¹ Witu e masa ni’itu, katoroan eng kelaker ne murid se maka awesouw, o lumentutouw e ngu’ungu – ngu’ungul witu e nelet ne tou-tou Yahudi se mebaasa Yunani wia se tou-tou Ibrani, karengan e wewetengan wia se balu-balu e neiy nea i kawila witu em pelayanan susur nendo. ² Minato’orongan ampit e ni’itu se mapulu’ o rua rasul i ti’i se kimeret em baya se murid merur wo lumila’: “ Nikeiy keiy reiy’ mapedam minateula, karengan nikeiy keiy mineparla witu e Nuwu’ ni Empung kaa melelayanla e meja. ³ Kaa ni’itu, ee patuari waya, melengouw pitu tou witu e nelet miouw, se kasine’uan le’os, wo se wuta e Roh wo eng hikmat, rio keiy mopola nisea kaa e lukar i ti’i, ⁴ wo rio keiy nuesa keiy toro meela ghenang witu en sesombayangen wo em pelayanan e nuwu’.” ⁵ E nusul i ti’i en sinungkul le’os ne minapekasa jema’at, laa o sea meleng si Stefanus siesa tou si wuta iman wo e Roh Kudus, wo si Filipus, si Prokhorus, si Nikanor, si Timon, si Parmenas wo si Nikolaus, siesa tou maki’i-ki’it e agama Yahudi waki Antiokhia. ⁶ Nisea i ti’i se neiy i sarula se rasul-rasul, laa se rasul-rasul i ti’i tu’u se simombayang wo rumeta’la e lawas witu e natas nea. ⁷ E Nuwu’ ni Empung eng kasa mouw makere, wo eng kelaker ne murid waki Yerusalem se kasa mouw maawes eng kelaker; o kangkasi se pirala eng kelaker ne imam se simarakan en tou wo ma’eman ⁸ Wo si Stefanus, si minawuta ampit eng karunia wo eng kuasa, si timuanala e mujizat-mujizat wo eng kowa’-kowa’ witu e nelet ne tou kelaker. ⁹ Ta’an mapa’ato mouw se pirala tou waki jema’at Yahudi se patotoren jema’at ne tou Libertini – se anggota-anggota ne jema’at i ti’i nyi’a mouw se tou-tou waki Kirene wo waki Aleksandria – mewali-wali ampit se pirala tou Yahudi waki Kilikia wo waki Asia. Se tou-tou i ti’i se mewewueiyan ampit si Stefanus, ¹⁰ Ta’an nisea se reiy’ maka woo sumu’usuk eng hikmatna wo e Roh matodo nisia masusuiy. ¹¹ Laa o sea meule wia se pirala tou kaa laa melelila’la : “ Nikeiy keiy liminga mouw nisia nu meila’la en toto-totor nojat wia si Musa wo si Empung.” ¹² Ampit e lalan tuana nisea se simiwola e nesa gerakan witu e nelet ne tou kelaker ma’an se tu’a-tu’a wo se ahli-ahli Taurat ; nisea se rima’akep si Stefanus, kumeong nisia wo mali nisia witu en sinaru Mahkamah Agama. ¹³ Laa o sea mepelaa se sairi-sairi towo se meila’: “ Sitou i yi’i si reiy’ mena’ matotorla e lelila’an maweleiy en tampa kudus i yi’i wo e nukum Taurat, ¹⁴ karengan nikeiy keiy liminga mola nisia nu meila’la , kaa si Yesus, tou Nazaret i ti’i, si laa mereronga’la en tampa i yi’i wo meseseupla eng kenaramen neiy i warisla ni Musa wia nikita.” ¹⁵ Em baya ne tou se rimuber witu en sidang Mahkamah Agama i ti’i se timu’us wia si Stefanus, laa o sea lumoo’ eng gio ni Stefanus masuat tanu eng gio ni esa malaikat.