¹ Pokeiy ni Imam Wangko’ : “ E nulit re’en tuana?” ² Wingkot ni Stefanus : “ Hey patuari waya wo se ama’-ama’, linganola! Si Empung Kasamulia si minapa’ato mola en tou-Na wia si ama’ ni opo’ ta Abraham, katoroan sia nu wakipe’ Mesopotamia, nu reiy’pe’ sia nu minena’ waki Haran, ³ wo minee nuwu’ wia nisia : Rumou’ momi waki wanuamu wo waki se kawanua patuarimu wo mea mouw waki wanua e laa Kuituru’la wia nikoo. ⁴ Takar rumou’ momi sia waki e wanua ne tou Kasdim, laa o mena’ waki Haran. Wo nu reiy’ mouw si ama’na nu timayan, Empung si rimeo nisia sumoro’mi maname meiy wia en tana’ i yi’i, en tampa paana’an niouw teakan; ⁵ wo witu si Empung si reiy’ mineela eng kapunya’an pusaka wia nisia, awesla esa nga ke’ang tana’ tu’u reiy’, ta’an Nisia si tima’ar si laa meweweela en tana’ i ti’i wia nisia e mamuali kapunya’anna wo kapunya’an ne see’na, ma’anouw tu’u witu en toro ni’itu sia si reiy’ maka oki’. ⁶ Teinti mouw e nuwu’ ni Empung, nyi’a i ti’i kaa se see’na se laa mamuali malepu-lepu waki wanua wo’oseiy wo kaa nisea se laa budaken wo ghioan epat nga atus nge te’un eng keurena. ⁷ Ta’an se bangsa laa mebebudak nisea i ti’i se laa Kuukumen, e nuwu’ ni Empung, wo nu reiy’ mouw i tu nisea se laa rumou’mi witu wo rumaghes wia-Niaku wia en tampa i yi’i. ⁸ Laa si Empung si mineela wia nisia en teta’aran sunat ; wo en tuana mouw si Abraham nu minapaurangla si Ishak, laa o mapasunatla nisia witu e nendo ka uwalu ; wo si Ishak si minapaurangla si Yakub, wo si Yakub si minapaurangla se mapulu’ o rua ama’ ne opo’ ta. ⁹ Karengan e iri ate, se ama’-ama’ ne opo’ ta se minangker si Yusuf waki tana’ Mesir, ta’an si Empung si rimapitla nisia, ¹⁰ wo rimeta’la nisia witu e reiy’ sa mina’asa pasiasa’an ma’an minanugerala wia nisia e nupus karunia wo eng hikmat, katoroan sia nu simaru si Firaun, raja Mesir, Firaun si minopo nisia minamuali kuasa witu en tana Mesir wo witu e minapkasa istanana. ¹¹ Takar o meiy mouw em bahaya kelalenan en timoro e minapekasa en tana’ Mesir wo en tana’ Kana’an ma’an em peme’itan e wangko’, i ka’ayo se nene moyang ta se reiy’ minaka’ato kekaanen. ¹² Ta’an katoroan si Yakub nu liminga, kaa waki tana’ Mesir wawean gandum, sia rumeo se nene moyang ta mea maname. Ni’itu mouw eng kinelelales nea eng ketare-tare; ¹³ witu eng kinelelales nea eng karua Yusuf si minapasine’ula en touna wia se patuari-patuarina, laa o kakete’uanola ni Firaun e nasal en see’ ni Yusuf. ¹⁴ Kamurian Yusuf si rimeo sungkulan si Yakub, ama’na, wo em baya se kawanua patuarina, se pitu nga pulu’ o lima jiwa eng kelaker nea, ¹⁵ Laa o mea mouw si Yakub waki tana’ Mesir. Witu sia tumayan, sia wo se nene moyang ta; ¹⁶ e mayat nea neiy i soro’la waki Sikhem wo neiy i reta’la witu eng gorem e waruga en tinelesola ni Abraham ampit eng kelakerna e loit perak wia se oki-oki’ ni Hemor waki Sikhem. ¹⁷ Ta’an meketawila e lekepna en ta’ar neiy i weela ni Empung wia si Abraham, se maka’awesouw eng kelaker se bangsa i ti’i waki Mesir, ¹⁸ i ka’ayo nu tumo’or siesa raja walina si maperenta en tana’ Mesir, siesa tou reiy’ makasine’u si Yusuf. ¹⁹ Raja i ti’i si minepeka’arala en towo wiles wia se bangsa ta wo si simiasa se nene moyang ta ampit e rimeo tumea’ se dade nea, rio se bangsa ta i ti’i te’a sumena. ²⁰ Witu en toro ni’itu mouw si Musa nu minatou wo nisia si wangun witu em beren ni Empung. Telu nga sumedot eng keurena sia peurusen witu em bale ni ama’na. ²¹ Laa o sia i tea’, ta’an si keke’ ni Firaun si minurut nisia wo rimeo murus nisia tanu sioki’na nuesa. ²² Wo si Musa si tinuru’ witu e reiy’ sa mina’asa eng hikmat ne tou Mesir, wo nisia si makakuasa witu e lelila’an wo em pasiwo-siwonna. ²³ Witu en toro sia nu makaumur epat nga pulu’ nge te’un, o lumentutouw eng kepa’aran witu e natena kaa laa melelalesla se patuari-patuarina nyi’a i ti’i se tou-tou Israel. ²⁴ Katoroan e ni’itu sia lumoo siesa tou si siniasa ni esa tou Mesir, laa o sia tumulung wo rumapit wia sitou i ti’i ampit minunu’ sitou Mesir i ti’i. ²⁵ Witu eng genangna se patuari-patuarina se laa mangarti, kaa si Empung si minake nisia kaa laa melelawirla nisea, ta’an nisea se reiy’ mangarti. ²⁶ Witu e nendo kawo’odoanna sia modoli kasi katoroan se rua tou Israel se metetokol, laa o sia me’inakut mededamela nisea, pokeiyna : Patuari waya! Reiy’ ku’a re’en nikouw i yi’i kouw matuari? Ka’a ku’a kouw mesesiasa’an? ²⁷ Ta’an sitou simiwola eng kaselokan wia si ka’ampitna i ti’i si simede’ si Musa wo lumila’: Seiy re’en si minopola nikoo o mamuali pa’aka-aka’an wo akim wia nikeiy? ²⁸ Sapa ku’a koo mewewunu’ niaku, masuat tanu eng kaawi’in koo minunu’ sitou Mesir i ti’i? ²⁹ Liminga e lelila’an i ti’i, tumingkasouw si Musa wo matou-tou tanu se malepu-lepu waki tana’ Midian. Witu o sia mapaurangla se rua oki’ tuama. ³⁰ Wo nu reiy’ mouw epat nga pulu’ nge te’un mapa’ato mouw wia nisia siesa malaikat waki padang gurun eng kuntung Sinai witu eng gorem e layasna napi o rumou’mi witu eng kongkom tetunean. ³¹ Musa si mina’erang en tanume e linoo’na i ti’i, wo katoroan sia nu lumaa witu kaa laa meleloo’ nyi’a witu en tawi, meiy mouw en suara ni Tuhan wia nisia : ³² Niaku mouw si Empung ne nene moyangmu, Empung ni Abraham, Ishak wo ni Yakub. Takar o tumenggo’ogho’ mouw si Musa, wo nisia si reiy’ mouw berani kasi lumoo’ nyi’a. ³³ Laa e nuwu’ ni Empung wia nisia : Pangkulenola eng kasutmu witu e ne’amu, karengan en tampa, wisa koo rimedeiy i ti’i, nyi’a mouw en tana’ kudus. ³⁴ Niaku ku minee mola ghenang ampit e uli-ulit eng kapedisan ne umat-Ku waki tana’ Mesir wo Niaku ku liminga mouw e nga’angal nea, wo Niaku ku timumpa mouw kaa merereta’la nisea; kaa ni’itu meiy mouw, nikoo koo laa Kuitoke waki tana’ Mesir. ³⁵ Si Musa yi’i, si neiy nea mouw i sede’ , ampit e limila’la : Seiy re’en si minopola nikoo mamuali pa’aka-aka’an wo akim? – si Musa i yi’i mouw kangkasi si neiy i toke ni Empung tanume si pa’aka-aka’an wo lumelawir kaa se malaikat, se minapa’ato mola en tou wia nisia waki eng kongkom tetunean i ti’i. ³⁶ Nisia mouw si minali nisea rumou’ ampit simiwola e mujizat-mujizat wo eng kowa’-kowa’ waki tana’ Mesir, waki Tasik Mea’ wo waki padang gurun epat nga pulu’ nge te’un eng keurena. ³⁷ Musa i yi’i mouw kangkasi si limila’ wia se tou Israel : Siesa nabi tanu niaku i yi’i si laa to’orela ni Empung i wee nikoo witu e nelet ne patuari-patuarimu. ³⁸ Musa i yi’i mouw si minamuali paelet witu en sidang jema’ah waki padang gurun witu e nelet ne malaikat se minee e nuwu wia nisia waki eng kuntung Sinai wo se nene moyang ta; wo nisia mouw si simungkul e nuwu-nuwu’ matou-tou kaa laa mapa’ayola nyi’a wia nikouw. ³⁹ Ta’an se nene moyang ta se reiy’ pa’ar lumale’ wia nisia, awes tare nisea se simede’ nisia. Witu e nate nea se pa’ar mareng waki tana’ Mesir. ⁴⁰ Wia si Harun sea lumila’: Siwo mouw i wee nikeiy se pirala empung se laa kumelang witu e rerior meiy, karengan si Musa i yi’i si mina’aka-aka mola wia nikeiy kimaluari waki tana’ Mesir – nikeiy keiy reiy’ mete’u sapa e minamuali mola ampit nisia. ⁴¹ Laa o witu en toro ni’itu sea sumiwo e nesa sioki’ ni lembu wo sumempela wia sesempean wia si berhala i ti’i wo sea mepa’a-pa’ar tanume en sapa en siniwo neala nuesa. ⁴² Takar lumenge mouw si Empung wia nisea wo mayala nisea marahges wia se suraro langit, tanu neiy i patik witu em buuk ne nabi-nabi Sapa ku’a kouw simempela wia-Niaku en tetule rineret wo e sesempean eng kaurean epat nga pulu’ nge te’un waki padang gurun i ti’i, heiy kaum Israel ? ⁴³ Reiy’ ma’a mekasa, awes tare kouw minuleng en dasing Molokh wo si sumesena’ ni dewa Refan, se patong-patong siniwo miouw i ti’i kaa se laa pa’ongkoten. Takar Niaku ku laa mali nikouw witu eng gorem en tinea’an i ka’ayo waki e lewetname em Babel. ⁴⁴ Dasing Kasairian em bia se nene moyang ta waki padang gurun, tanu neiy i perentala ni Empung wia si Musa kaa mesesiwola nisia i ki’it en contoh linoo’na mouw. ⁴⁵ Eng dasing i ti’i eng kina’atoan ne nene moyang taw o ampit e niaka’an ni Yosua nialimi ghumorem wia en tana’ yi’i, nyi’a i ti’i e nedo en tana’ yi’i kinaatla wia se bangsa-bangsa walina se niape’an ni Empung witu en sinaru ne nene moyang ta; tuana mouw i ka’ayomi en zaman ni Daud. ⁴⁶ Daud si minaka’ato mola e nupus karunia witu en sinaru ni Empung wo nisia si makiwee, rio sia iyonala kaa laa mereredeiyla e nesa tampa paana’an i wee si Empung ni Yakub. ⁴⁷ Ta’an si Salomo mouw si rimedeiyla e nesa wale i wee si Empung. ⁴⁸ Ta’an Si Kasarakek si reiy’ minena’ witu eng gorem sapa en siniwo e lawas ni tou, tanu neiy i lila’la ni nabi : ⁴⁹ Langit nyi’a mouw en takhta-Ku, wo em bumi nyi’a mouw eng kontoiyan e ne’a-Ku. Wale sapa re’en e laa i redeiymula i wee-Niaku, tuana mouw e nuwu’ ni Tuhan, en tampa sapa re’en elaa mamuali ena’an-Ku? ⁵⁰ Reiy’ ku’a e lawas-Ku sandiri en simiwo em baya nyi’a yi’i? ⁵¹ Heiy tou-tou se kete kokong wo se reiy’ makasunat ate wo talinga, nikouw kouw reiy’ mena’ mekawar e Roh Kudus, masuat tanu se nene moyangmu, tuana mouw kangkasi nikouw. ⁵² Seiy re’en wia se nabi-nabi si reiy’ siniasa ne nene moyangmu? Awesla nisea se minunu’ se tou-tou se kasa ketare minabarla en tanume eng ke’e eiy ni Tou Ulit, en takan si winilesan niouw mola wo winunu’ miouw. ⁵³ Nikouw kouw minaka’ato mouw e nukum Taurat e neiy i pa’ayola ne malaikat-malaikat, ta’an kouw reiy’ kimi’itla nyi’a.” ⁵⁴ Katoroan se anggota-anggota Mahkamah Agama i ti’i liminga em baya nyi’a i ti’i, eng kasa kina tude’an e nate nea. Takar nisea se simungkul nyi’a ampit eng kare’eket em ba’ang. ⁵⁵ Ta’an si Stefanus, si minawuta ampit e Roh Kudus, timu’use waki langit, laa o lumoo’ eng kamulia’an ni Empung wo si Yesus si rimedeiy witu esa nga weka lele’os ni Empung. ⁵⁶ Laa o pokeiyna : “ E nuli-ulit, niaku ku limoo’ e langit mina wuka’ wo si Oki’ ni Tou si rimedeiy witu esa nga weka lele’os ni Empung.” ⁵⁷ Takar mereke-rekeiyow sea wo kasuatan minenet en talinga makarengan simerbu nisia. ⁵⁸ Nisea se kimeong nisia waki luar kota , laa o lumawa nisia. Wo se sairi-sairi se rimeta’la eng karaiy nea witu en sinaru e ne’a ni esa taretumou si mekengaran Saulus. ⁵⁹ Kasuatan se nu melawala nisia Stefanus si simombayang, pokeiyna : “ Oh Tuhan Yesus, sungkuleouw e rohku.” ⁶⁰ Kasuatan kimurur sia maaleiy ampit en suara menaleinteng : “ Tuhan, te’a mouw i pepepesa’anla en dosa yi’i wia nisea!” Wo ampit e lelila’an i ti’i tumayanouw sia.