¹ Keiy nu neiy mouw i ka’ayola ampit e lawir waki pante, tare mouw i te keiy mete’u, kaa eng ketana’an i ti’i nyi’a mouw em pulau Malta. ² Se penduduk em pulau i ti’i se kasa rinda wia nikeiy. Nisea se timeula e napi wangko’ wo maruiy nikeiy nu waya mea witu karengan mamuleiy mouw e naro wo reghesna eng ge’egher. ³ Katoroan si Paulus nu mapurut esa nga ke’ekes pangana-pangana wo rumeta’la nyi’a witu natas e napi, o rumou’ momi siesa leloiy’ biludak karengan em pasu’na e napi i ti’i, laa o kumiki lawasna. ⁴ Katoroan se tou-tou i ti’i nu limoo’ si leloiy’ i ti’i kime’edel witu lawas ni Paulus, nisea se limila’ siesa wia se walina: “Sitou i yi’i tantu mouw siesa tou mememunu’, karengan, ma’anouw tu’u sia neiy i kaliseiymi waki tasik, nisia si reiy’ neiy i wayala matou-tou ni Dewi Ka’adilan.” ⁵ ” Ta’an si Paulus si mini’ipikla si leloiy i ti’i witu eng gorem e napi, wo nisia si kasa reiy’ sapa-sapa. ⁶ Ta’an nisea se mapokeiyla, kaa nisia si laa kumesa ka’apa mate i karewa en toro i te ni’itu kangkasi. Ta’an e nure mouw mengena-ngena’, sea lumoo’, kaa reiy’la sapa-sapa e minamuali wia nisia, takar eng kapurikitna nisea se makagenang, kaa nisia siesa dewa. ⁷ Reiy’ wa’akatla waki tampa i ti’i wawean tana’ em punya ni gubernur em pulau i ti’i. Gubernur i ti’i ngaranna Publius. Nisia si simungkul nikeiy wo time’esla nikeiy ampit e rindana keurean telu nga endo. ⁸ Katoroan e ni’itu si ama’ ni Publius si neiy i katekel karengan si minasu’ wo en disentri. Paulus si ghimorem witu eng kamarna; nisia si simombayang ampit limelerla e lawas witu natasna wo lume’osla nisia. ⁹ Nu reiy’ mouw e minamualila i ti’i o meiy mouw kangkasi se tou-tou rara’an walina waki pulau i ti’i wo nisea tu’u se line’osla kangkasi. ¹⁰ Nisea se kasa maormatla nikeiy wo eng katoroan keiy nu metetodo mouw, nisea se simadiala e reiy’ sa mina’asa wo’o sapa em pemandungen neiy. ¹¹ Telu nga sumedot eng kamurian nikeiy nu rumou’mi witu o sumeret e nesa kapal waki Aleksandria keurean e noras eng ge’egher en simuwa’ witu em pulau i ti’i. Eng kapal i ti’i minake lambang Dioskuri. ¹² Nikeiy keiy timuli witu en Sirakusa wo mena’ witu en telu nga endo eng keurena. ¹³ Waki witula o keiy sumusu em pante, laa o i ka’ayola waki Regium. Esa nga endo kamurian o sumengo mouw e reghes timu wo witu e nendo karua i ka’ayo mola keiy witu em Putioli. ¹⁴ Witu keiy mato’upan ampit se anggota-anggota jema’at, wo kaa e nundangan nea o keiy mena’ pitu nga endo mewali-wali nisea. Nu reiy’ mouw i tu o keiy mae waki Roma. ¹⁵ Se patuari-patuari maname se liminga mouw tanume eng kapualitan neiy wo nisea se mineiy tume’upla nikeiy i ka’ayo waki Forum Apius wo en Tres Taberne. Katoroan si Paulus nu limoo’ nisea, sia tumotor syukur wia si Empung laa o keterouw e natena. ¹⁶ Nikeiy nu neiy mouw i ka’ayola waki Roma, Paulus si neiy i weela mena’ witu em bale nuesa mewali-wali siesa prajurit mekawal nisia. ¹⁷ Telu nga endo kamurian Paulus si kimeret se tou-tou i pamuka-muka ne bangsa Yahudi wo nisea nu minerurouw, Paulus si limila’: “Patuari waya, ma’anouw tu’u ku reiy’ simiwo eng kaselokan wia se bangsa ta ka’apa witu eng kenaramen ne nene moyang ta, ta’an niaku ku sinikop waki Yerusalem wo i sarakanla wia se tou-tou Roma. ¹⁸ Niaku nu kinumisi mola, nisea se mekemaksud merereta’la niaku, karengan se reiy’ minato esa kaselokan tu’u wia niaku e waar ampit e nukuman paten. ¹⁹ Ta’an laa se tou-tou Yahudi se mapero nyi’a wo kaa ni’itu e limupu mouw niaku lumongkot em banding wia si Kaisar, ta’an reiy’ ampit e maksud kaa laa mererapotla se bangsaku. ²⁰ Ni’itu mouw eng karenganna niaku ku kimiwee, rio niaku ku lumoo nikouw wo sumusuiy ampit nikouw, karengan awes tare kaa em paarapen ni Israelouw o ku wa’akesen ampit en torongku i yi’i.” ²¹ Ta’an laa sea lumila’ wia nisia: “Nikeiy keiy reiy’ minaka’ato en surat-surat waki Yudea tanume nikoo wo kangkasi reiy’la siesa tou tu’u wia se patuari-patuari ta se mineiy mabarla sapa-sapa e lewo’ tanume nikoo. ²² Ta’an nikeiy keiy pa’ar luminga wia nikoo, kumura eng genangmu, karengan tanume e mazhab i yi’i eng kete’uan neiy, kaa waki wisa-wisa tu’u nisia si maka’ato peroan.” ²³ Laa o sea tumantula e nesa endo i wee si Paulus. Witu e nendo neiy i tantula i ti’i o meiy mouw sea se ka’asa’an eng kelaker meiy witu en tampa tine’upanna. Nisia si timerangla wo mineela kasairian wia nisea tanume eng Keraja’an ni Empung; wo en timo’otolela witu e nukum ni Musa wo eng kaol ne nabi nisia si me’inakut me’emanla nisea tanume si Yesus. Eng kapualitan i ti’i minapawee-wee wakipe’ memo’odo i ka’ayo mawengido. ²⁴ Wawean se toro niemanla kaa en tetotorenna, wawean se minena’ reiy’ ma’eman. ²⁵ Takar i kasera mouw em pinate’upan i ti’i ampit reiy’la siminatoroan witu e nelet nea. Ta’an si Paulus si limila’pe’la en tetotoren nesa i yi’i: “En timena’ mouw e nuwu’ neiy i pa’ayola e Roh Kudus wia se nene moyang ta ampit e nieletan ni nabi Yesaya: ²⁶ Mea mouw wia se bangsa i yi’i, wo i lila’ mola: Nikouw kouw laa luminga wo luminga, ta’an kouw reiy’ mangarti, nikouw kouw laa lumoo’ wo lumoo’ ta’anouw reiy’ lumoo’ maka le’os. ²⁷ Karengan e nate ne bangsa i yi’i eng kimuraberouw, wo en talingana e wuterouw malinga, wo em berenna eng kimerut minereng; rio te’a sea lumoo’ ampit em berenna wo luminga ampit en talingana wo mangarti ampit e natena, laa o murikit i ka’ayo Niaku nu lume’osla nisea. ²⁸ Kaa ni’itu kouw lewo’ sa reiy’ mete’u, kaa eng kelawiran waki si Empung i yi’i neiy i pa’ayola wia se bangsa-bangsa walina wo nisea se laa luminga nyi’a.” ²⁹ [Wo si Paulus nu limila’ mola en tuana, o mea mouw se tou-tou Yahudi i ti’i ampit e minegheghioan ghenang witu nelet nea.] ³⁰ Wo si Paulus si minena’ rua nge te’un tu’u witu em bale sinewana nuesa i ti’i; nisia si masungkulela em baya ne tou se mengeiy wia nisia. ³¹ Ampit e makaredeiy wo reiy’la sapa tu’u e minape’ nisia si maabarla eng Keraja’an ni Empung wo mawee teturu’ tanume si Tuhan Yesus Kristus.