasi si minee mola eng kaketeran wia niaku i wee se tou-tou reiy’ makasunat. ⁹ Wo nu limoo’ mola e nupus karunia e neiy i anugerahla wia niaku, takar si Yakobus, Kefas wo si Yohanes, se linoo’ en tanu se tobol uner ne jema’at, minetabea’an ampit niaku wo ampit si Barnabas en tanume eng kowa’ pinaesa’an, rio keiy mea wia se tou-tou reiy’ makasunat wo nisea wia se tou-tou makasunat; ¹⁰ ta’an nikeiy keiy lewo’ sa reiy’ mena-ena’ ghumenang se tou-tou miskin wo memang e ni’itu mouw e nuli-ulit pe’inakutengkula metetuanala e nyi’a. ¹¹ Ta’an e nedo si Kefas nu mineiy waki Antiokhia, niaku ku minakaredeiy simu’usk nisia, karengan nisia si selok. ¹² Karengan nu reiy’pe’ se pirala tou waki e kalangan ni Yakobus nu mineiy, nisia si kimaan esa nga sesakeiyan ampit se patuari- patuari reiy’ makasunat, ta’an nisea nu mineiy mouw, nisia si minundurla en tou wo mina’akatla wia nisea eng karengan si meide’ wia se patuari-patuari makasunat. ¹³ Wo se tou-tou Yahudi walina tu’u se kimi’it mina munafik ampit nisia, i ka’ayo si Barnabas nuesa si neiy i kaki’it eng kamunafikan nea. ¹⁴ Ta’an e nedo niaku nu limoo’, kaa em pasiwo-siwon nea i ti’i e reiy’ minatoroan ampit eng kaulitan e Injil, niaku ku limila’ wia si Kefas witu en sinaru nea nu waya: “Sa koo, esa tou Yahudi, matou-tou eng kenaramen kafir wo e reiy’ eng kenaramen Yahudi, kumura mouw ku’a re’en o koo toro lumupu se patuari-patuari se reiy’ makasunat se laa tumou eng kenaramen e Yahudi?” ¹⁵ I ki’it eng kinatouan neiy e nyia’mouw keiy tou Yahudi wo reiy’ tou berdosa waki se bangsa-bangsa walina. ¹⁶ Eng kete’uan niouw, kaa e reiy’ siesa tou tu’u si neiy i ulitla eng karengan si matuanala e nukum Taurat, ta’an i te eng karengan e iman witu si Kristus Yesus. Kaa e ni’itu nikeiy tu’u keiy ma’emanola wia si Kristus Yesus rio keiy i ulitla kaa eng karengan e iman witu si Kristus wo e reiy’ kaa eng karengan matuanala e nukum Taurat. Karengan: “reiy’la siesa tou tu’u si neiy i ulitla” kaa eng karengan si matuanala e nukum Taurat. ¹⁷ Ta’an sa nikeiy nuesa, eng kasuatan nikeiy nu me’inakut kaa laa i ulitla witu si Kristus eng kaloo’ala nikeiy keiy tou-tou berdosa, sapa ku’a re’en eng kapualitan i ti’i e makapenoron, kaa si Kristus e nyi’a mouw si pelayan en dosa? Ma’an mekasa e reiy’. ¹⁸ Karengan, sa wona’ ku mewewangun sumeup sapa e rinobe’ku mola, niaku ku miapaloo’o-loo’ola en touku ku tanume si lumelangkoiy e nukum Taurat. ¹⁹ Karengan niaku ku minate mouw kaa e nukum Taurat i wee e nukum Taurat, rio ku tumou i wee si Empung. Niaku ku neiy mouw i salibla ampit si Kristus; ²⁰ ta’an niaku ku matou-tou, ta’an e reiy’ mouw kasi niaku nuesa si matou-tou, ta’an i te si Kristus si matou-tou witu niaku. Wo em patou-touangku em patou-touangkula en teakan witu e le’ona, e nyi’a mouw em patou-touan kaa e iman witu si Oki’ ni Empung si mineupusola niaku wo simarakan en touna i wee niaku. ²¹ Niaku ku reiy’ masede’ e nupus karunia ni Empung. Karengan sa wona’na e wawean eng kaulitan kaa e nukum Taurat, takar e minaghio-ghio mouw eng kinepatean ni Kristus.