¹ Kaa e ni’itu niaku ku ngume’enge’la nikouw, niaku, sitou pinenjarala karengan si Tuhan, rio em patou-touannu tanume nu tou-tou kineretouw e minatoroan ampit eng kineretan i ti’i. ² Satorona kouw reiy’ mena’ kumeng ate, rinda, wo sabaar. I papa’ato mola e nupusmu witu eng kapualitan mesesawangan. ³ Wo e me’inakutouw miara em paesa’an e Roh kaa e wina’akes en dame sejahtrah: ⁴ esa nouwak, wo esa Roh, en tanu eng kumura kouw nu kineretouw witu e nesa paarapen eng gimorem witu eng kineretan nikoo, ⁵ esa Tuhan, esa iman, esa baptisan, ⁶ esa Empung wo Ama’ waki em baya waya, si Empung si waki atas em baya waya wo kaa em baya waya wo witu em baya waya. ⁷ Ta’an wia nikita siesa o siesa e neiy mouw i anugerala e nupus karunia i ki’it e nukuran neiy i wee ni Kristus. ⁸ Ni’itu mouw eng karenganna em pokeiy e nats: “Witu en toro e ni’itu Nisia si lumongkot waki en tampa rakek, Nisia si minaali se tawanan-tawanan; Nisia si mineela en tetaber-tetaber wia se tou.” ⁹ Reiy’ ku’a re’en “Nisia si limongkotouw” em penoronna, kaa Nisia kangkasi si timumpa momi wia e weteng em bumi eng kasa wawa’? ¹⁰ Nisia si timumpa momi, Nisia kangkasi si limongkotouw wa’akat e lumantouwla eng kerakek ta’an witu em baya e langit, kaa laa mewewutala e reiy’ sa mina’asa wo’o sapa. ¹¹ Wo Nisia mouw si mineela e le’os se rasul-rasul ka’apa tu’u se nabi-nabi, le’os se mengengabar-mengengabar e Injil ka’apa tu’u se rumerawir-rumerawir wo se mememee teturu’, ¹² kaa laa manginlekepela se tou-tou kudus witu em pepa’ayangen en pelayanan, i wee em pereredeiyan e nouwak ni Kristus, ¹³ i ka’ayo nikita nu waya kita mina’ayo mouw em paesa’an e iman wo en tine’u e ulit en tanume si Oki’ ni Empung, eng kadewasa’an wuta, wo e ransun eng kapatou e minatoroan ampit eng kawuta’an ni Kristus, ¹⁴ i ka’ayo nikita ta reiy’ mouw kasi anakoki’, si’i palengki-lengki’la e reiy’ sa mina’asa e reghes pangajaran kaa em pa’ayangen palsu ni tou witu eng kawilesan nea e makaseipen, ¹⁵ ta’an ampit en te’etep timiboiy witu eng kaulitan witu e nupus nikita ta e tumou witu e reiy’ sa mina’asa eng kapualitan e matorome waki Nisia, si Kristus, e nyi’a mouw si Kokong. ¹⁶ Waki Nisia mouw e minapekasa e nouwak, – e wangun sinusung wo e wina’akes e minamuali esa kaa em pelayanan em baya em betengna, e minatoroan ampit eng kaante’an em pepa’ayangen ne susur anggota – se maka’ato eng kapatouna wo mewewangun en touna witu e nupus. ¹⁷ Kaa e ni’itu i lila’kula wo i ledoskula e nyi’i wia nikoo witu si Tuhan: Te’a kasi matou-tou masuat en tanu se tou-tou reiy’ makasine’u si Empung ampit eng genangna reiy’ sipenoron ¹⁸ wo em pangartianna e reiydem, se wa’akat witu em patou-touan em paasa-asa’an ampit si Empung, karengan eng kawe’engelan e witu nisea wo eng karengan eng kakete watuan e nate nea. ¹⁹ Em pedaman nea en sumpulouw, i ka’ayo sea simarakan en tou witu eng hawa nafsu wo mina’ayangla ampit en sorodo e reiy’ sa mina’asa macam eng kakewuran. ²⁰ Ta’an nikouw kouw reiy’ tuana. Nikouw kouw mina’ajarouw sumine’u si Kristus. ²¹ Karengan nikouw kouw liminga mola en tanume Nisia wo simungkul en teturu’ witu Nisia wo i ki’it eng kaulitan em pakaloo’o-loo’ola witu si Yesus, ²² e nyi’a i ti’i kaa nikouw, e minato’orong ampit em patou-touan niouw eng ketarean, nikouw kouw lewo’ sa reiy’ mangkulela en tou ure, e minaatoala o eng kapunenganna kaa e nafsuna e makaseipen, ²³ rio kouw winerula witu e roh wo eng genangmu, ²⁴ wo makela en tou weru, si siniwo mola i ki’it eng kepa’aran ni Empung witu eng kaulitan wo eng kakudusan eng kauliulitanna. ²⁵ Kaa e ni’itu i tea’ mouw en towo wo lumila’ e nulit siesa wia se walina, karengan nikita ta masuat anggota. ²⁶ Sakawisa kouw mineupi’, te’a mouw kouw sumiwo en dosa: te’a mouw si endo tumenem, nu reiy’pe’ minompas e nupi’mu ²⁷ wo te’a mouw mewewee kalempotan wia si Iblis. ²⁸ Sitou rimongkit, te’a mouw sia rumongkit kasi, ta’an le’osouw sia ma’ayang mengente’ wo matuanala em pepa’ayangen e le’os ampit e lawasna nuesa, rio sia toro metengla sapa wia se tou reiy’ siawes. ²⁹ Te’a mouw wawean e lelila’an kotor e rumou’mi witu en sumamu, ta’an pakenouw e lelila’an e le’os kaa laa mebebangun, witu e wisa em pemandungen, rio sea nu liminga e nyi’a, se maka’ato e nupus karunia. ³⁰ Wo te’a mouw kouw mememengasi’la e Roh Kudus ni Empung, e mina’ilola nikouw melelaa e nendo pelelawiran. ³¹ E reiy’ sa mina’asa eng kape’itan, eng kakudirian, eng kaupi’an, em patokolan wo em fitnah satorona ni’i tea’mi waki e nelet miouw,en tuanakan kangkasi e reiy’ sa mina’asa eng kalewo’an. ³² Ta’an satorona nikouw kouw rinda siesa wia se walina, wuta e nupus tu’u wo ma’ampungala, en tanu eng kumura si Empung witu si Kristus si minampungola nikouw.