¹ Ni’itu nu pinutusola, kaa nikeiy keiy laa moleme mea waki Italia, takar si Paulus wo se pirala tou tinaang walina se neiy i sarakan wia siesa perwira mekengaran Yulius waki se pasukan ni Kaisar. ² Nikeiy keiy simeret witu e nesa kapal waki Adramitium laa ma’e waki sesuwa’an-sesuwa’an waki kelabotan em pante Asia, laa o keiy tumodome. Si Aristarkhus, siesa tou Makedonia waki Tesalonika, si rimapitla nikeiy. ³ Witu e nendo kawo’odoanna keiy timuli waki Sidon. Yulius si matuanala si Paulus ampit e le’os wo mineela nisia toro lumalesla se kalo-kalona, rio sea lumekepla em pemandungenna. ⁴ Karengan e reghes en sali’idek keiy minolemi witu simusu em pante Siprus. ⁵ 5 Wo ni’itu nu simu’usukola en tasik waki saruan eng Kilikia wo em Pamfilia, i ka’ayo mola keiy waki Mira, waki daerah Likia. ⁶ Witu si perwira meiy si minatola e nesa kapal waki Aleksandria mewewoleme me’a waki Italia, nisia si simoro’la nikeiy witu eng kapal i ti’i. ⁷ Eng keurean pirala nga endo mawole, nikeiy keiy weitouw reiy’ kelaa wo ampit eng kasa peme’itan keiy metawila eng Knidus. Karengan e reghes reiy’ le’os, o keiy sumusu em pante Kreta limangkoiyla en tongkeiyna Salmone. ⁸ Ni’itu nu reiy’ mouw keiy ampit eng kasa kapedisan limangkoiyla en tongkeiyna i ti’i, i ka’ayo mola keiy waki e nesa tampa mekengaran Sesuwa’an wangun, tawi eng kota Lasea. ⁹ Kasuatan e ni’itu lakerouw e nedo neiy i katea’. E nedo maposo limangkoiy mouw wo em bahaya mouw sa laa mapawee-weela em pawole-wolean. Kaa ni’itu si Paulus si ngime’enge’la nisea, pokeiyna: ¹⁰ “Patuari waya, linoo’oku, kaa em pawole-wolean ta e laa mapa’eiyla eng kapedisan-kapedisan wo eng karugian wangko’, reiy’kan i te kaa e muatan wo eng kapal, ta’an kangkasi kaa e nyawa ta.” ¹¹ Ta’an si perwira i ti’i si lebe ma’eman wia si mengengulin wo si nahkoda ta’an en tetotoren ni Paulus. ¹² Karengan en sesuwa’an i ti’i reiy’ le’os sa mena’ witu eng kaurean noras eng ge’egher, takar kelakeran wia nisea se lebe pa’ar sa mole mapawee-wee wo ma’awa’ ma’ayola eng kota Feniks kaa laa mena’ witu keurean e noras eng ge’egher. Eng kota Feniks nyi’a mouw e nesa sesuwa’an em pulau Kreta, e minawuka’ matorome en talikuran warat wo matorome talikuran en tasik. ¹³ Witu e nedo ni’itu reghes e mawi’iwisi waki timu. Nisea se mapokeiyla, kaa e maksud nea tantu mouw e laa ka’ayoan. Nisea se ghimoghar en sauh, laa o mawole tawi kasa masusu em pante Kreta. ¹⁴ Ta’an reiy’ pirala eng keurena kamurian tu tumumpa momi waki katoroan em pulau i ti’i e reghes tumokol, em patotoren reghes “Sendangan en Tasik”. ¹⁵ Kapal i ti’i en tinorona wo reiy’ timaang mesarula e reghes haluang. Kaa ni’itu keiy minapasuatola wo mayala eng kapal meiy malengki-lengki’. ¹⁶ Kamurian o keiy i kaso’oso’ i ka’ayo waki pante e nesa pulau rintek mekengaran Kauda, wo witu ampit eng kasa kapedisan keiy toro kimuasala en sekoci eng kapal i ti’i. ¹⁷ Wo en sekoci i ti’i nu neiy mouw i seretla witu natas eng kapal, nisea se minaas em pakakas-pakakas sesawang ampit rimikerla eng kapal i ti’i ampit en tali. Wo karengan meide’ i kawe’ewe’ witu e neris Siritis, nisea se timumpala e layar wo mayala eng kapal i ti’i melengki-lengki’ mokan. ¹⁸ Karengan nikeiy keiy kasa hebat i pelengki-lengki’la e reghes tumokol, takar witu nendo kawo’odoanna sea muleiy tumea’ e muatan eng kapal witu en tasik. ¹⁹ Wo witu e nendo katelu sea tumea’ em pakakas-pakakas eng kapal ampit e lawas nea nuesa. ²⁰ Ni’itu nu pira mola nga endo eng keurena le’os siendo ka’apa tu’u se sumesena’-sumesena’ se reiy’ paloo’on, wo e reghes tumokol eng kasa ente’ reiy’ maena-ena’ me’iwet nikeiy, eng kesampetanna mineta’atasouw e narapan neiy kaa toro laa lumawirla en tou meiy. ²¹ Wo eng karengan nisea se pira mola eng keurena reiy’ mekaan, o rumedeiy mouw si Paulus witu eng keuneran nea wo lumila’: “Patuari waya, sa wona’na e nge’enge’ku eng kini’itala, rio kita te’a molemi waki Kreta, ta tantu mouw kinakendiran witu eng kapedisan wo eng karugian i yi’i! ²² Ta’an en teakan, o kangkasi witu eng kapedisan i yi’i, niaku ku ngume’enge’la nikouw, rio kouw minena-ena’ kimeter e nate, karengan reiy’ siesa tou tu’u witu nelet miouw si laa mapuneng, kacuali eng kapal i yi’i. ²³ Karengan eng kawengi siesa malaikat waki si Empung, nyi’a i ti’i waki si Empung pasempegku tanume si kapunya’an-Na, rimedeiy witu esa nga wekaku, ²⁴ wo sia lumila’: Te’a meide’, Paulus! Nikoo koo lewo’ sa reiy’ sumaru si Kaisar; wo eng kaulitna kaa eng karunia ni Empung, takar em baya ne tou se wia mewali-wali ampit nikoo wia eng kapal i yi’i se laa melawir kaa nikoo. ²⁵ Kaa ni’itu keterenouw e natemu, patuari waya! Karengan niaku ku ma’eman wia si Empung, kaa em baya nyi’a en tantu mamuali masuat tanu neiy i papaloo’ola wia niaku. ²⁶ Ta’an ta lewo’ sa reiy’ me’ewe’la eng kapal i yi’i witu meta’asa’an em pulau.” ²⁷ E wengi kamapulu’ o epat em bia mouw wo nikeiy keiy minena’pe’ malengki-lengki’ waki tasik Adria. Ta’an wo’o wona’ maparua em bengi se oki-oki’ eng kapal se mapedam, kaa nisea se tawi mouw eng ketana’an. ²⁸ Laa o sea meroiyla em batu pawona’, wo kaloo’ala en dano em bitu e rua nga pulu’ depa eng keraremna. Ni’itu nu majula oki’ nisea se mawona’la kasi wo kaloo’ala e mapulu’ o lima depa. ²⁹ Wo karengan meide’, kaa nikeiy keiy laa i kera’aser witu e meta’asa’an watu karang, nisea se limobo’ e nepat jangkar waki buritan, wo nikeiy keiy kasa maarap satorona e nendo mario-rior maoat. ³⁰ Ta’an laa se oki-oki’ eng kapal se me’inakut laa metetingkasla en tou witu eng kapal. Nisea se timumpala en sekoci, wo se simiwo tanu mokan se laa mesesuwa’la em pirala ladung waki haluang. ³¹ Kaa ni’itu si Paulus si limila’ wia si perwira wo se prajurit-prajuritna: “Sa kouw reiy’ mena’ wia eng kapal, nikouw kouw reiy wona’ melawir.” ³² O laa se prajurit-prajurit i ti’i se kimetor en tali sekoci wo mayala nyi’a sumo’oso’. ³³ 33 Katoroan e nendo maoatouw, Paulus si minaruiy em baya ne tou laa kumaan, pokeiyna: “Mapulu’ o epatouw nga endo eng keurena kouw mengena-ngena’ i te, metaang e narem wo reiy’ mekaan sapa-sapa. ³⁴ 34 Kaa ni’itu niaku ku ngume’enge’la nikouw, rio kouw kumaane’la. Eng kapualitan i ti’i em pemandungen kaa eng kelawirannu. Reiy’ siesa tou tu’u witu nelet miouw si laa kaliongan e nesa tu’u witu e wu’uk eng kokongna.” ³⁵ 35 Nisia nu limila’ mola en tuana, sia medo roti, tumotor syukur wia si Empung witu en sinaru em baya nea, memete-mete’la nyi’a, laa o muleiy kumaan. ³⁶ Takar keterouw e nate em baya ne tou i ti’i, wo sea tu’u kumaan kangkasi. ³⁷ Eng kelaker meiy nu waya witu eng kapal i ti’i rua nga atus pitu nga pulu’ o enem jiwa. ³⁸ Nisea nu wesu mouw, sea tumea’ e muatan gandum witu en tasik kaa mewewure’la eng kapal i ti’i. ³⁹ Wo katoroan e nendo maoatouw, sea lumoo e nesa teluk patar em pantena. Ma’anouw tu’u sea reiy’ sumine’u eng ketana’an i ti’i, sea mutusla kaa sa tanu en toro wona’ me’ewe’la eng kapal i ti’i witu. ⁴⁰ Nisea se rimeta’la en tali-tali ladung, laa o tumele’ula e ladung-ladung i ti’i witu en to’otolan en tasik. Kasuatan e ni’itu sea meroiyla en tali-tali kamudi, o maasla e layar patobol, rio e reghes tumodola eng kapal i ti’i tumodome waki pante. ⁴¹ Ta’an nisea se limangkoiy eng kakuwuan e neris, wo i kera’aserouw eng kapal i ti’i. Eng haluangna neiy i kepa’asek wo e reiy’ mete’u moghe wo em buritanna eng kemu winewe em balolongan hebat. ⁴² Witu e nedo ni’itu se prajurit-prajurit se mepa’ar laa mewewunu’ se tahanan-tahanan, te’a wawean siesa tou tu’u si tumingkasla en tou ampit lumi’ilip. ⁴³ Ta’an si perwira i ti’i si pa’ar melelawirla si Paulus. Kaa ni’itu nisia si mino’opolela e maksud nea, wo minerentala, rio se tou-tou sigha’ mali’ilip se kumetare tumumpele’ witu en tasik wo lumongkot waki ketana’an, ⁴⁴ wo rio se tou-tou walina se tumodeiy ampit makela em papang ka’apa em pete’-pete’na eng kapal. Tuana mouw nisea nu waya se minelawir se limongkot waki ketana’an.