¹ Pokeiy ni Agripa wia si Paulus: “Nikoo koo wineean kalempotan laa rumapit en tou.” Paulus si minee tanda ampit e lawasna, laa o mee e rerapitna tanume en tumodongla: ² “Ya raja Agripa, niaku ku mapedam aruiy, karengan wia e nendo i yi’i niaku ku ni’iyonala mewewee pertanggungan jawab witu en sinarumu witu e reiy’ sa mina’asa teturean neiy i pa’ayola ne tou-tou Yahudi wia en touku, ³ kasa ketare kaa nikoo koo mete’u uli-ulit eng kenaramen wo eng kapoongan ne tou Yahudi. Kaa ni’itu niaku ku makiwee wia nikoo, rio koo lumingala niaku ampit en sabaar. ⁴ Em baya ne tou Yahudi se mete’u e lalan patou-touangku rengane’ e masa mudaku, karengan wakipe’ eng ketarean niaku ku matou-tou witu eng keuneran ne bangsaku waki Yerusalem. ⁵ Nure mouw sea makasine’u niaku wo sa wona’ sea pa’ar, nisea se toro meela kasairian, kaa niaku ku timou mouw tanu siesa tou Farisi ni’i ki’it e mazhab kasa kete witu agama ta. ⁶ Wo en teakan niaku ku lewo’ sa reiy’ sumaru em paadilan karengan niaku ku maarapla eng kalekepan en ta’ar, neiy i weela ni Empung wia se nene moyang ta, ⁷ wo em pengena-ngena’anla ne mapulu’ o rua suku ta, kasuatan nisea oat o wengi matuanala e raghes nea ampit en tentem. Wo karengan em paarapen e ni’itu mouw, ya raja Agripa, niaku ku i pature ne tou-tou Yahudi. ⁸ Ka’a kouw mapokeiyla e mustahil, kaa si Empung si mato’orla se tou minate? ⁹ Ma’an kumura tu’u kangkasi, niaku nuesa ku mekasa mouw mapokeiyla, kaa niaku ku lewo’ sa reiy’ kete mawinta’ mapero e ngaran ni Yesus waki Nazaret. ¹⁰ Eng kapualitan i ti’i en tinuanakula kangkasi waki Yerusalem. Niaku ku reiy’kan i te ghimoremola kelaker se tou kudus witu eng gorem em penjara, niaku nu minaka’ato mola eng kuasa wia se imam-imam kepala, ta’an niaku kangkasi ku miyon, sa sea ukumen paten. ¹¹ Witu e wale-wale ibadat niaku ku re’eregh masiasa nisea wo mase’esek nisea sumangkal e iman nea wo witu e nupi mekaro’oko’ ku maki’it nisea, awes tare i ka’ayo eng kota-kota wo’oseiy.” ¹² “Wo witu eng ka’ada’an tuana, katoroan niaku ampit eng kuasa kasa wo e lukar waki se imam-imam kepala kasuatan niaku nu witu em pakela-kelangan mengea waki Damsyik, ¹³ i kasenge’mi, ya raja Agripa, witu e marorake te’etel niaku ku limoo witu nuner e lalan i ti’i en sena’ lumantouwla ta’an en sena’ ni endo, en timumpami waki langit simaputi niaku ampit se ka’ampit-ka’ampit esa pakela-kelangan o niaku. ¹⁴ Nikeiy nu waya keiy neiy i karewa witu en tana’ wo niaku ku liminga e nesa suara meila’la wia niaku witu em baasa Ibrani: Saulus, Saulus, ka’a koo masiasa Niaku? Em pedis i wee nikoo melelubake waki tetegher palewo’. ¹⁵ Ta’an niaku ku miningkot: Seiy Koo, Tuhan? Pokeiy ni Tuhan: Niaku mouw si Yesus, si pasiasannu i ti’i. ¹⁶ Ta’an en teakan, tumo’orouw wo rumedeiy mouw, Niaku ku mapa’atola en tou wia nikoo kaa metetantula nikoo mamuali pelayan wo sairi tanume e reiy’ sa mina’asa wo’o sapa e linoo’mu mouw wia-Niaku wo en tanume en sapa e laa Ku i papaloo’ola wia nikoo ee sangali. ¹⁷ Niaku ku laa mesesea’la nikoo wia se bangsa i yi’i wo wia se bangsa-bangsa walina. Wo Niaku ku laa tumoke nikoo wia nisea, ¹⁸ kaa laa mewewuka’ em beren nea, rio sea murikiti waki kareiydeman meiy wia en terang wo waki kuasa ni Iblis meiy wia si Empung, rio nisea karengan e iman nea wia-Niaku se maka’ato em paampungan dosa wo se maka’ato weteng witu en sapa neiy i tantula i wee se tou-tou kinudusola. ¹⁹ Kaa ni’itu, ya raja Agripa, witu em pineleloo’ waki sorga o meiy i ti’i reiy’ ma’an mekasa o ku reiy’ lale’. ²⁰ Ta’an eng ketare-tare niaku ku minabarla wia se tou-tou Yahudi waki Damsyik, waki Yerusalem, wo waki minapekasa en tana’ Yudea, wo kangkasi wia se bangsa-bangsa walina, kaa nisea se lewo’ sa reiy’ makedo’ wo murikit wia si Empung ampit matuanala em pepa’ayangen-pap’ayangen miatoroan ampit em pakedo’an i ti’i. ²¹ Kaa ni’itu mouw se tou-tou Yahudi se simikop niaku witu em Bait ni Empung, wo se mina’awa’ mewewunu’ niaku. ²² Ta’an kaa en tulungan ni Empung ku toro timou i ka’ayomi en teakan wo meela kasairian wia se tou-tou rintek wo se tou-tou sela. Wo sapa neiyku i abarla i ti’i reiy’ si walina ta’an nu reiy’pe’ nyi’a e neiy mouw i pakite’ula ne nabi wo kangkasi ni Musa, nyi’a i ti’i, ²³ kaa si Mesias si lewo’ sa reiy’ me’an em peme’itan wo kaa Nisia mouw si ketare laa tumo’ori witu nelet ne tou minate, wo kaa Nisia si laa mabarla en terang wia se bangsa i yi’i wo wia se bangsa-bangsa walina.” ²⁴ Kasuatan si Paulus nu ma’ayola em baya nyi’a i ti’i kaa mepepertanggong jawabla em pepa’ayengenna, o lumila’ mouw si Festus ampit en suara ente’: “Koo palela’an, Paulus! En tine’umu kelaker i ti’i en simiwo nikoo mepalela’an.” ²⁵ Ta’an si Paulus si miningkot: “Niaku ku reiy’ palela’an, Festus si mulia! Niaku ku meila’la eng kaulitan ampit eng genang segaya’! ²⁶ Raja kangkasi si mete’u tanume e reiy’ sa mina’asa em perkara i yi’i, kaa ni’itu niaku ku berani limila’ makaredeiy wia nisia. Niaku ku ma’eman, kaa e reiy’la wo’o sapa tu’u witu em baya nyi’a i yi’i e reiy’pe’ liningana, karengan em perkara i yi’i e reiy’ minamuali waki kaso’obitan. ²⁷ Ma’eman ku’a re’en Nikoo, raja Agripa, wia se nabi? Niaku ku mete’u, kaa nikoo koo ma’eman wia nisea.” ²⁸ Wingkot ni Agripa: “Weitouw mokan i te ku emanennula mamuali tou Kristen!” ²⁹ Pokeiy ni Paulus: “Niaku ku mesesombayang wia si Empung, rio makarengan ka’apa meure-meure reiy’kan i te nikoo, ta’an em baya ne tou walina se wia nyi’i wo se limingala em patotorku se mamuali masuat tanu niaku, kacuali en torongku-torongku i yi’i.” ³⁰ Laa o tumo’orouw si raja wo si wali em banua ma’an si Bernike wo em baya ne tou se rimuber mewali-wali nisea. ³¹ Kasuatan sea nu mekaluar, sea meila’ siesa wia se walina: “Sitou i yi’i si reiy’ simiwola wo’o sapa e waar ampit e nukuman paten ka’apa ukuman penjara.” ³² Pokeiy ni Agripa wia si Festus: “Sitou i ti’i eng kaulitna si toro mouw i wayala sa wona’ sia reiy’ limongkot em banding wia si Kaisar.”